ជាតិ
លោក សុះ ម៉ាច ស្នើឲ្យបញ្ឈប់ផ្សព្វផ្សាយព័ត៌មានមិនពិតពីមរណភាពលោកតា ប្រាជ្ញ ឈួន
×![]()
ដោយ: ខន ចំប៉ា
លោក សុះ ម៉ាច ប្រធានសមាគមសិល្បករខ្មែរបានចេញមុខបដិសេធព័ត៌មានដែលថា លោកតា ប្រាជ្ញ ឈួន បានទទួលមរណភាព។ ព័ត៌មានពីមរណភាពរបស់សិល្បៈករចាប៉ីដងវែងវ័យ៧៩ឆ្នាំរូបនេះ ត្រូវបានអ្នកប្រើប្រាស់បណ្តាញសង្គមហ្វេកប៊ុក បង្ហោះ និងចែករំលែកបន្តគ្នា កាលពីយប់ថ្ងៃចន្ទ។
ប្រធានសមាគមសិល្បករខ្មែរ លោក សុះ ម៉ាច មិនសប្បាយចិត្តនោះឡើយ នៅពេលដែលលោកឃើញអ្នកប្រើប្រាស់បណ្តាញសង្គមហ្វេសប៊ុកបានចែករំលែកនូវដំណឹងនៃមរណភាពរបស់លោក ប្រាជ្ញ ឈួន ទាំងសិល្បករចាប៉ីដងវែងរូបនេះនៅមានជីវិត។ លោក សុះ ម៉ាច ដែលបានទាក់ទងទៅកូនប្រុសរបស់ លោក ប្រាជ្ញ ឈួន ផ្ទាល់ផងនោះ បានអះអាងប្រាប់សារព័ត៌មានថ្មីៗយ៉ាងនេះថា៖«ខ្ញុំហួសចិត្តនៅពេលឮដំណឹងនេះ។ ពេលនេះលោកតាប្រាជ្ញ ឈួន មានសុខភាពល្អធម្មតា ហើយកូនប្រុសរបស់គាត់បានដឹកទៅសុំសីលនៅវត្តឯស្រុកកំណើត»។
ប្រធានសមាគមសិល្បករខ្មែររូបនេះ បានចាត់ទុកការផ្សព្វផ្សាយនេះថា ជាការប្រមាថជីវិតរបស់លោកតា ប្រាជ្ញ ឈួន យ៉ាងធ្ងន់ធ្ងរ ខណៈដែលគាត់កំពុងមានជីវិតរស់នៅឡើយ ហើយថែមទាំងធ្វើឲ្យសាធារណជនមានការយល់ច្រឡំចំពោះរឿងនេះ។ លោក ក៏បានស្នើឲ្យអ្នកផ្សព្វផ្សាយទាំងនោះ បញ្ឈប់ជាបន្ទាន់នូវរាល់ការផ្សព្វផ្សាយព័ត៌មានមិនពិតទាក់ទងនឹងជីវិតរបស់សិល្បករ ជាពិសេសគឺសិល្បករដ៏ល្បីល្បាញ គឺលោក ប្រាជ្ញ ឈួន នេះតែម្តង។
សូមរម្លឹកថា នេះមិនមែនជាលើកទី១ទេ ដែលព័ត៌មានមិនពិត ពីមរណភាពរបស់លោកព្រឹទ្ធាចារ្យ ប្រាជ្ញ ឈួន ទទួលមរណភាព។ កាលពីចុងឆ្នាំ២០១៤ កន្លងទៅព័ត៌មាននៃមរណភាពរបស់សិល្បករចាប៉ីដងវែងដែលកើតនៅភូមិត្រពាំងកក់ ឃុំខ្វាវ ស្រុកទ្រាំង ខេត្តតាកែវ រូបនេះ ក៏ធ្លាប់បានផ្សព្វផ្សាយពាសពេញក្នុងបណ្តាញសង្គមហ្វេកប៊ុក ហើយត្រូវបានក្រុមគ្រួសារ និងប្រធានសមាគមសិល្បករខ្មែរធ្លាប់បដិសេធភ្លាមៗផងដែរ៕
Tag:
សុះ ម៉ាច
ប្រាជ្ញ ឈួន
© រក្សាសិទ្ធិដោយ thmeythmey.com
