ជាតិ
នយោបាយជាតិ
ម្ចាស់សំបុត្រកំណើតអះអាងថា អាជ្ញាធរជាអ្នកសរសេរខុស
×
ម្ចាស់សំបុត្រកំណើតនៅខេត្តស្វាយរៀង បានអះអាងថា អាជ្ញាធរពិតជាសរសេរថាខេត្តស្វាយរៀង ប្រទេសវៀតណាមមែន។ការអះអាងរបស់ម្ចាស់សំបុត្រកំណើតនេះធ្វើឡើង ខណៈដែលសកម្មជនគណបក្សសង្គ្រោះជាតិពីររូប កំពុងឃុំខ្លួននៅពន្ធនាគារខេត្តស្វាយរៀង ដោយជាប់ចោទពីបទក្លែងឯកសារសំបុត្រកំណើត។
អ្នកស្រី ញ៉ែម ឈឿន ដែលជាម្ចាស់សំបុត្រកំណើត អះអាងថា អាជ្ញាធរខេត្តស្វាយរៀង ពិតជាសរសេរខេត្តស្វាយរៀង ប្រទេសវៀតណាមពិតមែន។នេះជាការបញ្ជាក់របស់ លោក អ៊ូ ច័ន្ទឫទ្ធិ ដែលបានឲ្យមន្ត្រីខ្លួននៅខេត្តស្វាយរៀង ចុះជួបម្ចាស់សំបុត្រកំណើតនោះ។ បើតាមមន្ត្រីជាន់ខ្ពស់គណបក្សសង្គ្រោះជាតិ ម្ចាស់សំបុត្រកំណើតរូបនេះ ពិតជាបានទទួលស្គាល់ថា អាជ្ញាធរបានសរសេរខេត្តស្វាយរៀង ប្រទេសវៀតណាម នៅក្នុងសំបុត្រកំណើតខ្លួនតាំងពីឆ្នាំ២០០៤មក ដោយពុំមានអ្នកណាម្នាក់យកទៅសរសេរបន្ថែម ដើម្បីក្លែងឯកសារនោះទេ។
ថ្លែងប្រាប់សារព័ត៌មានថ្មីៗ មន្ត្រីជាន់ខ្ពស់គណបក្សសង្គ្រោះជាតិរូបនេះ បានបញ្ជាក់ដូច្នេះថា៖«ម្ចាស់សំបុត្រកំណើតបានប្រាប់ក្រុមការងារគណបក្សដែលចុះជួបថា អាជ្ញាធរជាអ្នកសរសេរថាខេត្តស្វាយរៀង ប្រទេសវៀតណាមពិតមែន។ហើយម្ចាស់សំបុត្រទទួលស្គាល់ថាមិនមានអ្នកយកសំបុត្រកំណើតគាត់ទៅសរសេរបន្ថែមនោះទេ។ហើយយើងកំពុងទាក់ទងឲ្យគាត់ធ្វើសាក្សី ប៉ុន្ដែមិនដឹងថាគាត់ហ៊ានធ្វើឫអត់ទេ»។
ត្រង់ចំណុចនេះលោក អ៊ូ ច័ន្ទឫទ្ធិ បញ្ជាក់ថា អាជ្ញាធរនៅខេត្តស្វាយរៀង អាចច្រឡំសរសេរដោយអចេតនាដែរ ទើបបានជាសកម្មជនបក្សខ្លួន បានឃើញឯកសារនេះ ហើយយកទៅបង្ហោះលើហ្វេសប៊ុក ។ លោក អ៊ូ ច័ន្ទឫទ្ធិ ចាត់ទុកថា ការចាប់ខ្លួនសកម្មជននេះគឺជារឿងនយោបាយ។ហើយលោក ក៏អំពាវនាវឲ្យតុលាការដោះលែងសកម្មជនខ្លួនឲ្យមានសេរីភាពឡើងវិញដែរ។«បើសកម្មជននៅខេត្តស្វាយរៀងពីរនាក់នោះ គ្រាន់តែបង្ហោះឯកសារត្រូវមានទោសពីបទក្លែងឯកសារ ដូច្នេះមេឃុំខេត្តតាកែវក៏មានទោសដែរ ព្រោះមេឃុំនោះធ្លាប់សារភាពថាខ្លួនសរសេរច្រឡំ ដោយសារមានប្រជាពលរដ្ឋមកពីកម្ពុជាក្រោមមករស់នៅទីនោះច្រើន នេះក៏ជាកំហុសដាក់ទោសដែរ។អ៊ីចឹងនេះគឺជារឿងនយោបាយទេ គួរតែដោះលែងសកម្មពីរនាក់នោះឲ្យមានសេរីភាពវិញទៅ»។នេះជាការបញ្ជាក់របស់លោក អ៊ូ ច័ន្ទឫទ្ធិ។
កន្លងមកនៅខេត្តតាកែវ ក៏មានមេឃុំសរសេរលើសំបុត្រកំណើតថា ខេត្តតាកែវ ប្រទេសវៀតណាមដែរ តែត្រូវបានមេឃុំ អះអាងថា ជាអចេតនាព្រោះខ្លួនច្រឡំដោយសារប្រជាពលរដ្ឋចេញចូលទីនោះច្រើនពេក។
ជុំវិញបញ្ហានេះមន្ត្រីស៊ើបអង្កេតសិទ្ធិមនុស្សអង្គការលីកាដូ លោក អំ សំអាត យល់ឃើញថា ការបង្ហោះឯកសារសំបុត្រកំណើត ដែលសរសេរថា ខេត្តតាកែវ និង ខេត្តស្វាយរៀង ប្រទេសវៀតណាមប៉ុន្មានថ្ងៃនេះ គឺជាសេនារីយ៉ូមួយរបស់អ្នកនយោបាយ ក្នុងការរៀបចំព្រឹត្តិការណ៍ចលាចលបន្ថែមទៀត ខណៈដែលស្ថានភាពនយោបាយកំពុងវឹកវរ។ លោក បន្ថែមថា ភាពចលាចលថ្មីនេះ គឺរិតតែធ្វើឲ្យគណបក្សសង្គ្រោះជាតិ កាន់តែមានភាពតានតឹងនិងមានបន្ទុកនយោបាយកាន់តែធ្ងន់ថែមទៀត។
សកម្មជនគណបក្សសង្គ្រោះជាតិពីររូប គឺលោក សុខ សំអ៊ាន ប្រធានប្រតិបត្តិគណបក្សសង្គ្រោះជាតិ និងលោក នង សារិទ្ធ សមាជិកក្រុមប្រឹក្សាគណបក្សសង្គ្រោះជាតិក្រុងបាវិតត្រូវបានសមត្ថកិច្ចចាប់ខ្លួន កាលពីថ្ងៃទី១៩ វិច្ឆិកា ដោយចោទថា ពួកគេបានសរសេរក្លែងឯកសារសំបុត្រកំណើត បង្ហោះតាមហ្វេសប៊ុក ថា ទឹកដីស្រុកចន្ទ្រា ខេត្តស្វាយរៀង ប្រទេសវៀតណាម។ សាលាដំបូងខេត្តស្វាយរៀងបានសម្រេចឃុំខ្លួនសកម្មជនគណបក្សសង្គ្រោះជាតិពីររូបនោះ នៅពន្ធនាគារខេត្ត ដោយចោទពីបទក្លែងឯកសារសាធារណៈនិងញុះញង់ឲ្យមានបទឧក្រិដ្ឋពាក់ព័ន្ធនឹងការបង្ហោះសំបុត្រកំណើត៕
Tag:
អ៊ូ ច័ន្ទុឬទ្ធិ
សំបុត្រកំណើត
© រក្សាសិទ្ធិដោយ thmeythmey.com