ជាតិ
កំណត់ហេតុស្តីពីចម្លាក់ព្រះវិស្ណុ ហៅអ្នកតារាជ នៅប្រាសាទអង្គរ
×
ជុំវិញរូបសំណាក់តំណាងឲ្យ ព្រះវិស្ណុនៅប្រាសាទ អង្គរវត្ត មានសំនួរមួយចំនួន បានលើកឡើងថា តើហេតុដូចម្តេចបានជាពីមុន (មុនឆ្នាំ ១៩៩៣) ចម្លាក់ខាងលើនេះ គ្មានព្រះកេស ? ហើយបន្ទាប់មកមាន ព្រះកេស ជាស៊ីម៉ងត៍ទៅ វិញ? ហើតើព្រះកេសដែលភ្ជាប់សព្វថ្ងៃនេះ វាមានលំនាំដូចសម័យដើមទេ? មួយ វិញទៀត ហេតុដូចម្តេចបានជាអ្នកស្រុក ហៅរូបចម្លាក់នេះថាជា អ្នកតារាជទៅវិញ?
ជាបឋមត្រូវជ្រាបថា ហេតុដែលចម្លាក់នេះគ្មានព្រះកេសក៏ដោយសារត្រូវជនទុចរិតកាត់ផ្តាច់ចេញ ពីដងខ្លួនមុនឆ្នាំ ១៩៩០ ហើយបន្ទាប់ពីឆ្នាំ ១៩៩៣ ត្រូវប្រធានអភិរក្សដ្ឋានអង្គរ លោក អួង វន យកទៅត ឡើងវិញ។ តែក្នុងពេលនោះពុំបានយក ព្រះកេសពិតទេ។ ទង្វើនេះ វាមិនសមស្រប និង ច្បាប់ការអភិរក្ស បេតិកភ័ណ្ឌក៏មែនពិត ក៏ប៉ុន្តែយ៉ាងហោចណាស់វាអាចលំអទិដ្ឋភាពទូទៅនៃរូបនេះដែរ ។
គួររំឭកថា ទង្វើនះក៏ជាការបង្ហាញមួយ ដ៏មានប្រសិទ្ធិភាព ព្រោះហេតុថា ដើម្បីការពារ និង អំពើចោរ កម្មផងដែរ ។ កុំភ្លេចថា នាជំនាន់នោះ រាល់ចម្លាក់បុរាណក្នុងតំបន់សៀមរាបអង្គរ ត្រូវគេកាត់ព្រះកេសទាំង អស់ លើកលែងតែចម្លាក់នៅក្នុង អភិរក្សដ្ឋានសៀមរាប ។ ហើយមួយវិញទៀត នៅឆ្នាំ ១៩៩៣ សូម្បីតែអភិរក្សដ្ឋានក៏ត្រូវក្រុមចោរប្រដាប់អាវុធមកប្លន់ដែរ ។
ការបន្តការ អភិរក្ស បេតិកភ័ណ្ឌជាតិ ដោយរាជរដ្ឋាភិបាល ក៏ត្រូវបានធ្វើឡើង តាមរយៈការដឹកជញ្ជូន វត្ថុបុរាណមួយចំនួនធំពីអភិរក្សដ្ឋាន សៀមរាប ទៅសារមន្ទីរជាតិ ភ្នំពេញ ជាបណ្តោះអាសន្នដែរ ។ ប្រសិនបើ មិនធ្វើដូច្នោះ ចម្លាក់សំខាន់ៗនឹងបាត់បង់អស់ ដោយហេតុថា ស្ថានភាពប្រទេសកម្ពុជានាជំនាន់នោះ ពុំ ទាន់មានស្ថេរភាពដូចសព្វថ្ងៃនេះទេ។
ខាងលើនេះគឺជាទស្សនៈវែងឆ្ងាយរបស់លោក វណ្ណ ម៉ូលីវណ្ណ ដែលជាទេសរដ្ឋមន្ត្រីនៃឧត្តមប្រឹក្សា វប្បធម៌ជាតិ ដែលមានរូបខ្ញុំ និងលោក ជុច ភឿ ជាអ្នកដឹកនាំការជ្រើសរើសចំនួនចម្លាក់ធ្វើបញ្ជី និងដឹក ជញ្ជូនតាមយន្តហោះទៅកាន់សារមន្ទីរជាតិភ្នំពេញ ។ ម្ល៉ោះហើយ តាមរយៈការផ្លាស់ប្តូរទីតាំងនៃសម្បត្តិ វប្បធម៌ជាតិសំខាន់ៗទាំងនោះ ព្រះកេសព្រះវិស្ណុដ៏ធំមួយ ហៅថាអ្នកតារាជនោះត្រូវបានរក្សាទុកនៅសារ មន្ទីរជាតិភ្នំរហូតដល់ឆ្នាំ ២០០៣ ។
ការដឹកជញ្ជូន វត្ថុបុរាណ ពីសារមន្ទីរជាតិ រាជធានីភ្នំពេញ វិលទៅទុកនៅកន្លែងដើម នៅប្រាសាទអង្គរ វត្ត ដែលជាព្រះកេសព្រះវិស្ណុពិតប្រាកដពីបុរាណនោះ បានធ្វើក្នុងឆ្នាំបន្ទាប់ ដែលនេះចាត់ទុក ជាការដឹកវត្ថុបុរាណជាជំនឿរបស់ប្រជាពលរដ្ឋចេញពី សារមន្ទីរជាតិលើកទី១ ចាប់តាំងពី ទសវត្សរ៍ ឆ្នាំ ១៩៩០មក។ ការដឹកជញ្ជូនព្រះកេសព្រះវិស្ណុបុរាណពីសារមន្ទីរជាតិ ទៅទុកនៅប្រាសាទអង្គរវត្តវិញនេះគឺ ធ្វើឡើងតាមសំណើររបស់លោកប្រធានអាជ្ញាធរអប្សរា យោងតាមសេចក្តីត្រូវការ ទទូចអង្វររបស់អ្នកស្រុក នៅខេត្តសៀមរាប។
សំណើរខាងលើ ត្រូវបានសម្តេច ព្រះរាមនរោត្តមបុប្ផាទេវី រដ្ឋមន្ត្រីក្រសួងវប្បធម៌ និង វិចិត្រសិល្បៈ បានសម្រេចព្រះទ័យអនុញ្ញាតឲ្យដឹកព្រះកេសព្រះវិស្ណុ ហៅតារាជនោះ ដើម្បីយកទៅតភ្ជាប់នឹងដងខ្លួននៃ ព្រះវិស្ណុ នៅប្រាសាទអង្គរវត្តវិញហើយ ។
នៅក្នុងក្រសែភ្នែកនិងចិត្ដរបស់ពុទ្ធសាសនិកជន ខេត្តសៀមរាបសព្វថ្ងៃនេះ បានមើលឃើញ និង គិតថាសេចក្តីសុខរបស់ពួកគេក៏ដោយសារតែព្រះកេសត្រូវបានតភ្ជាប់ដងខ្លួនរបស់ព្រះវិស្ណុវិញ៕
ដោយ បណ្ឌិត មីសែល ត្រាណេ
ដកស្រង់ចេញពីគេហទំព័រ www.khemaravidya.com
© រក្សាសិទ្ធិដោយ thmeythmey.com