កញ្ញាសាសា ព្រមយកសំណង និងដកបណ្តឹងលើ លោក សុខ ប៊ុន

ជាតិ

កញ្ញាសាសា ព្រមយកសំណង និងដកបណ្តឹងលើ លោក សុខ ប៊ុន

26, Jan 2016 , 3:48 pm

រូបភាព

ដោយ: ថ្មីៗ

កញ្ញា ឯក សុជាតា ហៅ សាសា យល់ព្រមទទួលយកសំណង និងដកពាក្យបណ្តឹងលើ លោក សុខ ប៊ុន ដែលបានប្រើអំពើហិង្សាលើរូបនាង កន្លងមក។ សេចក្តីសម្រេចនេះ ធ្វើឡើងក្នុងសវនការជំនុំជម្រះរឿងក្តីកញ្ញា សាសា និងលោក សុខ ប៊ុន នៅព្រឹកថ្ងៃទី២៦ មករា នេះ។ សវនការនេះ បានប្រព្រឹតទៅដោយគ្មានវត្តមានរបស់កញ្ញា សាសា និង លោកសុខ ប៊ុន ឡើយ ពោលគឺមានតែវត្តមានរបស់មេធាវីរបស់ពួកគេប៉ុណ្ណោះ។

លោក ពុធ ធាវី មេធាវី ការពារក្តីរបស់ អតីតពិធីការិនី កញ្ញា សាសា បានអះអាងថា កូនក្តីរបស់ខ្លួន សម្រេចចិត្តដកពាក្យបណ្តឹង ដោយទទួលយកសំណងពី លោក សុខ ប៊ុន តាមការសម្របសម្រួលរវាងគ្រួសារដើមបណ្តឹង និងគ្រួសារចុងចោទ។ លោកពន្យល់ពីនីតិវិធីថា កញ្ញាសាសា មានសិទ្ធដកពាក្យបណ្តឹងតែខាងរដ្ឋប្បវេណីប៉ុណ្ណោះ តែរឿងព្រហ្មទណ្ឌ ស្ថិតនៅក្រោមអំណាចតុលាការជាអ្នកសម្រេច។

យ៉ាងណាក៏ដោយ លោក ពុធ ធាវី មិនអាចបញ្ជាក់ពីទំហំទឹកប្រាក់ ដែលភាគីចុងបណ្តឹងផ្តល់ជូនកញ្ញា សាសា នោះទេ។ លោកបានលើកឡើងបែបនេះថា៖«ការដកពាក្យបណ្តឹងនេះ គឺជាសុឆន្ទៈរបស់កូនក្តីខ្ញុំ ដែលយោគយល់ដល់គ្រួសាររបស់លោក សុខ ប៊ុន។ ហើយរឿងសំណងប៉ុន្មាននោះ ខ្ញុំមិនអាចបញ្ជាក់បានទេ ទល់តែសួរជនរងគ្រោះនិងក្រុមគ្រួសារគេផ្ទាល់ ទើបដឹង»។

ជុំវិញបញ្ហានេះ សារព័ត៌មានថ្មីៗមិនអាចសុំអត្ថាធិប្បាយពីសំណាក់ កញ្ញា សាសា ផ្ទាល់ឡើយ ដោយសារតែ ហៅទូរសព្ទទៅចូល តែគ្មានអ្នកទទួល។

សូមរម្លឹកថា អតីតពិធីការិនីទូរទស្សន៍ CTN រូបនេះ ត្រូវបានលោក សុខ ប៊ុន អតីតប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា វាយដំយ៉ាងធ្ងន់ធ្ងរ នៅកោះពេជ្រ កាលពីយប់ថ្ងៃទី២ ឈានចូលថ្ងៃទី៣ ខែកក្កដា ឆ្នាំ២០១៥ ។ លោក សុខ ប៊ុន ត្រូវបានចោទពីបទ«ប្រើប្រាស់អំពើហិង្សាដោយចេតនាមានស្ថានទម្ងន់ទោស»៕