ករណីលោក ខឹម វាសនា៖ សម្តេចសង្ឃរាជ ហាមមន្ត្រីសង្ឃពឹងពាក់សម្តេច ហ៊ុន សែន

ជាតិ

ករណីលោក ខឹម វាសនា៖ សម្តេចសង្ឃរាជ ហាមមន្ត្រីសង្ឃពឹងពាក់សម្តេច ហ៊ុន សែន

29, Dec 2015 , 3:29 pm

រូបភាព

ដោយ: ម៉ៅ សុផា

សម្តេចព្រះមហាសង្ឃរាជាធិបតី ទេព វង្ស បានស្នើឲ្យមន្ត្រីសង្ឃទាំងអស់ ចៀស វាងការដាក់ លិខិតទៅកាន់ប្រមុខរដ្ឋាភិបាលកម្ពុជា ដើម្បីធ្វើអន្តរាគមន៍ទប់ស្កាត់ចលនានយោបាយ នៃ គណបក្សសម្ព័ន្ធដើម្បីប្រជាធិបតេយ្យ របស់លោក ខឹម វាសនា។ ការលើកនូវសង្ឃដីការបស់ព្រះអង្គបែបនេះ ធ្វើឡើងក្នុងអនុសំវច្ចរមហាសន្និបាតលើកទី២៤ ដែលប្រព្រឹត្តទៅនៅសាលចតុមុខ នាពេលព្រឹកថ្ងៃទី២៩ ខែធ្នូនេះ។

សម្តេចព្រះសង្ឃរាជ ទេព វង្ស បានហាមប្រាមមន្ត្រីសង្ឃគ្រប់អង្គ មិនឲ្យស្នើដល់ប្រមុខរដ្ឋាភិបាល ដើម្បីធ្វើអន្តរាគមន៍ទប់ស្កាត់ចលនាឃោសនារបស់ លោក ខឹម វាសនា ប្រមុខគណបក្សសម្ព័ន្ធដើម្បីប្រជាធិបតេយ្យ។ ព្រះអង្គ បានមានសង្ឃដីកាថា បញ្ហារបស់លោក ខឹម វាសនា គួរត្រូវបានដោះស្រាយឲ្យបានសមគួរ ហើយកុំឲ្យលើសព្រំដែន ដែលរហូតឈានទៅដល់ពឹងពាក់សម្តេច ហ៊ុន សែន។

ព្រះអង្គបញ្ជាក់ដូច្នេះថា៖«ខ្ញុំសូមសុំណូមពរអ្នកទប់ស្កាត់ ធ្វើយ៉ាងណាកុំ ឲ្យហួស ព្រំដែន ឲ្យសោះ។ សុខចិត្តដោះស្រាយដោយខ្វះខាត ព្រំដែនប្រសើរជាង។ បើតាមខ្ញុំយល់ គួរណាស់ ដោះស្រាយតាមបែបប្រជាធិបតេយ្យ កុំទៅទេសនាសម្លុតគំរាមកំហែង ហើយកុំធ្វើលិខិតទៅកាន់ សម្តេចនាយករដ្ឋមន្ត្រី ឲ្យជួយទប់ស្កាត់ ឡើយ»។

ការសម្រេចយកករណីរបស់ប្រមុខបក្សរូបនេះ មកជជែកក្នុងអនុសំវច្ចរមហាសន្និបាតលើកទី២៤នេះ គឺស្ថិតនៅក្រោមហេតុផលថា លោក ខឹម វាសនា បានប្រើពាក្យអសុរោះ ជេរប្រមាថព្រះសង្ឃ និងបញ្ចូលមនោគមទៅលើយុវជន ឲ្យប្រព្រឹត្តតាមខ្លួន ដែលបង្កគ្រោះថ្នាក់ដល់សង្គមនិងព្រះពុទ្ធសាសនា។ មុខនឹងពិភាក្សាពីបញ្ហារបស់លោក ខឹម វាសនា មន្ត្រីសម្របសម្រួលក៏បានចាក់សំឡេងរបស់លោក អបដោយការបញ្ចាំងរូបភាពមួយចំនួនផងដែរ។

សម្តេចព្រះឧត្តមចរិយា ឈឹង ប៊ុនឈា សមាជិកថេរសភានៃព្រះរាជាណាចក្រកម្ពុជា និងជាព្រះចៅអធិការវត្តស្រះចក បានមានសង្ឃដីកាថា ការឃោសនានិងចលនានយោបាយ របស់លោក ខឹម វាសនា គឺចង់ផ្តួលរំលំព្រះពុទ្ធសាសនា ដែលជាសាសនារបស់រដ្ឋ ហើយក៏ជាទង្វើ ដែលប្រាសចាកពីរដ្ឋធម្មនុញ្ញនៃព្រះរាជាណាចក្រកម្ពុជា និងសេចក្តីប្រកាសជាសាកលស្តីពីសិទ្ធិមនុស្ស។ ព្រះអង្គ បានចាត់ទុកសកម្មភាពរបស់លោក ខឹម វាសនា ថាជាគ្រោះថ្នាក់ដ៏ធំធេងដល់ព្រះពុទ្ធសាសនា ដែលបង្កក្តីព្រួបារម្ភយ៉ាងខ្លាំងដល់មន្ត្រីសង្ឃនិងងពុទ្ធបរិស័ទទូទាំងប្រទេស។

ព្រះអង្គបានបញ្ជាក់ដូច្នេះថា៖«យើងព្រួយណាស់ អ៊ីចឹងហើយបានជាយើងត្រូវនិយាយពីបញ្ហានេះ ដើម្បីរកវិធានការដោះស្រាយ។ គាត់ធ្វើចលនាបញ្ចូលមនោគម ដល់យុវជន ឲ្យស្អប់វត្តអារាម ឲ្យស្អប់ព្រះសង្ឃ ឲ្យស្អប់សាសនា មិនឲ្យចូលចិត្តស្តាប់ព្រះធម៌។ ពាក្យពេចន៍របស់គាត់ចេញមកគឺអសីលធម៌ ជេរគេជេរឯង ដូចជា ពួកអាឈាមថោក ពួកអាចោរថង់យាម ពួកអាឈាមឆ្កែ ពួកអាបោករាស្ត្រ ពួកអាឈ្លើង។ ពាក្យទាំងនេះ យើងមិនអាចទទួលយកបានទេ»។

ព្រះគ្រូចៅអធិការវត្តស្រះចកអង្គនេះ បានបន្តទៀតថា ព្រះពុទ្ធសាសនា គឺជាឃ្លាំងនិងជាគ្រឹះ នៃសីលធម៌ វប្បធម៌ជាតិ ព្រមទាំងជាសាសនារបស់រដ្ឋថែមទៀ ដូច្នេះព្រះសង្ឃ និងពុទ្ធបរិស័ទទូទាំងប្រទេស មិនអនុញ្ញាតឲ្យជនណាឬក្រុមណា មកបំផ្លាញព្រះពុទ្ធសាសនា នោះទេ។

យ៉ាងណាក៏ដោយ លទ្ធផលនៃការចាត់វិធានការ តាមផ្លូវច្បាប់លើ លោក ខឹម វាសនា គឺព្រះអង្គមិនទាន់អាចបញ្ជាក់បានថាយ៉ាងណា ឡើយ។ ព្រះអង្គគ្រាន់តែអះអាង សេចក្តីសម្រេចចំពោះករណីរបស់លោក ខឹម វាសនា គឺនៅពេលបញ្ចប់កិច្ចប្រជុំនៅថ្ងៃទីទៅ៣០ ខែធ្នូ ស្អែកនេះ។

ឆ្លើយតបនឹងបញ្ហានេះ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ នៅតែប្រកាន់ជំហររបស់ខ្លួនថា អ្វីដែលលោកធ្វើកន្លងមក គឺជារឿងត្រឹមត្រូវ ដោយមិនភ័យព្រួយពីសំណាក់អ្នកដទៃ ឬស្ថាប័នមានអំណាចណា ចាត់វិធានការយ៉ាងម៉េចនោះទេ។ លោកបញ្ជាក់ដូច្នេះថា៖«ខ្ញុំនិយាយអ្វី ដែលខ្ញុំបានត្រិះរិះពិចារណា ហើយខ្ញុំសិក្សាទៅឃើញថា រឿងពិតគឺអ៊ីចឹងមែន។ ការនិយាយរឿងត្រឹមត្រូវ តែងប៉ះពាល់ដល់រឿងគេ ប៉ះពាល់ដល់អំណាចគេ អ៊ីចឹងបើគេមានសិទ្ធិ មានអំណាច មានគ្នីគ្នា មានកម្លាំងប៉ុណ្ណា គេប្រើកម្លាំងប៉ុណ្ណឺងទៅ។ ខ្ញុំអត់មានបញ្ហាអ្វីទេ ខ្ញុំចាំតែ តាមក្រោយគេប៉ុណ្ណោះ»។

ប្រមុខបក្សរូបនេះ ដឹងខ្លួនយ៉ាងច្បាស់ថា ការនិយាយរឿងពិត តែងប៉ះពាល់ដល់ប្រយោជន៍របស់អ្នកដទៃ តែដើម្បីបានប្រយោជន៍សាធារណៈរូបលោកត្រូវតែនិយាយដោយគ្មាន ការភ័យខ្លាច។ លោក ខឹម វាសនាបានបន្ថែមយ៉ាងនេះថា៖«ប្រសិនបើខ្លាចមុខ ខ្លាចក្រោយ សួរថាតើ ថ្ងៃណា ប្រជាពលរដ្ឋនឹងបានយល់ត្រូវ? ប្រសិនបើយើងនៅតែរវល់ខ្លាច អ៊ីចឹងម៉េចបាននិយាយការពិត ។ ដូច្នេះរឿងនេះ វាជារឿងធម្មតាទេ ខ្ញុំបានគិតជាមុខរួចហើយ»៕