អន្តរជាតិ
កូរ៉េខាងត្បូងកាត់ផ្ដាច់ទឹក និងភ្លើងចូលតំបន់ឧស្សាហកម្មKaesong
× កូរ៉េខាងត្បូងបានកាត់ផ្ដាច់ការផ្គត់ផ្គង់ទឹកនឹងភ្លើងទៅកាន់តំបន់ឧស្សាហកម្មKaesong ដែលស្ថិតក្នុងទឹកដីកូរ៉េខាងជើង ក្រោយពេលប្រកាសបិទតំបន់នេះកាលពីថ្ងៃពុធកន្លងទៅ។ នេះជាវិធានការថ្មីមួយទៀតរបស់រដ្ឋាភិបាលទីក្រុងក្នុងការដាក់សម្ពាធដល់ទីក្រុងព្យុងយ៉ាងដែលបានបាញ់រ៉ុកហ្កែតនិងសាកល្បងគ្រាប់បែកអ៊ីដ្រូសែន។ នេះបើតាមទីភ្នាក់ងារព័ត៌មាន Reuters។
ពីរថ្ងៃក្រោយការប្រកាសផ្អាកសកម្មភាពនៅតំបន់ឧស្សាហកម្មKaesong កូរ៉េខាងត្បូងបានចេញវិធានការថ្មីមួយទៀតគឺផ្ដាច់ទឹកនិងភ្លើងដែលភ្ជាប់ពីកូរ៉េខាងត្បូងទៅកាន់តំបន់នោះ ដើម្បីជាការគាបសង្កត់បន្ថែមទៀតដល់កូរ៉េខាងជើង។ ការផ្អាកការផ្គត់ផ្គង់បានធ្វើឡើង ក្រោយពេលដែលកូរ៉េខាងជើងបានបណ្ដេញបុគ្គលិកកូរ៉េខាងត្បូងចេញពីតំបន់Kaesong និងថែមទាំងបានរឹបអូសទ្រព្យសម្បត្តិទៀតផង។
ជាមួយនឹងគ្នានេះ ក្រសួងបង្រួបបង្រួមកូរ៉េបានបញ្ជាក់ពីការចាកចេញចុងក្រោយរបស់ជនជាតិកូរ៉េខាងត្បូងចំនួន២៨០នាក់ពីតំបន់Kaesong ដែរនៅល្ងាចថ្ងៃទី១១ ខែកុម្ភៈ។ បន្ទាប់ពីការចាកចេញមក កូរ៉េខាងត្បូងក៏ចាប់ផ្ដើមបិទការបញ្ជូនអគ្គីសនីព្រមទាំងទឹកទៅកាន់Kaesong តែម្ដង។
លើសពីនេះទៅទៀត កូរ៉េខាងត្បូងក៏បានព្រមានកូរ៉េខាងជើងដែលផ្អឹបទុកទ្រព្យសម្បត្តិរបស់ជនជាតិកូរ៉េខាងត្បូង ដោយចាត់ទុកនេះជាអំពើខុសច្បាប់។ មួយថ្ងៃក្រោយការប្រកាសបិទរបស់កូរ៉ខាងត្បូង កូរ៉េខាងជើងក៏បានបិទតំបន់ឧស្សាហកម្មនោះដូចគ្នា ហើយបានទុកតំបន់នេះឲ្យស្ថិតក្រោមការត្រួតពិនិត្យរបស់យោធា។ ជនជាតិកូរ៉េទាំងអស់ត្រូវបានបណ្ដេញចេញពីKaesong ហើយពួកគេមិនត្រូវបានអនុញ្ញាតឲ្យយកអ្វីតាមខ្លួនទេ ក្រៅពីរបស់នៅជាប់ខ្លួនប៉ុណ្ណោះ។ ម្យ៉ាងទៀត កូរ៉េខាងជើងក៏បានរឹបអូសទុកវត្ថុធាតុដើម ទំនិញ និងផលិតផលផ្សេងទៀតផងដែរ។
កូរ៉េខាងជើងចាត់ទុកកាrរឹបអូសនេះ ជាការឆ្លើយតបនឹងការសម្រេចចិត្តរបស់កូរ៉េខាងត្បូងដែលបានប្រកាសបិទប្រតិបត្តិការរបស់ក្រុមហ៊ុនទាំង១២៤ កំពុងរកស៊ីនៅKaesong។ ចំណែកកូរ៉េខាងត្បូងឆ្លើយតបវិញថា កូរ៉េខាងជើងត្រូវតែទទួលខុសត្រូវលើផលវិបាកនៃការឹបអូសនេះ។
សូមបញ្ជាក់ថា តំបន់ឧស្សាហកម្មKaesong គឺជានិមិត្តរូបនៃការបង្រួបបង្រួមកូរ៉េទាំងពីរ ដែលបានបើកដំណើរការកាលពីឆ្នាំ២០០៤ ក្រោមគំនិតផ្ដួចផ្ដើមរបស់អតីតប្រធានាធិបតីកូរ៉េខាងត្បូងលោក គីម ដេជុង។ ជនជាតិកូរ៉េខាងជើងជាង៥ម៉ឺននាក់បានធ្វើការក្នុងសហគ្រាសតូចធំចំនួន១២៤រោងចក្រដែលមានម្ចាស់ជាជនជាតិកូរ៉េខាងត្បូង ហើយក្រុមពលករទាំងនោះថែមទាំងស្គាល់រសជាតិរស់នៅតាមរបៀបកូរ៉េខាងត្បូងទៀតផង។
ជាការកត់សម្គាល់នេះ តំបនKaesong នេះកម្រនឹងបិទណាស់ បើទោះជាទំនាក់ទំនងរវាងកូរ៉េខាងត្បូងនិងកូរ៉េខាងជើងតែងតែល្អក់កករក៏ដោយ។ នេះជាលើកទី២ ដែលតំបនឧស្សាហកម្មរួមគ្នានេះបិទមិនដំណើរការ ខណៈលើកទី១ គឺកាលពីឆ្នាំ២០១៣ នៅពេលដែលទីក្រុងព្យុងយ៉ាងសាកល្បងអាវុធនុយក្លេអ៊ែរលើកទី៣របស់ខ្លួន៕
Tag:
កូរ៉េខាងត្បូង
កូរ៉េខាងជើង
Kaesong
© រក្សាសិទ្ធិដោយ thmeythmey.com