អាមេរិក៖ សម្ព័ន្ធអន្តរជាតិត្រៀមប្រើទ័ពថ្មើរជើងកម្ចាត់ក្រុមរដ្ឋឥស្លាម

សង្គមអន្តរជាតិ

អន្តរជាតិ

អាមេរិក៖ សម្ព័ន្ធអន្តរជាតិត្រៀមប្រើទ័ពថ្មើរជើងកម្ចាត់ក្រុមរដ្ឋឥស្លាម

23, Jan 2016 , 10:21 am

រូបភាព

ដោយ: សៅ ផលនិស្ស័យ (Sao Phal Niseiy)

ប្រមុខការពារជាតិអាមេរិកលោក Ashton Carter បានបញ្ជាក់ថា សម្ព័ន្ធអន្តរជាតិដែលកំពុងវាយប្រហារតាមផ្លូវអាកាសដើម្បីកម្ចាត់ក្រុមរដ្ឋឥស្លាមឬក្រុមដែស្ហ នឹងប្រើប្រាស់ទ័ពថ្មើរជើងនៅស៊ីរីនិងអ៊ីរ៉ាក់ដើម្បីពង្រឹងយុទ្ធសាស្ត្ររបស់ខ្លួន។ ការពង្រាយទ័ពថ្មើរជើងនេះក្លាយជាយុទ្ធសាស្ត្រថ្មីមួយទៀត ព្រោះកន្លងមកលោក បារ៉ាក់ អូបាម៉ា តែងតែបដិសេធបញ្ជូនទ័ពថ្មើរជើងអាមេរិកទៅកម្ចាត់ក្រុមភេរវជននៅមជ្ឈិមបូព៌ា។

ក្នុងបទសម្ភាសន៍ជាមួយទូរទស្សន៍ CNBC រដ្ឋមន្ត្រីការពារជាតិអាមេរិលលោក Ashton Carter បានបញ្ជាក់យ៉ាងច្បាស់ថា សម្ព័ន្ធអន្តរជាតិដែលស្ថិតក្រោមការដឹកនាំដោយសហរដ្ឋអាមេរិកនឹងពង្រាយទ័ពថ្មើជើងទៅស៊ីរីនិងអ៊ីរ៉ាក់ដើម្បីច្បាំងកម្ចាត់ក្រុមភេរវជនរដ្ឋឥស្លាមឬក្រុមដែស្ហ។ ការប្រកាសរបស់មន្ត្រីជាន់ខ្ពស់អាមេរិកនេះ បញ្ជាក់ថា សហរដ្ឋអាមេរិកនិងសម្ព័ន្ធមិត្តចាប់ផ្តើមផ្លាស់ប្តូរយុទ្ធសាស្ត្រដើម្បីកម្ចាត់ក្រុមដែស្ហហើយនៅពេលបច្ចុប្បន្ន។

ប្រមុខការពារជាតិខាងលើបានលើកឡើងថា៖ « យើងកំពុងព្យាយាមធ្វើបន្ថែម ពីព្រោះយើងត្រូវការចូលរួមបន្ថែម និងត្រូវការយកជ័យជម្នះលើក្រុមដែស្ហ។ ខ្ញុំមានជំនឿចិត្តថា យើងនឹងឈ្នះ។ ប៉ុន្តែខ្ញុំចង់បង្កើនការប្រយុទ្ធប្រឆាំងក្រុមនេះដើម្បីឆាប់ទទួលជ័យជម្នះ»។

ទាក់ទិនការប្រឆាំងក្រុមភេរវជននេះ លោក Carter បានបញ្ជាក់ផងដែរថា សម្ព័ន្ធអន្តរជាតិកំពុងស្វះស្វែងធ្វើយ៉ាងណាកាត់ផ្តាច់រាល់ការទាក់ទងគ្នារវាងក្រុមភេរវជននៅអឺរ៉ុបនិងស៊ីរី ហើយសហរដ្ឋអាមេរិកនៅតែមានបំណងចង់ពង្រាយកងកម្លាំងក្នុងតំបន់ដើម្បីច្បាំងជំនួសទាហានពួកគេ។

ប៉ុន្តែយ៉ាងណាក៏ដោយ ការបញ្ជូនទ័ពនេះជាការបញ្ជូនទ័ពសម្ព័ន្ធអន្តរជាតិ មិនមែនអាមេរិកបញ្ជូនទ័ពទៅច្បាំងម្នាក់ឯងឡើយ។ ដែលនេះបញ្ជាក់ថាសហរដ្ឋអាមេរិកមិនទៅច្បាំងប្រឆាំងដែស្ហ ឬក្រុមជ្រុលនិយមផ្សេងទៀតម្នាក់ឯងឡើយ។ កន្លងមក លោក បារ៉ាក់ អូបាម៉ា តែងតែបដិសេធការបញ្ជូនទ័ពថ្មើជើងទៅច្បាំងប្រឆាំងក្រុមដែស្ហនៅមជ្ឈិមបូព៌ា ព្រោះលោកយល់ថា ការប្រើប្រាស់ទ័ពថ្មើរជឹងនឹងទាញអាមេរិកឲ្យផុងចូលក្នុងសង្គ្រាមបរទេសងើបមិនរួចជាថ្មី។ ប៉ុន្តែកាលពីឆ្នាំមុន រដ្ឋមន្ត្រីការពារជាតិអាមេរិកបានថ្លែងផ្ទុយពីសម្តីរបស់លោក បារ៉ាក់ អូបាម៉ា ដោយលោកអះអាងថា សហរដ្ឋអាមេរិកមិនបដិសេធការបញ្ជូនទ័ពថ្មើរជើងសម្រាប់វាយប្រហារភេរវជនឡើយ។

សហរដ្ឋអាមេរិកបានដឹកនាំសម្ព័ន្ធអន្តរជាតិតាំងពីឆ្នាំ ២០១៤មកម្ល៉េះ ហើយប្រទេស៦៥ បានចូលរួមក្នុងយុទ្ធនាការតាមកម្ចាត់ក្រុមភេរវជនផងដែរ។ ក្រុមនេះបានបន្តទម្លាក់គ្រាប់បែកប្រឆាំងក្រុមរដ្ឋឥស្លាមនៅអ៊ីរ៉ាក់ និងឆ្លងដែនចូលទឹកដីស៊ីរីដោយគ្មានការអនុញ្ញាតឬយល់ព្រមពីរដ្ឋាភិបាលក្រុងដាម៉ាសឡើយ។ ដូច្នេះហើយទើបមានការរិះគន់ខ្លាំងព្រោះទង្វើរបស់ក្រុងវ៉ាស៊ីនតោននិងសម្ព័ន្ធត្រូវគេចាត់ទុកថាជាការបំពានច្បាប់អន្តរជាតិនិងអធិបតេយ្យរបស់រដ្ឋ។

យ៉ាងណាក៏ដោយ ក្រុមភេរវជនដែស្ហហាក់បីដូចជាចុះថមថយកម្លាំងក្នុងរយៈពេលមួយឆ្នាំចុងក្រោយនេះ ក្រោយរដ្ឋាភិបាលលោក បាសា អាល់អាសាដ កាន់តែរឹងមាំ ដោយសារការជួយជ្រោមជ្រែងខ្លាំងពីសំណាក់រុស្ស៊ី។ រុស្ស៊ីបានសម្រេចចេញច្បាំងប្រឆាំងក្រុមរដ្ឋឥស្លាមនិងការពាររបបដឹកនាំលោក អាសាដ ដោយពង្រាយយន្តហោះចម្បាំង ទាហាន និង ជំនួអាវុធ ក៏ដូចជំនួយហិរញ្ញវត្ថុ។ តែយ៉ាងណាលោក វ្ល៉ាឌីមៀ ពូទីន បានបញ្ជាក់ម្តងហើយម្តងទៀតថា រុស្ស៊ីផ្តល់ការគាំទ្រដល់កងកម្លាំងស៊ីរី តែរុស្ស៊ីមិបញ្ជូនទ័ពថ្មើរជើងទៅច្បាំងប្រឆាំងភេវកម្មនៅមជ្ឈិមបូព៌ាជាដាច់ខាត៕