ជាតិ
រដ្ឋាភិបាលគ្រោងរៀបចំប្រព័ន្ធផ្កាយរណបដើម្បីតាមដានស្ថានការណ៍ព្រំដែន
× លោកនាយករដ្ឋមន្ត្រី ហ៊ុន សែន បានចេញវិធានការថ្មីមួយ ដោយបញ្ជាឲ្យគណកម្មាធិការចម្រុះព្រំដែន និងសមត្ថកិច្ចពាក់ព័ន្ធរៀបចំប្រព័ន្ធផ្កាយរណប ដើម្បីតាមដាននិងពិនិត្យមើល តំបន់តាមខ្សែបន្ទាត់ព្រំដែនកម្ពុជាជាមួយប្រទេសជិតខាង។ ការបញ្ជារបស់ប្រមុខរដ្ឋាភិបាលធ្វើឡើង នៅក្នុងកិច្ចប្រជុំទីស្តីការគណៈរដ្ឋមន្ត្រី នាព្រឹកថ្ងៃទី០៤ ខែកញ្ញានេះ។
លោក ហ៊ុន សែន បញ្ជាឲ្យមានការរៀបចំប្រព័ន្ធផ្កាយរណបនេះ ក្នុងគោលបំណងដាក់ឲ្យប្រើប្រាស់ត្រួតពិនិត្យលើស្ថានភាពជាក់ស្ដែងនៅតាមតំបន់ព្រំដែនរវាងកម្ពុជា ជាមួយថៃ វៀតណាម និងឡាវជាដើម។ នេះបើតាមអ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន ដែលបានថ្លែងប្រាប់សារព័ត៌មានថ្មីៗ ថា ប្រមុខរដ្ឋាភិបាលក៏ចង់ធ្វើការត្រួតពិនិត្យឲ្យបានច្បាស់ លើវិស័យបរិស្ថាន ព្រៃឈើ ការបោះបង្គោលព្រំដែនថ្មី ការតាំងលំនៅឋាននៅតំបន់ព្រំដែន ដើម្បីរៀបចំការពារសនិ្តសុខឲ្យបានល្អ។
បើតាមលោក ផៃ ស៊ីផាន ការរៀបចំប្រព័ន្ធផ្កាយរណបនេះ រដ្ឋាភិបាលមិនទាន់កំណត់ពេលវេលានៅឡើយទេ ដោយអាស្រ័យលើគណៈកម្មាធិការចម្រុះព្រំដែន ជាអ្នករៀបចំ៕
© រក្សាសិទ្ធិដោយ thmeythmey.com