ជាតិ
សង្គមជាតិ
រដ្ឋាភិបាលបង្កើនថវិកា១លានដុល្លារទៀតនៅឆ្នាំ២០១៦ ដល់មន្ទីរពេទ្យគន្ធបុប្ផា
× នៅឆ្នាំ២០១៦ រដ្ឋាភិបាល បង្កើនប្រាក់ឧបត្ថមថវិកាបន្ថែមសរុបចំនួន ៣៨ ៩០៥ លានរៀល ដល់មន្ទីរពេទ្យគន្ធបុប្ផា ធៀបនឹងចំនួនសរុប ៣៤ ៩២១ លានរៀលឆ្នាំ២០១៥។
យោងតាមច្បាប់ថវិកាជាតិឆ្នាំ២០១៦ រដ្ឋាភិបាលបានបន្ថែមទឹកប្រាក់ចំនួន១លានដុល្លាទៀតដែលទឹកប្រាក់ផ្ដល់ទៅមន្ទីរពេទ្យគន្ធបុប្ផា ចំនួន៣៨ ៩០៥ លានរៀលនេះ ស្មើនឹងទឹកប្រាក់ ៩,៦ លានដុល្លារ បើធៀបនឹងទឹកប្រាក់សរុប ៣៤ ៩២១ លានរៀលឆ្នាំ២០១៥ ស្មើនឹង ៨,៦ លានដុល្លារ ។
ខណៈដែលរដ្ឋាភិបាលបង្កើនការគាំទ្រដល់ប្រតិបត្តិការរបស់មន្ទីរពេទ្យគន្ធបុប្ផាជាបណ្ដើរៗ ថវិកានេះគឺដើម្បីធានាថា មន្ទីរពេទ្យនេះនៅតែអាចរក្សាបាននូវស្ដង់ដាគុណភាព និងការផ្ដល់សេវាព្យាបាលដោយឥតគិតថ្លៃដដែល នៅពេលដែលបានផ្ទេរមកស្ថិតក្រោមការគ្រប់គ្រងរបស់រដ្ឋពេញលេញ។
បច្ចុប្បន្នមន្ទីរពេទ្យគន្ធបុប្ផាបានចំណាយថវិកាបានចំណាយថវិកា ចំនួន១២ម៉ឺនដុល្លារក្នុងមួយថ្ងៃ ដើម្បីព្យាបាលជំងឺដោយឥតគិតថ្លៃដល់ កុមារកម្ពុជា។ ចាប់តាំងពីឆ្នាំ១៩៩២មកមន្ទីរពេទ្យគន្ធបុប្ផាបានចំណាយថវិកាអស់ ប្រមាណ៥៦០លានដុល្លារ ក្នុងនោះ៣,៥ភាគរយបានមកពីរាជរដ្ឋាភិបាលកម្ពុជា៤,៥ភាគរយពីរដ្ឋាភិបាល ស្វ៊ីសនិង៩២,៥ភាគរយជាថវិកាដែលប្រមូលបានមូលនិធិសប្បុរសជន។
សូមបញ្ជាក់ថា នៅឆ្នាំ២០១៤កន្លងទៅមន្ទីរពេទ្យគន្ធបុប្ផាបានចំណាយថវិកាប្រមាណ៤០លាន ដុល្លារដើម្បីពិនិត្យ និងព្យាបាលជំងឺដល់កុមារកម្ពុជាជិត១លាននាក់។ ដោយឡែកនៅឆ្នាំ២០១៥នេះ មន្ទីរពេទ្យគន្ធបុប្ផាមានកញ្ចប់ថវិកាចំនួន៤៣លានដុល្លារ សម្រាប់ចំណាយលើការពិនិត្យ និងព្យាបាលជំងឺដល់កុមារ និងស្ត្រីកម្ពុជា ក្នុងនោះប្រាក់ជាង៣លានដុល្លារផ្តល់ដោយរដ្ឋាភិបាលកម្ពុជា ៤លានដុល្លារពីរដ្ឋាភិបាលស្វីស និង៣៦លានដុល្លារទៀត បានមកពីការបរិច្ចាគឯកជន ដែលភាគច្រើនជាប្រជាជនស្វីស៕
© រក្សាសិទ្ធិដោយ thmeythmey.com