មហោស្រពភាពយន្តកូរ៉េ លើកទី៩ រឹតចំណងមិត្តភាពកូរ៉េ-កម្ពុជា

ជាតិ

មហោស្រពភាពយន្តកូរ៉េ លើកទី៩ រឹតចំណងមិត្តភាពកូរ៉េ-កម្ពុជា

01, Dec 2015 , 11:22 am

រូបភាព

ដោយ: ថ្មីៗ

ភ្នំពេញ៖ ស្ថានទូតសាធារណរដ្ឋកូរ៉េប្រចាំកម្ពុជា បានរៀបចំមហោស្រពភាពយន្តកូរ៉េ លើកទី៩ កាលពីថ្ងៃទី២៧ ខែវិច្ឆិកា ឆ្នាំ២០១៥ នៅរោងភាពយន្ត Legend Cinema ទួលគោកក្នុងផ្សារទំនើប TK ដើម្បីផ្សព្វផ្សាយពីឧត្តមភាពខ្សែភាពយន្តកូរ៉េ ឲ្យកាន់តែទូលាយ និងរឹតចំណងមិត្តភាព រវាងប្រទេសទាំងពីរកូរ៉េ-កម្ពុជា និងកូរ៉េ បន្ថែមទៀត។ មហោស្រពភាពយន្តកូរ៉េ លើកទី៩នេះ បានចាក់បញ្ចាំងពីថ្ងៃទី២៧ ដល់ថ្ងៃទី២៩ ខែវិច្ឆិកា ឆ្នាំ២០១៥នេះ។

រដ្ឋលេខាធិការក្រសួងវប្បធម៌ និងវិចិត្រសិល្បៈ លោក សោម សុគន្ធ ក្នុងឱកាសប្រារព្ធមហោស្រពភាពយន្តកូរ៉េ លើកទី៩នោះ បានណែនាំផលិតករភាពយន្តកម្ពុជាឲ្យសិក្សាស្វែងយល់ដកស្រង់យកបទពិសោធន៍ល្អៗ ពីស្នាដៃល្អពីបច្ចេកវិទ្យា ផលិតករភាពយន្តកូរ៉េ ដើម្បីបង្កើនសមត្ថភាពភាពយន្តកម្ពុជា ឲ្យកាន់តែមានគុណភាពល្អប្រសើរ។

លោកនិយាយថា មហោស្រភាពយន្តកូរ៉េនេះ ជាឱកាសសម្រាប់ផលិតភាពកម្ពុជា និងកូរ៉េ ផ្លាស់ប្តូរបទពិសោធន៍ការងារ និងវប្បធម៌ចំណេះដឹងគ្នាទៅវិញទៅមក។

កូរ៉េបានចាក់បញ្ចាំងស្នាដៃភាពយន្តសម្រិតសម្រាំងចំនួន៥រឿង របស់អ្នកដឹកនាំរឿង លី ជន់អ៊ីក (Lee Joon-IK) ក្នុងមហោស្រពភាពយន្តកូរ៉េ លើកទី៩ ឆ្នាំ ២០១៥នេះ។ វាបានផ្តល់ឱកាសដល់ប្រជាជនកម្ពុជា ស្វែងយល់ពីវប្បធម៌ប្រពៃណី ទំនៀមទម្លាប់របស់ប្រជាជនកូរ៉េ តាមរយៈ វិស័យឧស្សាហកម្មភាពយន្តកូរ៉េនេះ។ លោក Lee Joon-IK ជឿជាក់ថា មហោស្រពភាពយន្តកូរ៉េនេះ នឹងក្លាយទៅជាព្រឹត្តិការណ៍ វប្បធម៌ដ៏សំខាន់មួយ ក្នុងការរឹតចំណងមិត្តភាពភាពយន្តកូរ៉េ-កម្ពុជា។ លោកនិយាយថា៖«ស្នាដៃផលិតភាពយន្តកូរ៉េ នឹងរួមចំណែកផលិតករភាពយន្តកូរ៉េ-កម្ពុជា ផ្លាស់ប្តូរសិក្សាបង្កើនសមត្ថភាពផលិត កាន់តែមានគុណភាព»៕