អន្តរជាតិ
×![]()
ក្រោយមានការបាញ់សម្លាប់ជនជាតិជប៉ុនម្នាក់នៅប្រទេសបង់ក្លាដែសកាលពីម្សិលមិញ ក្រុមរដ្ឋឥស្លាមបានប្រកាសទទួលខុសត្រូវភ្លាមនិងគំរាមវាយប្រហារថែមទៀត។ គេមិនដឹងច្បាស់ទេថាក្រុមនេះពិតជាស្ថិតនៅពីក្រោយករណីសម្លាប់មនុស្សនេះ តែកន្លងមកគេលេចលឺថាក្រុមនេះពង្រីកបណ្តាញដល់អាស៊ីខាងត្បូងនិងអាស៊ីកណ្តាលដូចជា ឥណ្ឌា និងអាហ្វហ្កានីស្ថានជាដើម។
ស្តាប់សំឡេង
**audio2**
**audio2**
ក្រុមភេរវជនរដ្ឋឥស្លាមសាខាអាស៊ីខាងត្បូងបានចេញមុខទទួលខុសត្រូវចំពោះការបាញ់សម្លាប់ជនជាតិជប៉ុនម្នាក់នៅតំបន់ Rangpur នៅចម្ងាយ៣៣៥គីឡូម៉ែត្រពីរដ្ឋធានីដាកា (Dhaka) ប្រទេសបង់ក្លាដែស។ ជនជាតិជប៉ុនដែលស្លាប់នោះមានឈ្មោះ Kunio Hoshi វ័យ ៦៥ឆ្នាំ ហើយប៉ូលិសបានចាប់ឃុំខ្លួនមនុស្ស ៤អ្នកភ្លាមៗដែរ ក្រោយមានករណីឃាតកម្មនេះកើតឡើង។
យ៉ាងណាក៏ដោយ ខាងមន្ត្រីប៉ូលិសបន្តស្រាវជ្រាវនិងសាកសួរជនសង្ស័យទាំងនោះថា តើពួកគេមានបណ្តាញជាមួយក្រុមភេរវជនរដ្ឋឥស្លាមដែរឬយ៉ាងណា។ អាជ្ញាធរមិនទាន់ហ៊ានសន្និដ្ឋានថាវាជាទង្វើរក្រុមភេរវជនឬយ៉ាងណាទេ ព្រោះករណីវាយប្រហារលើអ្នកទេសចរកម្រកើតឡើងណាស់នៅលើទឹកដីបង់ក្លាដែសរយៈពេលជាច្រើនឆ្នាំមកហើយ។ តែរយៈពេលប៉ុន្មានខែកន្លងមកនេះ ហិង្សាប្រដាប់អាវុធក្រុមឥស្លាមកើនឡើងគួរឲ្យកត់សម្គាល់។
ដោយឡែកជុំវិញការប្រកាសទទួលខុសត្រូវ ក្រុមរដ្ឋឥស្លាមកាលពីម្សិលមិញ បានប្រើប្រាស់ប្រព័ន្ធទំនាក់ទំនងសង្គម Twitter បកស្រាយពីសកម្មភាពឧក្រិដ្ឋកម្មរបស់ខ្លួនដោយសម្លាប់ជនជាតិជប៉ុនខាងលើ។
ក្រៅពីចេញមុខទទួលខុសត្រួវ ពួកគេក៏ផ្ញើរសារព្រមាន ថានឹងវាយប្រហារលើអ្នកទេសចរកាន់តែខ្លាំងជាងមុននៅពេលខាងមុខផងដែរ។ ក្រុមនេះថា៖« ចាប់ពីពេលនេះតទៅវានឹងមានចលនាវាយប្រហារលើជនជាតិនៃក្រុមប្រទេសដែលចូលរួមក្នុងសម្ព័ន្ធអន្តរជាតិប្រឆាំងក្រុមរដ្ឋឥស្លាម។ ពួកគេនឹងមិនមានសុវត្ថិភាពឬគ្មានជីវិតរស់នៅទេកាលណាគេនៅលើទឹកដីឥស្លាម»។
បើតាមការបញ្ជាក់របស់អាជ្ញាធរបង់ក្លាដែស កាលពីប៉ុន្មានថ្ងៃមុន ក្រុមនេះក៏បានប្រកាសថាខ្លួននៅពីក្រោយករណីឃាតកម្មជនជាតិអ៊ីតាលីម្នាក់ដែរនៅបង់ក្លាដែរ។
វាជាអាចរឿងពិតដែលករណីសម្លាប់អ្នកទេសចរបរទេសនៅបង់ក្លាដែសពិតជាអំពើរបស់ក្រុមជ្រុលនិយមរដ្ឋឥស្លាម។ ប្រហែលជា៥ ទៅ៦ខែមុន ក្រុមនេះបានប្រកាសបង្កើតសាខាខ្លួនប្រចាំតំបន់អាស៊ីខាងត្បូង និងអាស៊ីកណ្តាល ក្នុងនោះមានប្រទេសឥណ្ឌានិងអាហ្វហ្កានីស្ថាន។
ក្រុមនេះមានបណ្តាខ្លួនរួចទៅហើយនៅអាហ្វហ្កានីស្ថាន ហើយពួកគេកំពុងធ្វើព្យុះភ្លៀងគំរាមកំហែងប្រជាជនស្លូតត្រង់ដែលកំពុងរងទុក្ខព្រោះក្រុមតាលីបង់ស្រាប់នោះ។
យ៉ាងណាក៏ដោយ ក្រោយបានទទួលសារព្រមានពីក្រុមភេរវជន អាជ្ញាធរបង់ក្លាដែស បានប្រកាសរឹតបន្តឹងសន្តិសុខ ដើម្បីទប់ស្កាត់បញ្ហានេះ។ ទាក់ទិននឹងបញ្ហានេះផងដែរ ស្ថានទូតបរទេសមានជប៉ុននិងកូរ៉េជាដើមដែលស្ថិតនៅបង់ក្លាដែសបានចេញសេចក្តីជូនដំណឹងដល់អ្នកការទូត និងប្រជាជនខ្លួននៅបង់ក្លាដែសឲ្យប្រុងប្រយ័ត្នដូចគ្នា៕
© រក្សាសិទ្ធិដោយ thmeythmey.com
