ជាតិ
នយោបាយជាតិ
អ្នកវិភាគថា CPP អាចនឹងមិនបានអាសនៈ៥០ ភាគរយបូក១ទេ នៅឆ្នាំ២០១៨
× អ្នកវិភាគនិយាយថា គណបក្សប្រជាជនកម្ពុជា អាចនឹងបាត់បង់កៅអីបន្ថែមទៀត ដោយមិនទទួលបានសំឡេងដល់ ៥០ ភាគរយ បូក១ ឡើយ សម្រាប់ការបោះឆ្នោតឆ្នាំ២០១៨ នៅអាណត្តិក្រោយនេះ។ អ្នកវិភាគទាំងនោះ សម្លឹងឃើញថា នៅពេលខាងមុខរដ្ឋាភិបាលចម្រុះ នឹងអាចកើតមានឡើង ដោយសារតែការបាត់បង់កៅអីខ្លះ ពីគណបក្សប្រជាជនកម្ពុជា។ តែអ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានជំនឿថា គណបក្សប្រជាជនកម្ពុជា កំពុងតែកើនប្រជាប្រិយភាពយ៉ាងខ្លាំង ហើយគណបក្សសង្គ្រោះជាតិទេ ដែលធ្លាក់ចុះប្រជាប្រិយភាពយ៉ាងគំហុក។
អ្នកវិភាគនយោបាយថ្មីរបស់កម្ពុជាពីររូបគឺ លោក សូ ចន្ថា និងលោក មាស នី សុទ្ធតែទាយថា គណបក្សប្រជាជនកម្ពុជាអាចនឹងទទួលបានអាសនៈច្រើនជាងគេនៅក្នុងការបោះឆ្នោតសកលឆ្នាំ ២០១៨ ខាងមុខ តែបក្សនេះ អាចនឹងមិនទទួលបានសំឡេង ៥០ ភាគរយបូក ១ នោះឡើយ។ អ្នកវិភាគនយោបាយ លោក សូ ចន្ថា ប្រមើលឃើញថា គណបក្សប្រជាជនកម្ពុជា នឹងអាចបាត់បង់កៅអីក្នុងរដ្ឋសភាបន្ថែមទៀត នៅពេលបោះឆ្នោតអាណត្តិទី៦ខាងមុខ។ លោក សូ ចន្ថា ក៏បានទស្សន៍ទាយទៀតថា គណបក្សប្រជាជនកម្ពុជាអាចនឹងមិនទទួលបានអាសនៈដល់៥០ ភាគរយបូក១ ដែលឈានទៅបង្កើតរដ្ឋាភិបាលបានតែឯងបានដូចបច្ចុប្បន្ននេះទេ ព្រោះលោកយល់ថា ការដឹកនាំរបស់រដ្ឋាភិបាល លោក ហ៊ុន សែន ក្នុងរយៈពេលជាង១ឆ្នាំក្រោយការបោះឆ្នោតឆ្នាំ២០១៣មកនេះ មិនទាន់ដោះស្រាយបញ្ហារបស់ប្រជាពលរដ្ឋបានច្រើនឡើយ ពោលគឺ ការសន្យាមានតែលើក្រដាស តែមិនមានការអនុវត្ត។
ថ្លែងប្រាប់សារព័ត៌មានថ្មីៗតាមទូរសព្ទ អ្នកវិភាគនយោបាយរូបនេះ ពន្យល់យ៉ាងដូច្នេះថា៖«រដ្ឋាភិបាលខិតខំកែទម្រង់គោលនយោបាយស៊ីជម្រៅ តែមិនមានប្រសិទ្ធភាពទេ ព្រោះស្ថានការណ៍ជាក់ស្ដែងបច្ចុប្បន្ននេះ មិនអាចដោះស្រាយបានបញ្ហាដីធ្លី យុវជនអត់ការងារធ្វើច្រើន អំពើពុករលួយ ហើយយកប្រព័ន្ធតុលាការគាបសង្កត់អ្នកទន់ខ្សោយនៅតែបន្ដ ដែលសុទ្ធតែជាចំណុចធ្វើឲ្យបាត់បង់កៅអីទៀត»។
មិនខុសពីលោក សូ ចន្ថា នោះទេ លោក មាស នី អ្នកវិភាគនយោបាយថ្មីដែរនោះ ក៏មើលមិនឃើញពីសមិទ្ធផលរបស់គណបក្សប្រជាជនកម្ពុជា នៅក្នុងអាណត្តិទី៥នេះឡើយ ក្រៅតែពីការប្រើពាក្យគំរាម និងបន្លាច ទៅលើគណបក្សប្រឆាំង និងប្រជាពលរដ្ឋ។ លោក មាស នី អះអាងថា ការប្រើពាក្យគំរាម និងបន្លាចនេះ គឺធ្វើឲ្យគណបក្សកាន់អំណាចមួយនេះ ធ្លាក់ចុះសំឡេងគាំទ្រកាន់តែខ្លាំងជាងនេះទៅវិញទេ បើសិនជានៅតែបន្ដប្រើពាក្យគំរាមទៀត។ អ្នកវិភាគរូបនេះ អត្ថាធិប្បាយយ៉ាងដូច្នេះថា៖ « ការប្រើពាក្យគំរាមនេះធ្វើឲ្យខូចឈ្មោះ ខាតសំឡេងឆ្នោតច្រើនទៅវិញទេ។ ព្រោះពីមុនគេខ្លាច តែឥឡូវប្រជាពលរដ្ឋចេះគិត ចេះវិភាគ ដូចនេះពួកគេបានយល់ពីការដឹកនាំ។ ហើយគណបក្សកាន់អំណាចអត់សូវចំណាយពេលចុះជួបប្រជាពលរដ្ឋទេ។ តែបើប្រជាពលរដ្ឋតវ៉ារឿងដីធ្លី ការពារព្រៃឈើ ចាប់អ្នកតវ៉ាដាក់គុកវិញ»។ លោក មាស នី ដែលបានមើលឃើញពីការធ្លាក់ប្រជាប្រិយភាពរបស់គណបក្សប្រជាជនកម្ពុជា បន្ថែមថា គណបក្សប្រជាជនកម្ពុជា កំពុងពឹងផ្អែកលើកម្លាំងស្នូល ដែលមានសកម្មជននយោបាយតែ ៣លាននាក់ប៉ុណ្ណោះ។ តែបើកម្លាំងស្នូលទាំងនេះងាកចេញពីគណបក្សនេះទៀតនោះ លោកថា គណបក្សប្រជាជនកម្ពុជា នឹងធ្លាក់ចុះប្រជាប្រិយភាពបន្ថែមទៀត។
ទាំងលោក សូ ចន្ថា និងលោក មាស នី បានរំពឹងទុកដូចគ្នាថា រដ្ឋាភិបាលចម្រុះនឹងអាចកើតមានឡើងនៅអាណត្តិទី៦ ដោយសារតែសម្លេងគាំទ្រគណបក្សប្រជាជនធ្លាក់ចុះបន្តទៀត ខណៈគណបក្សថ្មីៗបង្កើតឡើង។ ហើយភាពជាប់គាំងនយោបាយ ក៏នឹងអាចកើតឡើងដែរ។ កៅអីដែលបាត់ពីគណបក្សប្រជាជនកម្ពុជា នឹងបានទៅគណបក្សតូចៗទើបបង្កើត។ នេះជាការសន្និដ្ឋានទុករបស់លោកទាំងពីរ។
តែយ៉ាងណាអ្នកនាំពាក្យគណបក្សប្រជាជនកម្ពុជា លោក ឈឹម ផលវរុណ មានជំនឿថា គណបក្សប្រជាជនកម្ពុជា កំពុងតែកើនប្រជាប្រិយភាពយ៉ាងខ្លាំង ហើយគណបក្សសង្គ្រោះជាតិដែលជាដៃគូប្រកួតប្រជែងធំរបស់បក្សខ្លួន កាន់តែធ្លាក់ចុះប្រជាប្រិយភាពយ៉ាងគំហុក។ លោក ឈឹម ផលវរុណ បន្តថា ការបោះឆ្នោតនៅឆ្នាំ ២០១៨ ខាងមុខគណបក្សប្រជាជនកម្ពុជា នឹងឈ្នះម្តងទៀត ហើយគណបក្សសង្គ្រោះជាតិ នឹងធ្លាក់កៅអីមកសល់តែ ២០ កៅអីប៉ុណ្ណោះ ដោយគណបក្សប្រជាជនកម្ពុជា នឹងទទួលកៅអីបន្ថែមទៀតប្រមាណ ១៥ និងជាង ២០ កៅអីទៀត នឹងបានទៅគណបក្សតូចៗធ្លាប់គាំទ្រគណបក្សប្រឆាំង៕
Tag:
CPP
CNRP
អ្នកវិភាគ
បោះឆ្នោត
© រក្សាសិទ្ធិដោយ thmeythmey.com