ប្រាសាទអង្គរវត្តទទួលបានភ្ញៀវទេសចរបរទេសបានជាង១លាន៤សែននាក់ ក្នុងរយៈពេល៨ខែ ឆ្នាំ២០១៥នេះ។ គោលដៅទេសចរណ៍លំដាប់ទី១របស់កម្ពុជា និងដ៏ល្អបំផុតក្នុងពិភពលោកមួយនេះ រកចំណូលបានជិត៤០លានដុល្លារ ពីការលក់សំបុត្រ ទៅឲ្យភ្ញៀវទេសចរបរទេសចូលទស្សនា។
នៅក្នុងរយៈពេល៨ខែឆ្នាំ២០១៥នេះ ប្រាសាទអង្គរវត្តទទួលបានភ្ញៀវទេសចរបរទេសបានចំនួន១,៤០៤,១០៧នាក់ កើនឡើងចំនួន១.៩២ភាគរយ ធៀបនឹងរយៈពេលដូចគ្នា ក្នុងឆ្នាំ២០១៤ ។ តួលេខនេះ បានបង្ហាញនៅក្នុងរបាយការណ៍ស្ថិតិភ្ញៀវទេសចររបស់អាជ្ញាធរអប្សរា។
ផ្អែកតាមរបាយការណដដែល ចំណូលពីការលក់សំបុត្រចូលទស្សនាប្រាសាទអង្គរវត្តក្នុងរយៈពេល៨ខែមានចំនួន៣៩,៨២៣,៩២០ដុល្លារ កើនឡើង០.០៣ភាគរយ ធៀបនឹងរយៈពេលដូចគ្នា ក្នុងឆ្នាំ២០១៤ ។
ចំនួនភ្ញៀវទេសចរបរទេសកើនឡើង១.៩២ភាគរយ ប៉ុន្តែកំណើនចំណូលមានចំនួនតិតជាង ពោលគឺកើន០.០៣ភាគរយ។ កំណើនចំណូលទាបជាងតួលេខកំណើនភ្ញៀវទេសចរនេះ ត្រូវបានលោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា បានពន្យល់ថា៖«ដោយសារភ្ញៀវបរទេសដែលមកទស្សនាប្រាសាទអង្គរវត្តភាគច្រើនទិញតែតម្លៃ សំបុត្រ២០ដុល្លារ ទើបធ្វើឲ្យចំណូលកើនទាបជាងបន្តិច»។
សំបុត្រចូលទស្សនាប្រាសាទអង្គរវត្តមានបីប្រភេទ និងតម្លៃផ្សេងគ្នា។ សំបុត្រតម្លៃ២០ដុល្លារ អាចអនុញាតឲ្យភ្ញៀវចូលទស្សនាប្រាសាទតែមួយថ្ងៃប៉ុណ្ណោះ សំបុត្រតម្លៃ៤០ដុល្លារគឺមានសុពលភាពរយៈពេល៣ថ្ងៃ និងតម្លៃ៦០ដុល្លារអាចឲ្យតភ្ញៀវចូលទស្សនាប្រាសាទបាន រយៈពេល១សប្តាហ៍។
ផ្អែកតាមសេចក្តីប្រកាសព័ត៌មានដដែល អាជ្ញាធរអប្សរាក៏បង្ហាញពីចំណូល និងចំនួនភ្ញៀវទេសចរបរទេសនៅក្នុងខែសីហាផងដែរ។ ក្នុងខែសីហា មានភ្ញៀវទេសចរបរទេសចំនួន១៦៥,២២១នាក់បានទិញសំបុត្រចូលមើលប្រាសាទអង្គរ កើន១.២៦ភាគរយធៀបនឹងខែសីហាឆ្នាំ២០១៤។ ដោយឡែកចំណូលពីការលក់សំបុត្រទៅឲ្យភ្ញៀវទេសចរណ៍បរទេសទាំងនេះមានចំនួន៤,៧៦៤,៧២០ដុល្លារ កើន០.៩៩ភាគរយ។
សូមបញ្ជាក់ថា កាលពីពេលថ្មីៗនេះ ក្រុមហ៊ុន Lonely Planet បានផ្តល់ចំណាត់ថ្នាក់ ចាត់ថ្នាក់ជាគោលដៅទេសចរណ៍ល្អដាច់គេក្នុងចំណោមគោលដៅចំនួន ៥០០កន្លែងនៅលើពិភពលោក។នេះជាមោទនភាពបំផុតរបស់ប្រទេសតូចតែសម្បូរនៅភូមិភាគអាស៊ីអាគ្នេយ៍មួយនេះ៕