កីឡាជាតិ
អន្តរជាតិ
ក្លិប Sunderland និងក្រុមហ៊ុន Adidas ចែកផ្លូវពីកីឡាករជាប់រឿងអាស្រូវ Adam Johnson
×![]()
ដោយ: ទេព ពិទូរ្យ
ក្លិប Sunderland បានចេញសេចក្តីថ្លែងការណ៍ថា ខ្លួនបានផ្តាច់កិច្ចសន្យារបស់កីឡាករ Adam Johnson ជាផ្លូវការហើយ។ ភ្លាមៗក្រោយការប្រកាសរបស់ Sunderland ក្រុមហ៊ុនផ្គត់ផ្គង់សម្ភារ Adidas បានប្រកាសលុបចោលកិច្ចសន្យាជាមួយកីឡាករអង់គ្លេសរូបនេះផងដែរ។
បើយោងតាមការចុះផ្សាយរបស់សារព័ត៌មាន BBC ខ្សែបម្រើប្រយុទ្ធ Adam Johnson ត្រូវបានក្លិបឆ្មាខ្មៅ Sunderland ផ្តាច់កិច្ចសន្យារបស់ខ្លួនហើយក្រោយរកឃើញថាមានកំហុសលើសកម្មភាពផ្លូវភេទជាមួយកុមារមិនទាន់គ្រប់អាយុ។ កិច្ចសន្យារបស់ខ្សែបម្រើសញ្ជាតិអង់គ្លេស វ័យ២៨ឆ្នាំរូបនេះត្រូវបានបញ្ចប់ក្រោយរយៈពេល៤ម៉ោងបន្ទាប់ពីដកឈ្មោះចេញពីបញ្ជីកីឡាករដែលត្រូវប៉ះជាមួយនឹងក្រុម Man Utd នៅថ្ងៃសៅរ៍សប្តាហ៍នេះក្នុងក្របខណ្ឌ Premier League។
អតីតកីឡាកររបស់ Manchester City នេះនឹងត្រូវចូលរួមការជំនុំជម្រះក្តីពីរលើកក្នុងករណីធ្វើសកម្មភាពផ្លូវភេទលើកុមារនៅថ្ងៃសុក្រនេះ ដែលលោកធ្លាប់បានបដិសេធម្តងរួចមកហើយ។ លើសពីនេះទៅទៀត Johnson ក៏ត្រូវបានក្រុមហ៊ុនផលិតសម្ភារ Adidas លុបចោលកិច្ចសន្យារបស់ខ្លួនផងដែរ។
សូមបញ្ជាក់ថា Adam Johnson ត្រូវបានឃាត់ខ្លួនម្តងរួចមកហើយកាលពីខែមិនាឆ្នាំ២០១៥ ហើយក្លិបក៏បានព្យួររូបលោកបណ្តោះអាសន្នផងដែរ ប៉ុន្តែបន្ទាប់មកត្រូវបានដកការហាមឃាត់វិញក្រោយមានការចរចាជាមួយនឹងសមាគមន៍តំណាងកីឡាបាល់ទាត់អាជីពនៅក្នុងប្រទេសនេះ៕
© រក្សាសិទ្ធិដោយ thmeythmey.com
