កីឡាជាតិ
ជាតិ
កីឡាករ ប្រាក់ មុន្នីឧត្តម សោកស្ដាយមិនបានជួយក្រុមជម្រើសជាតិកម្ពុជាដោយសារបញ្ហារបួស
× កីឡាករបាល់ទាត់កម្ពុជា លោក ប្រាក់ មុន្នីឧត្តម មានការសោកស្ដាយយ៉ាងខ្លាំង ដែលមិនបានចូលរួមជាមួយក្រុមកីឡាករជម្រើសជាតិកម្ពុជា ក្នុងការប្រកួតជាមួយក្រុមជម្រើសជប៉ុន ដែលប្រព្រឹត្តទៅនៅថ្ងៃទី០៣ កញ្ញា នេះ ដោយសារតែបញ្ហារបួស។
ក្នុងវីដេអូឃ្លីបជាង១នាទី ក្នុងបណ្ដាញហ្វេសបុកផ្ទាល់ខ្លួននោះ កីឡាករ ប្រាក់ មុន្នីឧត្តម បានបញ្ជាក់ថា បើទោះជាខ្លួននៅមានបញ្ហារបួស មិនបានចូលរួមប្រកួតក៏ដោយ តែរូបគេនៅតែគាំទ្រ និងជឿជាក់ថា ក្រុមជម្រើសកម្ពុជា នឹងអាចទទួលបានជ័យជំនះលើក្រុមជម្រើសជាតិជប៉ុន។
ក្រៅពីកីឡាករ ប្រាក់ មុន្នីឧត្តម ក៏មានកីឡាករហួយ ផល្លីន របស់ក្លិបស្វាយរៀង និង សារី ម៉ាត់ ណូរ៉ូទីន របស់ភ្នំពេញក្រោន សុទ្ធតែមិនអាចធ្វើដំណើរទៅប្រទេសជប៉ុនជាមួយមិត្តរួមជាតិបាននោះទេ ព្រោះមានបញ្ហារបួស។
មុនចេញទៅជប៉ុន ក្រុមកម្ពុជា បានប្រកួតមិត្តភាពអន្តរជាតិឈ្នះក្រុមជម្រើសជាតិនៃប្រទេសប៊ូតាន់ ដោយលទ្ធផល ២ ទល់ ០ មុនធ្វើដំណើរទៅហ្វឹកហាត់និងប្រកួតមិត្តភាពនៅប្រទេសថៃ។ ដល់ប្រទេសថៃ កម្ពុជា បានប្រកួតស្មើគ្នាជាមួយក្លិប Army United ក្នុងលីកកំពូលរបស់ថៃ ១ ទល់ ១ តែប្រកួតចាញ់ក្រុមជម្រើសជាតិឡាវ ដោយលទ្ធផល ២ ទល់១ ។
ចំណែកការប្រកួតចុងក្រោយ ៣ លើករបស់ក្រុមជម្រើសជាតិជប៉ុន បានប្រកួតចាញ់ ក្រុមកូរ៉េខាងជើង ២-១ ក្នុងវគ្គជុំផ្ដាច់ព្រ័ត្រនៃពានរង្វាន់បាល់ទាត់អាស៊ីបូព៌ា 2015 EAFF East Asian Cup កាលពីដើមខែសីហា កន្លងទៅ ហើយប្រកួតលើកទី២ ស្មើគ្នាជាមួយក្រុមកូរ៉េខាងត្បូង ១-១ និងចុងក្រោយបន្តស្មើប្រទេសចិន ដោយលទ្ធផល ១-១ ទៀត៕
ទស្សនាវីដេអូខាងក្រោម
© រក្សាសិទ្ធិដោយ thmeythmey.com