សំបុត្រចូលទស្សនាអង្គរវត្តលក់បានជាង៤៣លានដុល្លារ ក្នុងរយៈពេល៩ខែ

ជាតិ

សេដ្ឋកិច្ច

សំបុត្រចូលទស្សនាអង្គរវត្តលក់បានជាង៤៣លានដុល្លារ ក្នុងរយៈពេល៩ខែ

02, Oct 2015 , 2:57 pm

រូបភាព

ដោយ: ខន ចំប៉ា

ក្នុងរយៈពេល៩ខែ ឆ្នាំ២០១៥នេះ ប្រាសាទអង្គរវត្តទទួលបានភ្ញៀវទេសចរបរទេសបានជាង១លាន៥សែននាក់។ គោលដៅទេសចរណ៍លំដាប់ទី១របស់កម្ពុជា និងដ៏ល្អបំផុតក្នុងពិភពលោកមួយនេះ រកចំណូលបានជាង៤៣លានដុល្លារអាមេរិក ពីការលក់សំបុត្រចូលទស្សនាប្រាសាទអង្គរទៅឲ្យភ្ញៀវទេសចរបរទេស។

រយៈពេល៩ខែឆ្នាំ២០១៥នេះ មានភ្ញៀវទេសចរបរទេស ចំនួន១,៥២៤,០៤៤នាក់ បានមកទស្សនាប្រាសាទអង្គរវត្ត ដែលជាគោលដៅទេសចរណ៍ដ៏ល្អបំផុតរបស់កម្ពុជា។ ចំនួននេះកើនឡើងចំនួន១.៨៥ភាគរយ បើធៀបនឹងរយៈពេលដូចគ្នា ក្នុងឆ្នាំ២០១៤។ ស្ថិតិភ្ញៀវទេសចរនៅតំបន់អង្គរត្រូវបាន បង្ហាញដោយអាជ្ញាធរជាតិអប្សរា។

ផ្អែកតាមស្ថិតិដដែលភ្ញៀវទេសចរជាង១លាន៥សែននាក់នោះ បាននាំចំណូល៤៣,៣០០,០៤០ដុ ល្លារ មកឲ្យកម្ពុជា។ ចំណូលពីការលក់សំបុត្រចូលទស្សនាប្រាសាទអង្គរនេះកើន ០.២៤ភាគរយ បើធៀបនឹងរយៈពេលដូចគ្នា ក្នុងឆ្នាំ២០១៤។

អាជ្ញាធរជាតិអប្សរា ក៏បានបង្ហាញពីចំណូល និងចំនួនភ្ញៀវទេសចរបរទេសដែលបានមកទស្សនាប្រាសាទអង្គរវត្ត នៅក្នុងខែកញ្ញាផងដែរ។ ក្នុងខែសីហាមានភ្ញៀវទេសចរបរទេសចំនួន១១៩,៩៣៧នាក់ បានទិញសំបុត្រចូលមើលប្រាសាទអង្គរ កើន១.២៦ភាគរយធៀបនឹងខែសីហាឆ្នាំ២០១៤ ។ ដោយឡែកចំណូលពីការលក់សំបុត្រ មានចំនួន ៣,៤៧៦,១២០ ដុល្លារ កើន០.៩៩ភាគរយ៕