ជាតិ
នយោបាយជាតិ
លោក ហោ ណាំហុង ប្រាប់បក្សប្រឆាំងឲ្យបញ្ឈប់ការញុះញង់បញ្ហាព្រំដែន
× ក្រុមការងារព្រំដែនរបស់រដ្ឋាភិបាលកម្ពុជាបានបញ្ចប់ការផ្ទៀងផ្ទាត់ ផែនទីផ្លូវការរបស់រដ្ឋាភិបាលកម្ពុជា និងផែនទីដែលខ្ចីពីប្រទេសបារាំងហើយនៅម៉ោងជិត១២ថ្ងៃត្រង់នេះ។ ទាំងលោក វ៉ា គឹមហុង ដែលជាអ្នកពន្យល់អំពីការប្រៀបធៀបផែនទីទាំង២៦ផ្ទាំងរយៈពេលជិត៣ម៉ោងនៅ វិមានសន្តិភាព និងទាំងលោក ហោ ណាំហុង ប្រធានគណៈកម្មការចំពោះកិច្ចទទួលបន្ទុកទទួល ផ្ទៀងផ្ទាត់ និងប្រគល់ផែនទី បានអំពាវនាវដល់គណបក្សប្រឆាំង ឲ្យបញ្ចប់ការវាយប្រហាររដ្ឋាភិបាលក្នុងសំណុំរឿងព្រំដែន ហើយប្រឹងប្រែងបង្កើតកម្មវិធីនយោបាយល្អដើម្បីទាក់ទាញអ្នកបោះឆ្នោតវិញ។ ការអំពាវនាវនេះត្រូវបានធ្វើឡើងក្រោយពីការបញ្ចប់ការផ្ទៀងផ្ទាត់ផែនទី នៅព្រឹកថ្ងៃទី៣កញ្ញានេះ។
លោកឧបនាយករដ្ឋមន្ត្រី ហោ ណាំហុង បានប្រើវេទិកានៃពិធីផ្ទៀងផ្ទាត់ផែនទីដែលត្រូវបានផ្សាយផ្ទាល់តាមបណ្តាញទូរទស្សន៍ក្នុងប្រទេស ដើម្បីប្រាប់គណបក្សនយោបាយ ដែលគេអាចយល់បានថា លោកចង់សំដៅទៅលើគណបក្សសង្គ្រោះជាតិ ឲ្យបញ្ចប់ការនិយាយញុះញង់ក្នុងរឿងព្រំដែន ដោយសារផែនទីពីដែលផលិតដោយប្រទេសបារាំងក៏បង្ហាញអំពីភាពដូចគ្នានៃផែនទីផ្លូវការដែលរដ្ឋាភិបាលកំពុងប្រើក្នុងពេលបច្ចុប្បន្នដែរ។ លោក ហោ ណាំហុង ប្រាប់ឲ្យគណបក្សប្រឆាំងផ្តោតអារម្មណ៍លើកម្មវិធីនយោបាយរបស់ខ្លួនវិញ ដើម្បីទាក់ទាញអ្នកបោះឆ្នោត។ «សូមគណបក្សនយោបាយបញ្ចប់ត្រឹមប៉ុណ្ណេះ។ កុំឲ្យគណបក្សនយោបាយញុះញង់ពលរដ្ឋប្រឆាំងរដ្ឋាភិបាលក្នុងបញ្ហាព្រំដែនទៀត។ សូមបក្សនយោបាយមានភាពស្មោះត្រង់»។ នេះជាការអត្ថាធិប្បាយរបស់លោករដ្ឋមន្ត្រីការបរទេសកម្ពុជា។
លោក ហោ ណាំហុង មិនបានអនុញ្ញាតឲ្យមានសំណួរនៅពេលបញ្ចប់ការផ្ទៀងផ្ទាត់នោះទេ។ ក្រោយពីលោក ហោ ណាំហុង រិះគន់ថាគណបក្សនយោបាយញុះញង់ពលរដ្ឋក្នុងសំណុំរឿងព្រំដែននោះ លោក អ៊ូ ច័ន្ទរិទ្ធ តំណាងរាស្ត្រគណបក្សសង្គ្រោះជាតិដែលបានចូលរួមក្នុងពិធីផ្ទៀងផ្ទាត់ផែនទីដែរនោះ បានប្រាប់អ្នកកាសែតថា លោកមិនអាចទទួលយកបាននូវការអត្ថាធិប្បាយរបស់លោក ហោ ណាំហុងឡើយ ព្រោះការលូកដៃចូលក្នុងរឿងព្រំដែននេះ គឺគណបក្សលោកចង់ជួយដោះស្រាយបញ្ហាជាតិប៉ុណ្ណោះ ។ មន្ត្រីជាន់ខ្ពស់របស់គណបក្សសង្គ្រោះជាតិរូបនេះ បានបន្តថា លោកចង់ស្នើសុំឲ្យរដ្ឋាភិបាលអនុញាតឲ្យមានការថតចម្លងផែនទីនានាដែលត្រូវបានផ្ទៀងផ្ទាត់ ដើម្បីពួកគេធ្វើការផ្ទៀងផ្ទាត់ដោយខ្លួនឯងដែរ។ ៖«ទីបញ្ចប់ខ្ញុំឃើញថាមានការវាយប្រហារមកគណបក្សសង្រ្គោះជាតិថា យើងញុះញង់ប្រជាពលរដ្ឋគ្រប់បែបយ៉ាងនេះ ខ្ញុំមិនអាចទទួលយកបានទេ បញ្ហាជាតិជាបញ្ហារបស់ខ្មែរទាំងអស់ បញ្ហាទឹកដីមិនមែនជាបញ្ហារបស់បុគ្គលណាទេ ជាបញ្ហារបស់ខ្មែរ ដូច្នេះខ្ញុំមានការសោកស្ដាយណាស់»៕
© រក្សាសិទ្ធិដោយ thmeythmey.com