ពីនេះ ពីនោះ
អំណាចអាចធ្វើឲ្យអ្នកនយោបាយក្អួតឈាមមុនស្លាប់
× ភ្នំពេញ៖ ធ្វើនយោបាយគឺទៅរកអំណាច ពេលបានអំណាចគឺប្រើប្រាស់អំណាច ហើយរក្សាអំណាច នេះជាដំណើរជីវិតរបស់នយោបាយ។ ចំណែកអ្នកនយោបាយបានប្រឹងប្រែងយ៉ាងខ្លាំងក្លាដើម្បីសម្រេចបំណងរបស់ខ្លួនក្នុងវិថីនយោបាយរបស់ខ្លួនដើម្បីទៅរកអំណាច ប្រើប្រាស់អំណាច រក្សា ការពារអំណាច តាមរូបភាពគ្រប់បែបយ៉ាង ហើយអ្នកនយោបាយទាំងនោះបង្ហាញឥទ្ធិពលរបស់ខ្លួនយ៉ាងខ្លាំងទៅលើស្មារតីប្រជាពលរដ្ឋ ដើម្បីឲ្យប្រជាពលរដ្ឋខ្លាច។
ព្រោះតែ ដោយសារតែក្នុងនាមជាអ្នកនយោបាយដែលមានអំណាច មិនថាតែជាអ្នកនយោបាយដែលមានអំណាចនៅក្នុងបក្ស ឬជាអ្នកនយោបាយដែលមានអំណាចនៅក្នុងមុខនាទីជាអ្នកកាន់ការងារស្រុកទេសនោះទេ គឺតែងតែមានអ្នកចង់ចាប់ដៃ មានអ្នកចង់ស្តាប់សំឡេង មានអ្នកចង់ជួប មានអ្នកចង់ឃើញមុខ។ ទោះបីជាអ្នកនយោបាយទាំងអស់នោះជាអ្នកនយោបាយល្អ និងអ្នកនយោបាយអាក្រក់ក៏ដោយ គឺតែងតែមានអ្នកដែលទទួលបានលាភសក្ការ ចង់ហែហមអមដំណើរជាមួយជានិច្ច។ ដែលកត្តានេះបានធ្វើអ្នកនយោបាយមួយចំនួនភ្លេចខ្លួន ហើយសប្បាយជាមួយអ្នកដែលគាំទ្រខ្លួនទាំងនោះ។
ប៉ុន្តែនៅពេលអ្នកនយោបាយលែងមានអំណាច ពេលនោះអ្នកនយោបាយអាចនឹងត្រូវ គេបំភ្លេចចោលអស់ទាំងវីរភាព និងការលះបង់របស់ខ្លួន ហើយវានឹងលែងមានតម្លៃសម្រាប់ប្រជាជនរបស់ខ្លួន។ ពេលខ្លះមិនត្រឹមតែអ្នកនយោបាយទុច្ចរិតទេដែលត្រូវបានប្រជាពលរដ្ឋបំភ្លេចចោលហើយជេរស្ដី សូម្បីតែអ្នកនយោបាយដែលបានបូជាកម្លាំងកាយចិត្តដើម្បីជាតិមួយចំនួនក៏ត្រូវបានគេបំភ្លេចចោលដែរ។
សំដីដែលធ្លាប់និយាយ សន្ទរកថាដែលធ្លាប់ថ្លែងទៅកាន់ហ្វូងមនុស្សរាប់ពាន់រាប់សែន លែងមានន័យសម្រាប់ពលរដ្ឋ។ ដែលចំណុចនេះ ព្រោះតែអំណាចដែលអ្នកនយោបាយបានប្រើខុស ឬប្រើប្រាស់ជាមួយតែមនុស្សដែលឆ្អិនក្បាលស៊ីក្បាល ឆ្អិនកន្ទុយស៊ីកន្ទុយ ចំណែកពលរដ្ឋទូទៅមិនបានទៅបំពេញជូនគាត់។ គេអាចនិយាយថាប្រជាពលរដ្ឋ មានចិត្តអាត្មានិយមចំពោះថ្នាក់ដឹកនាំ និងអ្នកនយោបាយដែលគិតជាពិតប្រាកដ តែវាជារឿងពិតមួយដែលកន្លងទៅសង្គម និងចិត្តប្រជាជនបានបំភ្លេចរួចទៅហើយ។ ព្រោះពលរដ្ឋបានបំភ្លេចចោលនូវស្នាដៃរបស់អ្នកនយោបាយ ហើយលែងខ្វល់ លែងរវីរវល់ និងបុគ្គលទាំងអស់នោះ។
តែទោះជាយ៉ាងណាអ្នកនយោបាយដែលល្អគឺនៅមានអត្ថិភាពច្រើន ក្នុងការចងចាំរបស់ប្រជាពលរដ្ឋ។ តែចំពោះអ្នកនយោបាយទុច្ចរិតគឺអាចនិងត្រូវក្អួតឈាមក្រោយពេលខ្លួនបានបាត់បង់តំណែងតួនាទី អំណាចដែលធ្លាប់តែបញ្ជាគេ ហើយចាកចេញទៅទាំងមិនអស់ចិត្តនៅក្នុងជីវិតនយោបាយរបស់ខ្លួន៕
© រក្សាសិទ្ធិដោយ thmeythmey.com