ជាតិ
×![]()
ដោយ: ថ្មីៗ
នៅថ្ងៃនេះ លោក ឃុត សុខឿន នឹងជំរាបជូនប្រិយមិត្តអ្នកស្តាប់នូវបទចម្រៀងជាភាសាអេស្ប៉ាញមួយបទដែលមានចំណងជើងថា"Pepito"(ប៉ិបពីតូ) និង បទចម្រៀងខ្មែរដែលមានចំណងជើងថា "បើបានរាំហើយ" របស់អ្នកស្រី រស់ សេរីសុទ្ធា។
បទចម្រៀងដែលប្រិយមិត្តកំពុងស្តាប់នៅពេលនេះមានចំណងជើងថា"Pepito"(ប៉ិបពីតូ)។ បទចម្រៀងនេះច្រៀងជាភាសាអេស្ប៉ាញ ប៉ុន្តែមានប្រភពមមកពីប្រទេសបារាំង។
បទចម្រៀងនេះច្រៀងដោយអ្នកចម្រៀងជនជាតិកូស្តារីកា ឈ្មោះ Julia Cortés នៃក្រុមចម្រៀង Los Machucambos។ បទចម្រៀង "Pepito" (ប៉ិបពីតូ) បានចេញលក់នៅឆ្នាំ ១៩៦១ ហើយ ដោយសារបទចម្រៀង Pepito បានធ្វើអោយក្រុម Los Machucambos ល្បីល្បាញពាសពេញពិភពលោកនៅពេលនោះផងដែរ។
មិត្តអ្នកស្តាប់ប្រាកដជាឆ្ងល់ហើយថា ហេតុអ្វីបានជាបទចម្រៀងដែលមានប្រភពមកពី ប្រទេសបារាំង បែរជាច្រៀងជាភាសាអេស្ប៉ាញ ដោយអ្នកចម្រៀងជនជាតិ កូស្តារីកា ទៅវិញ។ ដើម្បីអោយប្រិយមិត្តជ្រាបកាន់តែច្បាស់ ខ្ញុំសូមជំរាបមិត្តអ្នកស្តាប់អំពីក្រុមចម្រៀង Los Machucambos នេះ។
ក្រុមចម្រៀង Los Machucambos ត្រូវបានបង្កើតឡើងនៅទីក្រុងបារីស នៅខែសីហាឆ្នាំ១៩៥៩ ដោយសិល្បករជនជាតិអេស្ប៉ាញ ឈ្មោះ Rafael Gayoso សិល្បករជនជាតិកូស្តារីកា ឈ្មោះ Julia Cortés និងសិល្បករជនជាតិប៉េរូឈ្មោះ Milton Zapata ហើយដែលក្រោយមកត្រូវជំនួសដោយសិល្បករជនជាតិអ៊ីតាលីឈ្មោះ Romano Zanotti។
បទចម្រៀងភាគច្រើនរបស់ក្រុម Los Machucambos គឺជាបទចម្រៀងប្រភេទស្រាល និងអាចរាំបាន ប៉ុន្តែបទចម្រៀងទាំងនោះមានភាពផ្សេងៗគ្នា និង បានរួមបញ្ចូលគ្នានូវបទចម្រៀងបែបប្រពៃណីរបស់ពួកមេរិកឡាទីន និងបទចម្រៀងដែលនិពន្ធដោយអ្នកចម្រៀងដ៏ល្បីរបស់បារាំងដូចជា Charles Aznavour ឬក៏ Léo Ferré ជាដើម។
បទចម្រៀងនេះត្រូវបានច្រៀងឡើងវិញដោយអ្នកចម្រៀងជាច្រើននាក់នៅជុំវិញពិភពលោក។ បទចម្រៀងនេះក៏មានឥទ្ធិពលមកដល់ប្រទេសកម្ពុជាយើងដែរ។
បទចម្រៀងដែលប្រិយមិត្តកំពុងស្តាប់នៅពេលនេះ មានចំណងជើងថា"បើបានរាំហើយ"។ បទចម្រៀងនេះ ច្រៀងដោយអ្នកស្រី រស់ សេរីសុទ្ធា និពន្ធទំនុកច្រៀង ដោយលោក ញ៉ែម ផុន សម្រួលបទភ្លេងដោយលោក សម សាខន និង ប្រគុំបទភ្លេងដោយក្រុមតន្ត្រីយោធាភិរម្យ។ បទចម្រៀង "បើបានរាំហើយ" ជាផលិតផលរបស់ថាសចម្រៀង សញ្ញាអាប៉ូឡូ។
យើងមិនដឹងថាបទចម្រៀងរបស់អ្នកស្រីរស់ សេរីសុទ្ធា១បទ នេះត្រូវបានផលិត និងដាក់លក់នៅឆ្នាំណានោះទេ។ ទោះយ៉ាងណា បទចម្រៀងនេះ បានប្រាប់យើង អោយដឹងពីការច្នៃប្រឌិតរបស់ផលិតករខ្មែរសម័យមុន ដែលអាចធ្វើអោយបទចម្រៀងខ្មែរ ឈានឡើងស្មើនឹងបទចម្រៀងបរទេសដែលល្បីៗនៅក្នុងពិភពលោក៕
Tag:
ឃុត សុខឿន
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
