ទេសចរអឺរ៉ុបមកកម្សាន្តខេត្តសៀមរាបធ្លាក់ចុះជាង១៦%ក្នុងឆ្នាំ២០១៥

ជាតិ

សេដ្ឋកិច្ច

ទេសចរអឺរ៉ុបមកកម្សាន្តខេត្តសៀមរាបធ្លាក់ចុះជាង១៦%ក្នុងឆ្នាំ២០១៥

12, Feb 2016 , 3:51 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ ភ្ញៀវទេសចរអន្តរជាតិ ដែលមកកម្សាន្តក្នុងខេត្តសៀមរាបក្នុងឆ្នាំ២០១៥ គឺថយចុះប្រមាណ១០%។ ក្នុងចំណោមភ្ញៀវទេសចរទាំងនោះឃើញថា ទេសចរអឺរ៉ុបដែលជាទេសចរអ្នកមាននោះ ធ្លាក់ចុះជាង១៦% បើធៀបនឹងឆ្នាំ២០១៤ ។

អ្នកនាង អ៊ីសា រ៉ហានី លម្អិតព័ត៌មាននេះ

របាយការណ៍របស់មន្ទីរទេសចរណ៍ខេត្តសៀមរាបបានបង្ហាញថា ទេសចរអឺរ៉ុបចូលមកកម្សាន្តក្នុងខេត្តសៀមរាបក្នុងឆ្នាំ២០១៥ មានចំនួន ៤៥៥,១៨៤នាក់ ស្មើនឹង ២១.៤២%។ តួលេខនេះសបញ្ជាក់ថា ទេសចរអឺរ៉ុបមានការថយចុះ ១៦.២៧% ធៀបនឹងអាត្រាដូចគ្នាកាលពីឆ្នាំ២០១៤ ។

ក្នុងរបាយការណ៍បូកសរុបការងារប្រចាំឆ្នាំ២០១៥ របស់មន្ទីរទេសចរណ៍ខេត្តសៀមរាប បានរកឃើញមូលហេតុមួយចំនួន ចំពោះការធ្លាក់ចុះចំនួនទេសចរអឺរ៉ុប ក្នុងនោះរួមមាន ការទទួលរងទណ្ឌកម្មសេដ្ឋកិច្ចពីសហភាពអឺរ៉ុប និងអាមេរិករបស់ប្រទេសថៃ ដែលបន្តពន្យាពេលបោះឆ្នោតសកលរបស់ខ្លួន។

ទាំងនេះវាគ្រាន់តែជាមូលហេតុខ្លះៗពីខាងក្រៅ ដែលខាងមន្ទីរទេសចរណ៍យកមកពីធ្វើជាទឡ្ហីករណ៍តែប៉ុណ្ណោះ។ សម្រាប់វិស័យឯកជនមើលឃើញហេតុផលផ្សេងក្រៅពីនេះ។ បញ្ហាក្រុមISIS ជារឿងមួយ ការដំឡើងពន្ធរបស់រដ្ឋ ដែលធ្វើឲ្យមានការដំឡើងថ្លៃសេវាកម្មទេសចរណ៍តាមក្រុមហ៊ុនមួយៗ ជាហេតុផលមួយបន្ថែមទៀត។ ការណ៍នេះធ្វើឲ្យមានការដំឡើងថ្លៃបន្ទប់ស្នាក់នៅតាមសណ្ឋាគារ។ល។។ កញ្ញា អុន ដាលី បុគ្គលិកផ្នែកទីផ្សារនៃសណ្ឋាគារ អេមព្រីសអង្គរ បានប្រាប់សារព័ត៌មានថ្មីៗកាលពីពេលថ្មីៗនេះថា គោលការណ៍របស់សណ្ឋាគារ គឺត្រូវដំឡើងថ្លៃរៀងរាល់ឆ្នាំ ដើម្បីស្របទៅនឹងការចំណាយ។ ទាំងប្រាក់ខែបុគ្គលិកត្រូវដំឡើងរាល់ឆ្នាំ ដែលនេះជាគោលការណ៍របស់សណ្ឋាគារ។ នេះជាការបញ្ជាក់បន្ថែមរបស់កញ្ញា ដាលី។ កញ្ញា ដាលី បន្តថា ថ្លៃបន្ទប់គឺដំឡើងចាប់ពី១០%ឡើងទៅ។

«ពាក់ព័ន្ធនឹងក្រុម ISIS ដែលធ្វើឲ្យការហោះហើរគ្មានសុវត្ថិភាព ការធ្លាក់ចុះសេដ្ឋកិច្ចអឺរ៉ុប ដូច្នេះការដើរក្រៅប្រទេសក៏មានកម្រិតដែរ»។ នេះជាការយល់ឃើញរបស់មគ្គុទ្ទេសក៍ទេសចរណ៍ភាសាអាឡឺម៉ង់ លោក ជិន ច័ន្ទមុនី។ សម្រាប់លោក មុនី ពុំមានហេតុផលពីខាងក្នុងណាមួយ ដែលជះឥទ្ធិពលដល់ទេសចរអឺរ៉ុបធ្លាក់ចុះនោះទេ។ «អំឡុងខែ១០ ដល់ខែ១២ ឃើញថា ភ្ញៀវរៀងធ្លាក់បន្តិច ប៉ុន្តែចាប់ពីខែ១មកឃើញថា ភ្ញៀវរៀងងើបឡើងវិញ គួរឲ្យកត់សម្គាល់»។ នេះជាការបញ្ជាក់បន្ថែមរបស់លោក មុនី។

ទេសចរអឺរ៉ុបមកកម្សាន្តក្នុងខេត្តសៀមរាប ជាមធ្យមស្នាក់នៅចាប់ពី២យប់ឡើងទៅ ហើយភាគច្រើនមកជាលក្ខណៈដៃគូ ឫក្រុមគ្រួសារ ខុសពីទេសចរអាស៊ី ដែលនិយមដើរជាក្រុម។ សម្រាប់ទេសចរអឺរ៉ុប ការស្នាក់នៅមិនទៀងទាត់នោះទេ មានន័យថា ខ្លះស្នាក់នៅសណ្ឋាគារមានតម្លៃខ្ពស់ៗ ហើយខ្លះទៀតនិយមគេងនៅផ្ទះសំណាក់ ឫប៊ូទិកជាដើម។

ពិតណាស់ថា ការធ្លាក់ចុះទេសចរអឺរ៉ុប ធ្វើឲ្យចំណូលមានការធ្លាក់ចុះមួយកម្រិតធំ។ ទេសចរអឺរ៉ុប ដែលនិយមដើរបែបឯកជននោះ គឺមានការចំណាយច្រើនជាងទេសចរអាស៊ី។ ទេសចរអាស៊ីតែងមកកម្សាន្តជាក្រុម ហើយរាល់ការចំណាយផ្សេងៗ គឺហូរចូលទៅកញ្ចប់ក្រុមហ៊ុនទេសចរណ៍រួចជាស្រេច មុននឹងគេចេញកម្សាន្ត។ មិនត្រឹមតែប៉ុណ្ណោះ រាល់ការចូលញុំាអាហារ ឫទិញវត្ថុប្រើប្រាស់នានា ក៏គេចូលកន្លែងតែមួយនឹងក្រុមហ៊ុនទេសចរណ៍នោះដែរ ឧទាហរណ៍ដូចជាជនជាតិកូរ៉េ ឫចិនជាដើម។

ទាក់ទងនឹងបញ្ហានេះ ប្រធានសមាគមទីភ្នាក់ងារទេសចរណ៍កម្ពុជាខេត្តសៀមរាប លោក ផាវ ព្រឿន កក់សម្គាល់ថាភ្ញៀវមកពីអឺរ៉ុប ដែលនិយមដើរជាលក្ខណៈគ្រួសារ ឫដៃគូនោះ ពួកគេបានស្ពាយលុយតាមជាប់ខ្លួន សម្រាប់ការចំណាយអំឡុងពេលដើរកម្សាន្ត ដោយមិនបានគ្រោងទុកជាមុន។ សម្រាប់ទេសចរអាស៊ី ដែលចំណូលទាំងអស់ចូលតែក្នុងដៃរបស់ក្រុមហ៊ុនទេសចរណ៍តែមួយកញ្ចប់តែប៉ុណ្ណោះ។

របាយការណ៍ទេសចរអន្តរជាតិចូលមកកម្សាន្តក្នុងខេត្តសៀមរាប មានចំនួនជាង២លាន១សែននាក់ គឺថយចុះជិត១០%។ ទេសចរដែលឈរនៅលំដាប់លេខមួយ គឺជនជាតិចិន បន្ទាប់មកមានកូរ៉េ ជប៉ុន ថៃ អាមេរិក វៀតណាម អង់គ្លេស ម៉ាឡេស៊ី បារាំង និងអូស្ត្រាលី។ យ៉ាងណាក៏ដោយ ក្នុងចំណោមទេសចរទាំងនេះ តួលេខបង្ហាញថាមានការធ្លាក់ចុះគួរឲ្យកត់សម្គាល់ ក្នុងនោះកូរ៉េធ្លាក់ជាង ១២% ជប៉ុនធ្លាក់ជាង១៤%។ មូលហេតុសម្រាប់ទេសចរកូរ៉េ គឺការស្វែងរកគោលដៅទេសចរណ៍ថ្មីៗ និងឳកាសថ្មីសម្រាប់វិនិយោគ។ បច្ចុប្បន្នកូរ៉េបានសម្លឹងឃើញប្រទេសមីយ៉ាន់ម៉ា ដែលជាគោលដៅថ្មីនៅក្នុងតំបន់។ ចំណែកទេសចរជប៉ុនវិញ គឺការកាត់បន្ថយ និងលុបចោលជើងហោះហើរផ្ទាល់ពីជប៉ុនមកសៀមរាប។ល៕