ជាតិ
មរតកផ្លូវបុរាណ អង្គរ-ភិមាយនឹងត្រូវធ្វើបទបង្ហាញដោយអ្នកស្រាវជ្រាវខ្មែរនិងថៃ បណ្តាញផ្លូវបុរាណ ដែលតភា្ជប់ពីចក្រភពអង្គរទៅក្រុងភិមាយប្រទេសថៃសព្វថ្ងៃ មានចម្ងាយ២៥០គម។ អ្នកស្រាវជ្រាវកម្ពុជា និងថៃ បានចំណាយពេលជាង១០ឆ្នាំ ដើម្បីសិក្សាស្រាវជ្រាវលើបណ្តាញផ្លូវបុរាណដ៏សំខាន់មួយនេះ ដែលបានបន្តប្រើប្រាស់តាំងពីបុរាណ រហូតទល់នឹងបច្ចុប្បន្ន។ មរតកបុរាណដែលបានបន្សល់ទុក ត្រូវបានអ្នកស្រាវជ្រាវរកឃើញ និងធ្វើការចងក្រងទុកជាឯកសារប្រវត្តិសាស្ត្រដ៏មានតម្លៃ សម្រាប់សាធារណជនទូទៅធ្វើការស្វែងយល់ និងបន្តថែរក្សាទុកជាសម្បត្តិបេតិកភណ្ឌមនុស្សជាតិគ្រប់ជំនាន់។
ប្រធានក្រុមស្រាវជ្រាវផ្លូវបុរាណរបស់អាជ្ញាធរជាតិអប្សរា លោក អ៊ឹម សុខរិទ្ធី បានបញ្ជាក់ថា តាមរយៈការស្រាវជ្រាវរួមគ្នារវាងកម្ពុជា និងថៃ ទៅលើបណ្តាញផ្លូវបុរាណមួយនេះ យើងទទួលបាននូវព័ត៌មានជាច្រើន ហើយបានកត់ទុកដូចជា ទំនៀមទម្លាប់ ទីក្រុង សហគមន៍មនុស្ស សាលាសំណាក់ មន្ទីរពេទ្យ រោងឧស្សាហកម្ម និងស្ថានីយ៍បុរាណរាប់រយកន្លែងបុរាណផ្សេងទៀត។ ជាពិសេស មរតកបេតិកភណ្ឌអរូបីមួយចំនួនធំ ត្រូវបានសហគមន៍មនុស្សដែលរស់នៅតាមបណ្តោយផ្លូវបុរាណមួយនេះ បន្តប្រតិបត្តិរហូតមកទល់នឹងបច្ចុប្បន្ន។
នៅថ្ងៃទី០១ និងទី០២ ខែវិច្ឆិកា ឆ្នាំ២០១៥ ខាងមុខនេះ ក្រុមអ្នកស្រាវជ្រាវទាំងពីរប្រទេស គឺកម្ពុជា និងថៃ នឹងធ្វើបទបង្ហាញអំពីលទ្ធផលស្រាវជ្រាវដ៏ធំមួយនេះ នៅសាលសន្និសីទអង្គរ នៃអាជ្ញាធរជាតិអប្សរា ដែលនឹងមានអ្នកចូលរួមប្រមាណជាង៣០០នាក់។
តាមរយៈបទបង្ហាញជាសាធាណៈនេះ អ្នកស្រាវជ្រាវខ្មែរនិងថៃ៨រូប នៃគម្រោងស្រាវជ្រាវផ្លូវបុរាណ នឹងធ្វើបទបង្ហាញទៅលើប្រធានបទសំខាន់ៗ ដែលពាក់ព័ន្ធនឹងលទ្ធផលស្រាវជ្រាវដូចជា ៖ បណ្តាញគមនាគមន៍សម័យបុរាណក្នុងតំបន់អាស៊ីអាគ្នេយ៍ដីគោក, ទំនាក់ទំនងវប្បធម៌នៅភាគខាងត្បូងនិងភាគកណ្តាលនៃប្រទេសថៃ មើលតាមរយៈការសិក្សាបុរាណវិទ្យា, ឧស្សហកម្មស្តីពីស្ថានីយស្លដែកបុរាណ, វិស័យសិក្សាលោហកម្មសម្រាប់ស្វែងយល់អំពីទំនាក់ទំនងវប្បធម៌សម័យបុរាណនៅភូមិភាគអាស៊ីអាគ្នេយ៍ដីគោក, ឧស្សហកម្មស្តីពីកុលាលភាជន៍នៅតាមផ្លូវបុរាណ ជាដើម។
ជាមួយគ្នានេះដែរ នៅថ្ងៃទី០២នៃបទបង្ហាញ នឹងមានដំណើរទស្សនកិច្ចសិក្សាទៅកាន់អតីតទីប្រជុំជនបុរាណមួយ ស្ថិតនៅតាមបណ្តោយផ្លូវបុរាណភ្ជាប់ពីរាជធានីអង្គរឆ្ពោះទៅក្រុងភិមាយ សព្វថ្ងៃស្ថិតនៅក្នុងភូមិគោល ឃុំគោល ស្រុកអង្គរជុំ មានចម្ងាយប្រមាណ៤០គមពីក្រុងសៀមរាប៕
© រក្សាសិទ្ធិដោយ thmeythmey.com