អ្នកលក់នំចំណី ភេសជ្ជ និងសម្ភារៈផ្សេងៗកំពុងបារម្ភពីការលក់មិនរួចថ្លៃដើម

ជាតិ

សេដ្ឋកិច្ច

អ្នកលក់នំចំណី ភេសជ្ជ និងសម្ភារៈផ្សេងៗកំពុងបារម្ភពីការលក់មិនរួចថ្លៃដើម

26, Nov 2015 , 8:59 pm

រូបភាព

ដោយ: ថ្មីៗ

សៀមរាប៖ ពិធីបុណ្យអុំទូកនៅខេត្តសៀមរាបឆ្នាំ២០១៥នេះ មានប្រជាពលរដ្ឋមកទស្សនាច្រើនជាងរាល់ឆ្នាំ។ ប៉ុន្តែ អ្នកលក់នំចំណី ភេសជ្ជ និងសម្ភារៈប្រើប្រាស់ផ្សេងៗ នៅតាមដងស្ទឹងសៀមរាប ខេត្តសៀមរាបលើកនេះ ពួកគាត់មួយចំនួនធំកំពុងព្រួយបារម្ភពីការលក់មិនបានរួចថ្លៃដើម។

រហូតមកដល់ព្រឹកថ្ងៃទីពីរនៃពិធីបុណ្យអុំទូកនៅខេត្តសៀមរាបនេះ អ្នកស្រី សុខ ធឿន វ័យ ៦២ឆ្នាំ កំពុងអង្គុយលក់សត្វល្អិត (ចង្រិត, កន្ទេសឡង់, ដុកឌឿ...) និងគ្រឿងម្ជូរ នៅតាមបណ្តោយផ្លូវនៅស្ទឹកសៀមរាប អ្នកស្រីកំពុងតែបារម្ភខ្លាចលក់មិនបានរួចថ្លៃដើម។ អ្នកមកពីខេត្តបាត់ដំបង់រូបនេះ និយាយទាំងទឹកមុខស្ងួតថា «គ្រឿងម្ជូរ និងសត្វល្អិតបំពងទាំងនេះ ខ្ញុំទិញពីគេអស់ប្រហែលជា ២លាន់រៀល ហើយនៅយប់ម្សិលមិញ និងព្រឹកនេះលក់ទើបតែបាន៥០ទៅ៦០ម៉ឺនប៉ុណ្ណោះ មិនដឹងថារួចខ្លួនឬអត់ទេ។ បើលក់មិនអស់ ខាត់អស់ច្រើនណាស់»។

រំលងពីគ្នាប្រហែលជា២០ម៉ែត្រ កញ្ញា ស្រីពៅ វ័យ២២ ដៃកំពុងអាំងចេកបន្ទះ នៅលើជើងក្រាន មួយ ស្រីពៅ បានរៀបរាប់ថា៖ «ខ្ញុំទិញចេកបន្ទះពីភ្នំពេញអស់៧០ម៉ឺនរៀល។ ខ្ញុំលក់នៅយប់ម្សិលមិញដល់ម៉ោង១ទៅ២យប់ គឺលក់បាន៥០ម៉ឺនរៀល។ ខ្ញុំលក់ដាច់គួរសមមែន តែមិនសូវចំណេញនោះទេ ព្រោះចំណាយថ្លៃធ្វើដំណើរពីបាត់ដំបង់មកសៀមរាបនេះអស់ជិត ១៥ម៉ឺនរៀលបាត់ហើយ»។

ចំណែកឯ អ្នកស្រី សុធា កំពុងអង្គុយនៅលើកៅអីជ័រ នៅជាប់ដើមឈើធំមួយ បានយកទឹកសុទ្ធ និងភេសជ្ជពីអ្នកលក់ដុំ មកដាក់លក់នៅតាមបណ្តោយផ្លូវជាប់ស្ទឹងសៀមរាបដូចគេឯងដែរ។ អ្នកស្រីវ័យ ២៦ឆ្នាំរូបនេះបាននិយាយទាំងទឹកមុខក្រៀមក្រំថា៖ «ទឹកសុទ្ធ និងភេសជ្ជទាំងនេះចំណាយដើមទុនច្រើន ខ្ញុំយកពីអ្នកលក់ដុំ មិនទាន់ឲ្យលុយគេទេ។ កាលពីយប់មិញលក់បានតែ១០ទៅ២០ម៉ឺនរៀលប៉ុណ្ណោះ ខ្ញុំមិនសង្ឃឹមថាលក់បានថ្លៃដើម យកទៅសងគេវិញទេ»។

និយាយពីកញ្ញា ធារី ដែលកំពុងអង្គុយលក់កាបូបសម្រាប់មនុស្សស្រី នៅទល់មុខនឹងអ្នកលក់ភេសជ្ជខាងលើ វិញម្តង។ កាបូបសម្រាប់មនុស្សស្រីលក់លាងឃ្លាំងទាំងនោះមានតម្លៃពី១ម៉ឺនរហូតដល់ជិត៣ម៉ឺនរៀល។ កញ្ញាវ័យ២២ឆ្នាំ ដែលស៊ីឈ្នូលលក់កាបូបស្រីៗឲ្យថៅកែរបស់ខ្លួននោះ បាននិយាយរាក់ទាក់យ៉ាងដូច្នេះថា៖ «នៅយប់ម្សិលមិញខ្ញុំលក់បានប្រហែលជា ២ពាន់ដុល្លារ។ ខ្ញុំលក់បានច្រើន តែមិនសង្ឃឹមថាលក់បានរួចថ្លៃដើមទេ ព្រោះកាបូបទាំងនេះជាអីវ៉ានលក់លាងឃ្លាំង ដែលខ្ញុំលក់ឲ្យថៅកែនៅផ្សារអូឡាំពិក»។

រីឯ លោក សុធា ដែលជាអ្នកលក់សាច់ក្រង និងយូហ៊ឺអាំងតាមរ៉ឺមក់កង់បី កំពុងតែបារម្ភ ព្រោះលោកបានចំណាយថ្លៃដើមរហូតដល់ទៅ៧០ម៉ឺន ប៉ុន្តែ នៅយប់ម្សិលមិញនេះ លោកលក់បានតែជាង១០ម៉ឺនរៀលប៉ុណ្ណោះ។ បុរស់វ័យ២៨ឆ្នាំមកពីខេត្តកំពុងចាមរូបនេះបានពន្យល់ថា៖ «នៅឆ្នាំនេះមានមនុស្សច្រើនជាងរាល់ឆ្នាំ តែខ្ញុំលក់មិនដាក់សូវបានច្រើនទេ ព្រោះមានអ្នកលក់ដូរច្រើនណាស់ ហើយខ្ញុំក៏មិនបានចាប់ចំកន្លែងមានមនុស្សច្រើនដូចគេទៀត។ ឆ្នាំមុនខ្ញុំលក់មួយយប់បាន៧០ម៉ឺន តែឆ្នាំនេះបានតែ១០ទៅ៥ម៉ឺនប៉ុណ្ណោះ»៕