ជាតិ
ពុទ្ធសាសនបណ្ឌិត្យរៀបចំការប្រកួតតែងកំណាព្យ ដើម្បីរំលឹកខួប៩០ឆ្នាំនៃទស្សនាវដ្ដីកម្ពុជសុរិយា
× ភ្នំពេញ៖ ពុទ្ធសាសនបណ្ឌិត្យ នៃក្រសួងធម្មការនិងសាសនា នឹងរៀបចំការប្រកួតប្រជែងតែងកំណាព្យ ក្រោមប្រធានបទ« គម្រប់ខួប៩០ឆ្នាំ នៃការបង្កើតទស្សនាវដ្ដីកម្ពុជសុរិយា» ដើម្បីអបអរសាទរខួបទី៩០ឆ្នាំរបស់ទស្សនវដ្ដីកម្ពុជសុរិយានៅឆ្នាំ២០១៦ នេះ ។
ប្រធានពុទ្ធសាសនបណ្ឌិត្យ លោក ស សុខនី បានបញ្ជាក់ថាពុទ្ធសាសនបណ្ឌិត្យ នឹងរៀបចំការប្រកួតប្រជែងតែងកំណាព្យ ដើម្បីអបអរខួបទី៩០ឆ្នាំរបស់ទស្សនាវដ្ដីកម្ពុជសុរិយា និងដើម្បីលើកតម្កើងស្នាដៃអក្សរសាស្ត្រខ្មែរឡើងវិញផងដែរ។ ។ ការប្រកួតនេះ តម្រូវឲ្យសិស្សនិស្សិត សាស្ត្រាចារ្យ ឬអ្នកមានចំណូលចិត្តក្នុងការនិពន្ធកំណាព្យត្រូវសរសេរកំណាព្យលើប្រធានបទ «គម្រប់ខួប៩០ឆ្នាំ នៃការបង្កើតទស្សនាវដ្ដីកម្ពុជសុរិយា»នេះតែម្ដង។
យោងតាមឯកសារ ទស្សនាវដ្ដីកម្ពុជសុរិយា គឺជាទស្សនាវដ្ដីភាសាខ្មែរដែលចាស់ជាងគេមួយ ត្រូវបានបោះពុម្ពផ្សាយនៅក្នុងព្រះរាជណាចក្រកម្ពុជាលើកដំបូងនៅឆ្នាំ១៩២៦ រហូតមកដល់ឆ្នាំ១៩៧៥ហើយក៏ត្រូវផ្អាកបោះពុម្ពផ្សាយនៅក្នុងរបបកម្ពុជាប្រជាធិបតេយ្យ។ នៅឆ្នាំ១៩៩៤ រហូតដល់ឆ្នាំ២០០៦ទស្សនាវដ្ដីនេះ បានចាប់ផ្ដើមបោះពុម្ពផ្សាយឡើងវិញ ហើយក៏ត្រូវផ្អាកបោះពុម្ពផ្សាយជាលើកទី២ ដោយសារតែគ្មានថវិការគ្រប់គ្រាន់ដើម្បីបោះពុម្ពផ្សាយនៅឆ្នាំ២០០៦។ រហូតដល់ឆ្នាំ២០១៤ ពុទ្ធសាសនបណ្ឌិត្យកម្ពុជាក៏សម្រេចរៀបចំបោះពុម្ពផ្សាយ«ទស្សនាវដ្ដីកម្ពុជសុរិយា»ឡើងវិញ ដោយប្រើប្រាស់ថវិការជំនួយ និងថវិការបានពីការលក់សៀវភៅពីមុនៗរបស់ពុទ្ធសាសនបណ្ឌិត្យ។
ទស្សនាវដ្ដីកម្ពុជសុរិយានេះ គឺជាទស្សនាវដ្ដីមួយ ដែលបានផ្សាយអក្សរសាស្ត្រសាសនា អក្សរសាស្ត្រទូទៅ និងរឿងព្រេងប្រពៃណី ទំនៀមទម្លាប់ខ្មែរ ដែលផ្ដល់ប្រយោជន៍ឲ្យសាធារណជន សិស្ស និស្សិត សាស្ត្រាចារ្យ ធ្វើការសិក្សាស្រាវជ្រាវ។ សព្វថ្ងៃនេះ ពុទ្ធសាសនបណ្ឌិត្យបានកំណត់លើប្រធានបទបី គឺទី១. អក្សរសាស្ត្រសាសនា ដែលពុទ្ធសាសនបណ្ឌិត្យនឹងដក់ស្រង់អក្សរសាស្ត្រក្នុងពុទ្ធសាសនា ទី២.គឺអក្សរសាស្ត្រទូទៅ ដែលមានដូចជារឿងព្រេង កំណាព្យ ប្រលោមលោកជាដើម និងទី៣. គឺកំណត់ព្រឹត្តិការណ៍ធំៗនៅក្នុងព្រះពុទ្ធសាសនា នៅក្នុងប្រទេសកម្ពុជាជាដើមដើម្បីចុះផ្សាយនៅក្នុងទស្សនាវដ្ដីនេះ។
ពុទ្ធសាសនបណ្ឌិត្យ ក៏អំពាវនាវ ផងដែរដល់សាធារណជនណាដែលមានចំណូលចិត្តខាងសរសេរ និងស្រាវជ្រាវ ចង់ចុះផ្សាយអត្ថបទរបស់ខ្លួននៅក្នុងទស្សនាវដ្ដីកម្ពុជសុរិយា ដែលទាក់ទងនិងអងក្សរសាស្ត្រ អក្សរសិល្ប៍ ព្រះពុទ្ធសាសនា ប្រពៃណីទំនៀមទម្លាប់ សិល្បៈ ប្រលោមលោក អត្ថបទបកប្រែនានា អត្ថបទកំណាព្យ អប់រំសីលធម៌និងចរិយាធម៌ និងចំណេះដឹងផ្សេងៗដែលមានប្រយោជន៍ដល់សង្គម អាចទំនាក់ទំនងទៅពុទ្ធសាសនបណ្ឌិត្យបាន។
សូមបញ្ជាក់ថា សម្រាប់ការប្រកួតនេះ បេក្ខជនអាចសរសេរអត្ថបទកំណាព្យ តាមរយៈប្រធានបទខាងលើហើយផ្ញើរទៅពុទ្ធសាសនបណ្ឌិត្យ ដើម្បីឲ្យគណៈកម្មការពិនិត្យ ធ្វើការជ្រើសរើសយកចំណាត់ថ្នាក់លេខ១, ២, និងលេខ៣។ សម្រាប់អ្នកដែលឈ្នះនៅក្នុងការប្រកួតនេះចាប់ពីលេខ១ដល់លេខ៣នឹងទទួលបានទឹកប្រាក់មួយចំនួនដូចជា៖ លេខ១ ទទួលបានទឹកប្រាក់ចំនួន២០០០០០រៀល លេខ២ទទួលបានទឹកប្រាក់ចំនួន១៥០០០០រៀល និងលេខ៣ ទទួលបានទឹកប្រាក់ចំនួន១០០០០០រៀល។ ហើយពុទ្ធសាសនបណ្ឌិត្យ នឹងចាប់ទទួលអត្ថបទចាប់ពីខែមករា រហូតដល់ថ្ងៃទី០២ ខែឧសភា ឆ្នាំ២០១៦ ដោយបេក្ខជនត្រូវនាំយកនូវកំណាព្យចំនួន៥ច្បាប់ រួមទាំងឯកសារដែលបានវាយលើMs. Word ជាយូនីកូដ។ ចំណែកអត្ថបទកំណាព្យ គឺត្រូវតែជាកម្មសិទ្ធិរបស់អ្នកនិពន្ធផ្ទាល់តែម្ដង។
Tag:
ពុទ្ធសាសនបណ្ឌិត្យ
កំណាព្យ
កម្ពុជសុរិយា
© រក្សាសិទ្ធិដោយ thmeythmey.com