កីឡាជាតិ
ជាតិ
គ្រូបង្វឹក YANGON UNITED ថា កូនក្រុមរបស់គាត់លេងបាល់ ដូចមិនមែនលេងបាល់
× គ្រូបង្វឹកក្រុម YANGON UNITED លោក EMERSON ALCANTARA បានបង្ហាញការខកចិត្តយ៉ាងខ្លាំងចំពោះការលេងរបស់កូនក្រុមខ្លួន នៅក្នុងជំនួបជាមួយក្រុមបឹងកេតអង្គរ កាលពីយប់ថ្ងៃទី២៩ ខែវិច្ឆិកា នៅពហុកីឡដ្ឋានជាតិអូឡាំពិក ក្នុងវគ្គជម្រុះចុងក្រោយជុំទី២ ពានរង្វាន់ Toyota Club Championship 2015។
ថ្លែងនៅក្នុងសន្និសីទសារព័ត៌មានក្រោយចប់ការប្រកួត លោក EMERSON ALCANTARA បានបង្ហាញការខកចិត្តយ៉ាងចំពោះលទ្ធផលដែលមិនគួរឱ្យជឿ និងបានបង្ហាញការមិនពេញចិត្តចំពោះការលេងរបស់កូនក្រុមខ្លួន។ លោកពន្យល់ថាមានការខុសប្លែកគ្នាខ្លាំងរវាងតង់ទី១និងតង់ទី២ ហើយលោកបានចាត់ទុកការលេងរបស់កូនក្រុមថាហាក់ដូចជាមិនមែនការលេងបាល់ទាត់។
«ការប្រកួតលើកនេះឃើញថាមានការខុសប្លែកខ្លាំងរវាងតង់ទី១ និងតង់ទី២។ នៅតង់ទី១កូនក្រុមរបស់ខ្ញុំធ្វើការបានយ៉ាងល្អតាមរចនាសម្ព័ន្ធដែលខ្ញុំបានរៀបចំ។ តែដល់តង់ទី២អ្វីៗមានការផ្លាស់ប្តូរទាំងស្រុងនូវទម្រង់យុទ្ធសាស្ត្រហាក់ដូចជាមិនមែនជាការលេងបាល់ទាត់។ ជាហេតុធ្វើឱ្យក្រុមបឹងកេតអង្គរបានប្រើយុទ្ធសាស្ត្រវាយបកយ៉ាងលឿននៅពេលពួកគេបានបាល់ជាពិសេសក្រុមនេះបានបង្កើតឱកាសគ្រោះថ្នាក់ជាច្រើន ដែលបង្កឱ្យមានបញ្ហាដល់ក្រុមរបស់ខ្ញុំ»។ នេះជាការបញ្ជាក់របស់គ្រូបង្វឹក YANGON UNITED លោក EMERSON ALCANTARA។
គួរបញ្ជាក់ថាក្រុមបឹងកេតអង្គររបស់កម្ពុជា នឹងប៉ះក្រុម Becamex Binh Duong FC របស់ប្រទេសវៀតណាម នៅថ្ងៃទី៦ខែធ្នូ ឆ្នាំ២០១៥ ក្នុងទឹកដីប្រទេសវៀតណាម បន្ទាប់ពីខ្លួនបានយកឈ្នះក្រុម YANGON UNITED ក្នុងលទ្ធផល៣ទល់នឹង០៕
© រក្សាសិទ្ធិដោយ thmeythmey.com