ជាតិ
នយោបាយជាតិ
សំបុកឃ្មុំចាប់ផ្តើមទាស់ទែងគ្នា ដោយអនុប្រធានត្រៀមប្តឹងឲ្យផ្អាកដំណើរការគណបក្ស
លោក ម៉ម សូណង់ដូ និងលោក ហ៊ាង រិទ្ធី ដែលកំពុងមានទំនាស់គ្នា
×![]()
អនុប្រធានគណបក្សសំបុកឃ្មុំសង្គមប្រជាធិបតេយ្យ លោក ហ៊ាង រិទ្ធី ត្រៀមដាក់ពាក្យបណ្ដឹងទៅតុលាការសុំឲ្យផ្អាកដំណើរការគណបក្សខ្លួន។ ការត្រៀមដាក់ពាក្យបណ្ដឹងធ្វើឡើងក្រោយពីលោក ហ៊ាង រិទ្ធី និងលោក ម៉ម សូណង់ដូ មានបញ្ហាជម្លោះផ្ទៃក្នុងបក្សជាមួយគ្នា។ ជាការឆ្លើយតប លោក ម៉ម សូណង់ដូ បញ្ជាក់ថា លោកស្វាគមន៍ចំពោះពាក្យបណ្ដឹងនោះ ហើយលោកត្រៀមខ្លួនរួចជាស្រេចហើយ ដើម្បីចូលខ្លួនបកស្រាយពីបញ្ហាផ្ទៃក្នុងបក្សទៅតុលាការ។
ក្រោយពីធ្វើសមាជមិនទាន់បានមួយខែផង គណបក្សសំបុកឃ្មុំសង្គមប្រជាធិបតេយ្យ កំពុងមានបញ្ហារង្គោះរង្គើទំនាស់ផ្ទៃក្នុងបក្សយ៉ាងខ្លាំង រហូតឈានដល់ការត្រៀមប្ដឹងផ្ដល់គ្នាបិទគណបក្សទៀតផង។ អនុប្រធានគណបក្សសំបុកឃ្មុំសង្គមប្រជាធិបតេយ្យ លោក ហ៊ាង រិទ្ធី ដែលមានទំនាស់ផ្ទៃក្នុងជាមួយលោក ម៉ម សូណង់ដូ ប្រធានគណបក្សនេះ នឹងដាក់ពាក្យបណ្ដឹងទៅតុលាការដំបូងរាជធានីភ្នំពេញនៅក្នុងសប្ដាហ៍នេះ ដើម្បីទាមទារឲ្យបិទដំណើការគណបក្សខ្លួន។
លោក ហ៊ាង រិទ្ធី បានបន្ថែមថា មកដល់ពេលនេះលោកមិនបានធ្វើការជាមួយលោក ម៉ម សូណង់ដូ ទៀតនោះទេ ក្រោយពីលោក ម៉ម សូណង់ដូ ប្រើពាក្យបណ្ដេញលោក និងសមាជិកមួយចំនួនទៀត ចេញពីគណបក្ស កាលពីសប្ដាហ៍មុន ។
ថ្លែងប្រាប់សារព័ត៌មានថ្មីៗ នៅថ្ងៃចន្ទនេះអនុប្រធានគណបក្សរូបនេះ បានបញ្ជាក់យ៉ាងដូច្នេះថា«ខ្ញុំនឹងដាក់ពាក្យបណ្ដឹងទៅតុលាការឲ្យផ្អាកដំណើរគណបក្សសំបុកឃ្មុំសង្គមប្រជាធិបតេយ្យ យ៉ាងយូមិនឲ្យលើសសប្ដាហ៍នេះទេ។ ហើយខ្ញុំនឹងបកស្បែកមុខលោក ម៉ម សូណង់ដូ ដែលពាក់មុខប្រជាធិបតេយ្យក្លែងក្លាយ។ ខ្ញុំនឹងតស៊ូមតិរកយុត្តិធម៌សម្រាប់ពួកខ្ញុំ៣នាក់ និងសមាជិក សមាជិកាមួយចំនួនទៀត ដែលត្រូវបានលោក ម៉ម សូណង់ដូ ប្រើពាក្យដកចេញពីគណបក្ស»។
ពាក់ព័ន្ធនឹងការត្រៀមប្ដឹងនេះ ប្រធានគណបក្សសំបុកឃ្មុំសង្គមប្រជាធិបតេយ្យ លោក ម៉ម សូណង់ដូ បញ្ជាក់ថា លោកត្រៀមខ្លួនរួចជាស្រេចហើយ ដើម្បីចូលខ្លួនបកស្រាយពីបញ្ហាផ្ទៃក្នុងបក្សទៅតុលាការ ហើយលោកក៏ស្វាគមន៍ចំពោះពាក្យបណ្ដឹងនានា ពីលោក ហ៊ាង រិទ្ធី ដែរ។ «ខ្ញុំអត់មានបញ្ហានោះទេ បើគាត់មានសិទ្ធិប្ដឹងឲ្យពួកគាត់ប្ដឹងទៅ។ ខ្ញុំសប្បាយចិត្តជម្រាបព័ត៌មានទៅតុលាការ ហើយខ្ញុំស្វាគមន៍ឲ្យរឿងនេះផ្ទុះឡើង ដើម្បីឲ្យសាធារណៈជន បានដឹងគ្រប់គ្នា »។ នេះជាការអះអាងរបស់លោក ម៉ម សូណង់ដូ ដែលបានហៅលោក ហ៊ាង រិទ្ធី ថា «អ្នកចេះច្បាប់តែបែជារំលោភបំពានច្បាប់» មុននឹងលោកបន្ថែមថា ទំនាស់ដែលឈានដល់ការត្រៀមប្ដឹងបិទដំណើរការគណបក្សនេះ កើតឡើងក្រោយពីអនុប្រធានបក្សទាំងពីររូបគឺលោក ហ៊ាង រិទ្ធី និងលោក ហារី សំអាត មានទំនាស់ផ្ទៃក្នុងបក្សជាមួយគ្នា ទើបបង្កឲ្យមានបញ្ហារង្គោះរង្គើរហូតដល់មានការត្រៀមប្ដឹងបិទគណបក្សនេះ។
ប្រធានគណបក្សរូបនេះ បញ្ជាក់ថា៖«លោក ហ៊ាង រិទ្ធី បានយករឿងលោក ហារី សំអាត ដែលមានបំណងដឹកនាំសមាជិកបក្សចូលរួមជាមួយគណបក្សដទៃទៀតនោះ ទៅប្រាប់សារព័ត៌មានដទៃទៀត ថាបណ្ដេញលោក ហារី សំអាត ចេញពីបក្ស ជំនួសខ្ញុំដែលជាប្រធានគណបក្ស។ ហើយខ្ញុំជាមនុស្សចាស់មួយរូប ខ្ញុំត្រូវរកហេតុផល ត្រូវគិតឲ្យបានច្បាស់សិន មុននឹងសម្រេចចិត្តដកលោក ហារី សំអាត តែលោក ហ៊ាង រិទ្ធី ប្រាប់សារព័ត៌មានថា លោក ហារី សំអាត ត្រូវដកចេញពីបក្ស»។
តែយ៉ាងណាលោក ហ៊ាង រិទ្ធី បានច្រានចោលការលើកឡើងរបស់លោក ម៉ម សូណង់ដូ។ លោក ហ៊ាង រិទ្ធី បដិសេធថា លោកមិនដែលមានទំនាស់ជាមួយលោក ហារី សំអាត នោះឡើយ ។ ហើយការសម្រេចដកលោក ហារី សំអាត នេះ គឺត្រូវបានគណៈកម្មការពិន័យអនុម័តដកចេញពីបក្ស ដូច្នេះលោកគ្រាន់តែបកស្រាយតាមការអនុម័តប៉ុណ្ណោះ។
អនុប្រធានគណបក្សរូបនេះ ក៏ចោទប្រកាន់លោក ម៉ម សូណង់ដូ វិញថា ជាអ្នកដឹកនាំមិនត្រឹមត្រូវ ដោយកាន់ជើងលោក ហារី សំអាត អនុប្រធានគណបក្សម្នាក់ទៀត ដែលបានធ្វើខុសពីលក្ខន្ដិកៈគោលការណ៍គណបក្ស។
គួរបញ្ជាក់ថា បញ្ហាផ្ទៃក្នុងគណបក្សសំបុកឃ្មុំសង្គមប្រជាធិបតេយ្យ ដែលកំពុងរង្គោះរង្គើនៅពេលនេះ កើតឡើងក្រោយពីអនុប្រធានគណបក្សនេះ គឺលោក ហារី សំអាត បានដឹកនាំមន្ត្រី និងសកម្មជនបក្ស មានបំណងចូលរួមជាមួយគណបក្សថ្មីមួយទៀត ដែលត្រូវបានគណៈកម្មការពិន័យអនុម័តដកចេញពីបក្ស តែប្រធានគណបក្សលោក ម៉ម សូណង់ដូ មិនទាន់សម្រេចដកចេញ។
គណបក្សសំបុកឃ្មុំសង្គមប្រជាធិបតេយ្យ ទើបតែរៀបចំរចនាសម្ព័ន្ធឡើងវិញ កាលថ្ងៃទី ៩ ខែ កញ្ញា ដោយលោក ម៉ម សូណង់ដូ ធ្វើជាប្រធានបក្ស និងអនុប្រធានបក្សពីររូបទៀត គឺលោកបណ្ឌិត ហ៊ាង រិទ្ធី អ្នកវិភាគស្ថានការណ៍នយោបាយ និងលោក ហារី សំអាត តែមិនបែងចែកអនុប្រធានទី ១ និងទី ២ ឡើយ៕
Tag:
គណបក្សសំបុកឃ្មុំ
© រក្សាសិទ្ធិដោយ thmeythmey.com
