ជាតិ
បទវិភាគ
ពីនេះ ពីនោះ
ឪពុកម្តាយច្បាស់ជាសប្បាយចិត្ត Valentine’s Day ចំថ្ងៃអាទិត្យ កូនៗអត់រៀន
× ដំណឹងល្អ! ដំណឹងល្អ! លោកឪពុក-អ្នកម្តាយទាំងឡាយ សូមកុំមានការព្រួយបារម្ភចំពោះកូនឲ្យសោះ។ ទិវានៃក្តីស្រឡាញ់ (Valentine’s Day) នឹងប្រារព្ធនៅថ្ងៃអាទិត្យ ទី១៤ ខែកុម្ភៈនេះ ពោលគឺថ្ងៃដែលសិស្សត្រូវសម្រាក ដូច្នេះកូនៗ នឹងមានពេលវេលាគ្រប់គ្រាន់ដើម្បីបង្ហាញក្តីស្រឡាញ់ចំពោះលោក-អ្នក ជាពិសេសកូនៗដែលតែងតែទទួលឥទ្ធិពលពីវប្បធម៌បរទេស។
ថ្ងៃទី១៤ កុម្ភៈ ឬទិវានៃក្តីស្រឡាញ់ (Valentine’s Day ជាភាសាអង់គ្លេស ឬ Saint-Valentin ជាភាសាបារាំង) បានចាប់ផ្តើមឡើងពីបណ្តាប្រទេសក្នុងទ្វីបអឺរ៉ុប ពោលគឺនៅក្នុងទីក្រុងរ៉ូម ប្រទេសអ៊ីតាលី ហើយបន្តរាលដាលពាសពេញពិភពលោក រួមទាំងកម្ពុជាផងដែរ។
កន្លងមក ឪពុកម្តាយមានការព្រួយយ៉ាងខ្លាំងចំពោះកូនៗ ជាពិសេសការប្រារព្ធទិវាលោកខាងលិចមួយនេះ នៅចំថ្ងៃដែលសាលាបើកទ្វារ ដូច្នេះ ពួកគាត់មានការពិបាកក្នុងការគ្រប់គ្រងកូនៗ ពីព្រោះយុវជនដ៏ភ្លើតភ្លើនមួយចំនួន បានកែប្រែនិយមន័យដើមនៃ Valentine’s Day ទៅបុណ្យសង្សារ។
«បុណ្យសង្សារ»? មានន័យថា «សង្សារស្លាប់»?។ ទេមិនមែនទេ។ ពាក្យថា «បុណ្យសង្សារ» នេះ គឺក្នុងន័យដែលយុវវ័យមួយចំនួនគិតថា ជាថ្ងៃដែលត្រូវបង្ហាញភាពស្មោះ ឬស្នេហ៍ពិត តាមរយៈជូនផ្កាកូឡាប ឬវត្ថុអនុស្សាវរីយ៍ផ្សេងៗ ហើយអ្វីដែលជ្រុលហួសហេតុថែមទៀតនោះ គឺយុវតីខ្លះ ហ៊ានសម្ពោធព្រហ្មចារីរបស់ខ្លួនដើម្បីបង្ហាញភាពស្មោះ ដោយមិនចាំបាច់រង់ចាំការស៊ើបអង្កេតទ្រង់ទ្រាយធំ។
«បុរាណមិនយឺត ទំនើបមិនបរទេស» ជាទស្សនាទានមួយរបស់រដ្ឋាភិបាលកម្ពុជាក្នុងពង្រឹងគ្រឹះវប្បធម៌ខ្មែរ។ ពិតណាស់ យើងមិនអាចហាមឃាត់ការជ្រៀតចូលវប្បធម៌បរទេសបាននោះឡើយ ប៉ុន្តែការប្រារព្ធដែលមិនគិតគូពីគុណតម្លៃជាតិ នឹងមានផលប៉ះពាល់ជាអវិជ្ជមាន។ ទិវាមាតា ទិវាបិតា ជាដើមនោះ ក៏ជះឥទ្ធិពលពីបរទេសផងដែរ ប៉ុន្តែវាបាននូវប្រយោជន៍ជាច្រើនទាក់ទងតម្លៃនៃគុណធម៌ ការដឹងគុណ។
មិនជាបញ្ហាឡើយសម្រាប់យុវជនមួយចំនួន ដែលចាត់ទុកថ្ងៃ «Valentine’s Day» ជាថ្ងៃធម្មតា ប៉ុន្តែសម្រាប់យុវជនដែលគិតថា ថ្ងៃនេះជាថ្ងៃសំខាន់ដើម្បីបង្ហាញនូវក្តីស្រឡាញ់ ពេលវេលាបានមកដល់ហើយពីព្រោះថ្ងៃអាទិត្យ គឺជាថ្ងៃសម្រាកពីការសិក្សា ដូច្នេះ វាជាឱកាសសម្រាប់កូនៗធ្វើទង្វើដើម្បីបង្ហាញក្តីស្រឡាញ់ចំពោះឪពុកម្តាយ បងប្អូន។
ទោះបីជាយ៉ាងណាក៏ដោយ សិទ្ធិយុវវ័យក៏មិនគួរត្រូវបិទទាំងស្រុងនោះដែរ។ កន្លងមក ខណៈយុវជនមួយចំនួនប្រារព្ធ Valentine’s Day ដោយគ្មានការពិចារណា យុវជនមួយចំនួនទៀតយកថ្ងៃនេះដើម្បីបង្ហាញក្តីស្រឡាញ់ចំពោះមនុស្សទូទៅតាមរយៈសកម្មភាពសប្បុរស ទាំងផ្នែកកីឡា សិល្បៈ ឬការបរិច្ចាគឈាម ជាដើម។
ក្រសួងអប់រំ យុវជន និងកីឡា ក្រសួងវប្បធម៌ និងវិចិត្រសិល្បៈ សុទ្ធតែបានក្រើនរំលឹកដល់យុវវ័យកុំឲ្យមានការភ្លើតភ្លើនហួសហេតុ។ អបអរសាទរចំពោះយុវជនមួយចំនួនដែលយល់ច្បាស់ពីទិវានេះ ប៉ុន្តែលោកឪពុក-អ្នកម្តាយសូមកុំភ្លេចទូរសព្ទរកកូនៗផងដែរ ប្រសិនបើពូកគេចេញពីផ្ទះយូរម៉ោង ដើម្បីពួកគេលង់ហើយភ្លេចខ្លួនថា ១៤កុម្ភៈ ជាទិវានៃក្តីស្រឡាញ់ មិនមែន ថ្ងៃបុណ្យសង្សារនោះឡើយ។
ព្រឹទ្ធចារ្យ មៀច ប៉ុណ្ណ អ្នកជំនាញស្រាវជ្រាវប្រពៃណីទំនៀមទម្លាប់ខ្មែរ ដែលបានទទួលមរណភាពកាលពីឆ្នាំ២០១២ នោះ ធ្លាប់បានបង្ហាញការខកចិត្តយ៉ាងខ្លាំងចំពោះទង្វើរបស់យុវជនមួយចំនួនទាក់ទងនឹងការប្រារព្ធប្រពៃណីបរទេសមួយនេះ។ លោកបានចាត់ទុក Valentine's Day ថា ជា «ប្រពៃណីប្រហារ»។
សម្រាប់ «Valentine’s Day» ឆ្នាំនេះ សង្ឃឹមថា អ្វីៗនឹងមានការប្រែប្រួលជាវិជ្ជមាន ហើយជឿជាក់សណ្ឋាគារ-ផ្ទះសំណាក់ ច្បាស់ជាមិនសូវមានភ្ញៀវជាយុវវ័យដែលសម្រាកត្រឹមតែ១៥នាទី ១ម៉ោង ២ម៉ោង ឬ៣ម៉ោង ដូចឆ្នាំមុនៗនោះឡើយ៕
© រក្សាសិទ្ធិដោយ thmeythmey.com