ជាតិ
នាយករដ្ឋមន្ត្រីស្នើឲ្យក្រុមហ៊ុនប្រេងកុំដំឡើងថ្លៃក្រោយបុណ្យភ្ជុំបិណ្ឌ
×![]()
ភ្នំពេញ៖ លោកនាយករដ្ឋមន្ត្រី ហ៊ុន សែន ស្នើឲ្យក្រុមហ៊ុនប្រេងក្នុងប្រទេសកម្ពុជា កុំដំឡើងថ្លៃ ក្រោយពីក្រុមហ៊ុនប្រេងឥន្ធនៈ បានសម្រេចចុះថ្លៃប្រេងឥន្ធនៈ ១០០ រៀលក្នុងមួយលីត្រ ចាប់ពីថ្ងៃទី៩ ដល់ទី១៥ ខែតុលា ឆ្នាំ២០១៥ ដើម្បីជាការចូលរួមអបអរពិធីបុណ្យភ្ជុំបិណ្ឌ។ លោកនាយករដ្ឋមន្ត្រីបានថ្លែងបែបនេះ ក្នុងពិធីចែកសញ្ញាបត្រដល់និស្សិតសាកលវិទ្យាល័យវេស្ទើន កាលពីព្រឹកថ្ងៃទី១៩ ខែតុលា នៅវិទ្យាស្ថានជាតិអប់រំ។
ស្តាប់សំឡេង
ស្តាប់សំឡេង
លោកនាយករដ្ឋមន្ត្រី ហ៊ុន សែន គ្រោងជួបពិភាក្សាពីតម្លៃប្រេងឥន្ធនៈផ្ទាល់ ជាមួយតំណាងក្រុមហ៊ុនប្រេងឥន្ធនៈទាំងអស់នៅកម្ពុជា ដើម្បីធានាមិនឲ្យតម្លៃប្រេងសាំងឡើងថ្លៃបន្តទៀត។ លោកមានបំណងឲ្យក្រុមហ៊ុនប្រេងសាំងទាំងនោះ រក្សាតម្លៃដដែលដូចរដូវបុណ្យភ្ជុំ ឬអាចចុះថ្លៃបន្តទៀត។ លោកថា៖«ចុះហើយកុំឡើងវិញ តិចទៅចុះ១០០(រៀល) ឡើង៣០០រៀល ក្រោយភ្ជុំ កុំណាស់ ហើយផ្តាំផ្ញើទៅអ្នកលក់សាំងទាំងឡាយអើយ បើមិនបានចុះបន្តទេ អាណិតសុំកុំឡើង»។
ក្នុងឱកាសនោះ លោកនាយករដ្ឋមន្ត្រីក៏បានរិះគន់ក្រុមហ៊ុនប្រេងឥន្ធនៈទាំងឡាយ ណាដែល ដំឡើងថ្លៃប្រេងឥន្ធនៈលឿន និងចុះថ្លៃយឺត នៅពេលតម្លៃប្រេងលើទីផ្សារអន្តរជាតិមានការប្រែប្រួល។
ទាក់ទិននឹងបញ្ហានេះ នាយកប្រតិបត្តិនៃមជ្ឈមណ្ឌលប្រជាពលរដ្ឋដើម្បីអភិវឌ្ឈន៍និងសន្តិភាព លោក យ៉ង គឹមអេង មានប្រសាសន៏ថា ការដំឡើងតម្លៃ និងចុះថ្លៃប្រេងសាំងនៅកម្ពុជា គឺតែងតែកើតឡើងជារឿងធម្មតា ទៅតាមការសម្រេចរបស់ម្ចាស់ក្រុមហ៊ុន ដូចនេះលោកអះអាងថា វានឹងធ្វើឲ្យប៉ះពាល់ដល់ ជីវភាពរបស់ប្រជាជន។ លោកអំពាវនាវឲ្យថ្នាក់ដឹកនាំនយោបាយ បន្ដពិភាក្សាដោះស្រាយបញ្ហាជាមួយគ្នា ដើម្បីជៀសវាងកុំឲ្យក្រុមហ៊ុនប្រេងដំឡើងថ្លៃតាមចិត្តចង់ទៀត។ «រដ្ឋគួរមានឧបត្ថម្ភធនបម្រុងទុកថ្លៃប្រេងសាំង ពេលកើនតម្លៃលើទីផ្សារអន្តរជាតិ និងគួរបន្តពិភាក្សាជាមួយម្ចាស់ក្រុមហ៊ុនប្រេងទាំងអស់ ដើម្បីរកចំណុចកណ្តាលវិជ្ជមានមួយរវាងក្រុមហ៊ុន និងប្រជាជន»។ នេះជាការបញ្ជាក់របស់លោក យ៉ង់ គឹមអេង។
គួរបញ្ជាក់ថា កម្ពុជាមានក្រុមហ៊ុនផ្គត់ផ្គង់ប្រេងសាំង ដូចជា ក្រុមហ៊ុនតេលា សូគីមិច សាវីមិច ប៊ីវីអឹម(BVM) និង LHR ។ ចំណែកក្រុមហ៊ុនប្រេងសាំងបរទេស រួមមាន ក្រុមហ៊ុនតូតាល់ របស់ប្រទេសបារាំង កាល់តិចរបស់អាមេរិក និងក្រុមហ៊ុន PTT របស់ថៃ៕
កាលពីថ្ងៃទី៨ ខែតុលា ឆ្នាំ២០១៥ រដ្ឋមន្ត្រីក្រសួងពាណិជ្ជកម្ម លោក ស៊ុន ចាន់ថុល បានអះអាងថា រដ្ឋាភិបាលកំពុងរៀបចំកំណត់រូបមន្តតម្លៃប្រេងឥន្ធនៈមួយ ដើម្បីធានាថា ក្រុមហ៊ុនប្រេងទាំងអស់នឹងលក់ទៅតាមតម្លៃមួយដែលសមស្រប នឹងទីផ្សារអន្តរជាតិនិងមិនចំណេញហួសហេតុ។ រួចហើយ ក្រសួងពាក់ព័ន្ធនឹងធ្វើរបាយការណ៍ជូនលោកនាយករដ្ឋមន្ត្រី ហ៊ុន សែន ដើម្បីសម្រេចចេញជាប្រកាស ឬអនុក្រឹត្យថ្លៃប្រេងសាំង៕
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
