ជាតិ
សេដ្ឋកិច្ច
ក្រុមហ៊ុនអាកាសចរណ៍ Thai Smile សម្ពោធជើងហោះហើរត្រង់ពីទីក្រុងបាងកកមកសៀមរាប
× ភ្នំពេញ៖ ក្រុមហ៊ុនដឹកអ្នកដំណើរតាមផ្លូវអាកាសដ៏ធំមួយរបស់ប្រទេសថៃ គឺ Thai Smile Airways បានបើកសម្ពោធជើងហោះហើរត្រង់ពីទីក្រុងបាងកកមកកាន់តំបន់ទេសចរណ៍ខេត្តសៀមរាប។ លោក Woranate Laprabang នាយកប្រតិបត្តិស្តីទីរបស់ក្រុមហ៊ុនអាកាសចរណ៍នេះ មានប្រសាសន៍ថា ក្រុមហ៊ុនរបស់លោកបានមើលឃើញពីកត្តាសក្តានុពលវិស័យទេសចរណ៍របស់កម្ពុជាដែលទាក់ទាញភ្ញៀវទេសចរណ៍មកពីទូទាំងពិភពលោក។
ពិធីសម្ពោធដាក់ឲ្យប្រើប្រាស់ជើងហោះហើរត្រង់ពីទីក្រុងបាងកកមកខេត្តសៀមរាបនេះ បានប្រព្រឹត្តទៅនៅថ្ងៃទី១ខែកុម្ភៈ។ លោក Woranate Laprabang នាយកប្រតិបត្តិស្តីទីរបស់ក្រុមហ៊ុនអាកាសចរណ៍ Thai Smile បានប្រាប់ពីមូលហេតុនៃការវិនិយោគមួយនេះថា កម្ពុជាទាំងបច្ចុប្បន្ន និងអនាគត គឺជាតំបន់ទេសចរណ៍ដែលមនុស្សនៅលើពិភពលោកចង់ដឹង ចង់ឃើញ និងចង់មកទស្សនាជាងគេ ពីព្រោះកម្ពុជាសម្បូរបែបទៅដោយសម្បត្តិវប្បធម៌ និងរមណីយដ្ឋានធម្មជាតិ។ លោក បន្តថា ក្រុមហ៊ុនអាកាសចរណ៍មួយនេះ នឹងដាក់ឲ្យហោះហើរក្នុងជំហានដំបូង ៥ជើងក្នុងមួយសប្តាហ៍។ ក្រុមហ៊ុន Thai Smile Airways ក៏មានគម្រោងបើកសម្ពោធជើងហោះហើរត្រង់ពីប្រទេសចិនមកកម្ពុជាផងដែរ។
លោក ថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថា កន្លងមក មានក្រុមហ៊ុនអាកាសចរណ៍ចំនួន៣ ដែលធ្វើការហោះហើរត្រង់ពីទីក្រុងបាងកកមកខេត្តសៀមរាប ដែលរួមមាន ក្រុមហ៊ុនបាងកកអែរវេ ក្រុមហ៊ុនអង្គរវេ និងក្រុមហ៊ុនអែរអេសៀ។ លោក រំពឹងទុកថា ការបើកសម្ពោធជើងហោះហើរថ្មីនេះ នឹងធ្វើឲ្យលំហូរភ្ញៀវទេសចរអន្តរជាតិគ្រប់ជាតិសាសន៍ចូលមកទស្សនាកម្ពុជាតាមប្រទេសថៃមានការកើនឡើងស្របតាមកិច្ចព្រមព្រៀងរវាងរដ្ឋាភិបាលនៃប្រទេសទាំងពីរ គឺអាណាចក្រពីរគោលដៅទេសចរណ៍តែមួយ។
ប្រភពពី AKP
© រក្សាសិទ្ធិដោយ thmeythmey.com