ពីនេះ ពីនោះ
បោះឆ្នោតឃុំ-សង្កាត់៖ ប្រយ័ត្នសង្គ្រោះជាតិគិតមិនដល់!
× លិខិតមិត្តអ្នកអាន
ដោយ រស់ វត្ថារ៉ា
ពលរដ្ឋនៅក្នុងស្រុកល្វាឯម
កំណើនអាសនៈរបស់គណបក្សសង្គ្រោះជាតិ ពិតណាស់គឺកើតចេញពីការច្របាច់បញ្ចូលគ្នារវាងគណបក្សសិទ្ធិមនុស្សរបស់លោក កឹម សុខា និងគណបក្សសមរង្ស៊ី របស់លោក សម រង្ស៊ី។ បើទោះជាមិនបានឡើងកាន់អំណាច ប៉ុន្តែជ័យជំនះនេះ បានបង្ហាញយ៉ាងច្បាស់ថាវាជាសមិទ្ធផលនៃការច្របាច់បញ្ចូលគ្នារវាងថ្នាក់ដឹកនាំខាងលើ សម រង្ស៊ី និងកឹម សុខា។ ចុះចំណែកថ្នាក់ឃុំសង្កាត់? អ្នកខ្លះជាអតីតសមាជិកក្រុមប្រឹក្សាឃុំសង្កាត់មកពីសិទ្ធិមនុស្ស ខ្លះមកពីបក្សសម រង្ស៊ី។ តើពួកគេពិតជាត្រូវរ៉ូវគ្នា១០០ ភាគរយដូចថ្នាក់លើដែរ? ហើយចុះសង្គ្រោះជាតិបានគិតដល់ធនធានទាំងនោះដែរទេ?
តើពួកគេពិតជាត្រួវរ៉ូវគ្នា១០០ភាគរយ? ពិតណាស់មិនអាចទេ! មិនអាចនៅត្រង់ថា សមាជិកថ្នាក់ក្រោម ពួកគេមានអតីតកាលផ្សេងគ្នា មានតួនាទីក្នុងឃុំ ឬសង្កាត់មកពីគណបក្សខុសគ្នា គឺសិទ្ធិមនុស្ស និងសង្គ្រោះជាតិ។ បញ្ហានៅត្រង់ថាសម្រាប់ឆ្នាំ២០១៧ នៅក្នុងឃុំ ឬសង្កាត់ណាមួយ សង្គ្រោះជាតិត្រូវដាក់បេក្ខជនជាប្រធានក្រុមប្រឹក្សា ដែលមានអតីមកពីគណបក្សសិទ្ធិមនុស្ស ឬ សមរង្ស៊ី?
និយាយដល់ចំណុចខាងលើនេះ បើសង្គ្រោះជាតិបានគិតដល់មែននោះ គណបក្សជំទាស់មួយនេះ អាចឆ្លងផុតឧបសគ្គមួយហើយ។ ប៉ុន្តែប្រសិនបើមិនបានគិតដល់ទេ ហើយគួបផ្សំនឹងនយោបាយទិញទឹកចិត្តពីគណបក្សសម្បូរធនធានផងនោះ បញ្ហានេះទំនងជាអាចធ្វើឲ្យគណបក្សសង្គ្រោះជាតិវិលមុខក៏ថាបាន។ សូមកំភ្លេចថា អ្នកគាំទ្រគណបក្សសង្គ្រោះជាតិមួយចំនួនកំពុងស្ថិតក្នុងស្ថានភាពអាក់អន់ស្រពន់ចិត្តនឹងការចូលសភារបស់ថ្នាក់ដឹកនាំខ្លួន កាលពីឆ្នាំ២០១៤នៅឡើយទេ។
តើសង្គ្រោះជាតិបានសម្លឹងឃើញកំណែងទម្រង់ធនធានមនុស្សថ្នាក់ឃុំសង្កាត់ដែរឬទេ? ចម្លើយយ៉ាងងាយ គឺគណបក្សមួយនេះទំនងជាបានសម្លឹងឃើញបញ្ហានេះហើយ។ ចុះប្រសិនបើមិនបានគិតដល់ តើអ្វីជាប្រភពនៃបញ្ហាមួយនេះ? ហើយវានឹងទៅជាយ៉ាងម៉េចវិញ?
សូមបកក្រោយបន្តិច ដើម្បីរម្លឹកអំពីដំណាក់កាលកវែកកឆ្នាំរបស់គណបក្សសិទ្ធិមនុស្សដែលជាផ្នែកមួយនៃសង្គ្រោះជាតិ។ ពោលគឺមុនការបោះឆ្នោតក្រុមប្រឹក្សាឃុំសង្កាត់កាលពីឆ្នាំ២០១២។ ដោយសារតែជាបក្សថ្មី កាលនោះគេអាចវាយតម្លៃបានថាឯកឧត្តម កឹម សុខា ប្រឹងតែ ព្យាយាមស្វែងរក ហើយបន្ទាប់មកគឺពង្រាយសមាជិកខ្លួនឈរជាសមាជិកក្រុមប្រឹក្សាឃុំ សង្កាត់អោយបានគ្រប់ខេត្តតាមតែអាចធ្វើទៅបាន។
ប្រភពធនធានមានដូចជា អតីតជាគ្រូបង្រៀន មន្ត្រីចូលនិវត្តន៍ អាចារ្យធំក្នុងវត្ត និងអតីតបញ្ញវន្តសេសសល់ពីសម័យសង្គ្រាមមួយចំនួនធំ ត្រូវបានគណបក្សប្រជាជនកម្ពុជាប្រមូលមកធ្វើជាមសមាជិករបស់ខ្លួន ហើយដែលក្នុងចំណោមនោះ ត្រូវបានគណបក្សមួយនេះចាត់ចែងអោយធ្វើជាបេក្ខជនឈរឈ្មោះបោះឆ្នោតឃុំសង្កាត់។
ធនធានក្នុងមូលដ្ឋានដែលនៅសេសសល់ពីនេះ គឺជាអតីតអ្នកគាំទ្រគណបក្សហ្វ៊ុនស៊ិនប៉ិចដែលបានមករួមរស់ជាមួយគណបក្សជាតិខ្មែរ ហើយបន្ទាប់មកប្រែជាគណបក្សសមរង្ស៊ី។ នៅតាមឃុំសង្កាត់ ធនធានទាំងនេះ ជាក្រុមអ្នកតស៊ូ និងប្រឈមមុខខ្លាំងជាមួយធនធានរបស់គណបក្សប្រជាជនកម្ពុជានៅតាមមូលដ្ឋាន។
សរុបមកវិញ តើនៅតាមមូលដ្ឋានឃុំសង្កាត់ មានធនធានមនុស្សល្អៗប៉ុន្មាននាក់ នៅសេសសល់សម្រាប់គណបក្សសិទ្ធិមនុស្សរបស់ឯកឧត្តម កឹម សុខា? ចម្លើយគឺមានខ្លះ ហើយដែលអាចមានប្រភពមកពីក្រុមអ្នកអាក់អន់ស្រពន់ចិត្ត ឬប្រជែងក្នុងជួរបក្សឯង ដូចជាមកពីគណបក្សហ្វ៊ុនស៊ិនប៉ិច និងគណបក្សសម រង្ស៊ីជាដើម។ ចុះចំណែកគណបក្សប្រជាជនកម្ពុជា! មិនងាយទេ គណបក្សនេះអាចមិនពូកែរក្សាសម្លេងពីពលរដ្ឋ ប៉ុន្តែរឿងសមាជិក ឬមន្ត្រីវិញ គេមិនងាយអោយរបូតចេញឡើយ។
តាមការសង្កេត ប្រឈមនឹងស្ថានភាពនេះ កាលនោះគណបក្សសិទ្ធិមនុស្សរបស់ឯកឧត្តម កឹម សុខា បានសម្រេចយកវិធីឈ្នះៗមួយ គឺ«ប្រមូលទាំងអស់ យកទាំងអស់ ទោះជាតុបាក់ជើង ឬក្អមបែកមាត់ក៏មិនចោលដែរ»។
ការសម្រេចចិត្តនេះបានរុញច្រានឲ្យគណបក្សសិទ្ធិមនុស្សកាលនោះ ឈ្នះបានអានៈឃុំសង្កាត់មិនច្រើនដូចគណបក្សប្រជាជនកម្ពុជា និងគណបក្សសមរង្ស៊ីឡើយ។ ហេតុអ្វី? ចម្លើយអាចមានច្រើនយ៉ាង។
ទីមួយ គឺដោយសារតែគណបក្សសិទ្ធិមនុស្សជាគណបក្សថ្មីថ្មោង គេទើបស្គាល់លោក កឹម សុខា ខ្លាំងបន្ទាប់ពីលោកជាប់គុកជាមួយសកម្មជនសិទ្ធិមនុស្ស និងអ្នកនយោបាយមួយចំនួន ដូចជាលោក ម៉ម សូណង់ដូ ជាដើម។
ទីពីរ គឺដោយសារតែគណបក្សប្រជាជនកម្ពុជា និងគណបក្សសមរង្ស៊ី មានធនធានច្រើនជាង ចាយលុយច្រើនជាង ចែកអំណោយច្រើនជាង ទើបបានជារកសំឡេងជូនសមាជិកឃុំសង្កាត់ខ្លួនបានច្រើនជាងគណបក្សសិទ្ធិនុស្ស។
និងទី៣ គឺដោយសារតែនយោបាយ«តុបាក់ជើងក៏យក ក្អមបែកមាត់ក៏មិនចោល»។ បញ្ហានៅត្រង់ថា សមជិកបក្សសិទ្ធិមនុស្សដែលឈរឈ្មោះនាកាលនោះ ភាគច្រើនជាបុគ្គល មានចំណេះដឹងមិនជ្រៅជ្រះប៉ុន្មានឡើយ ឬជាអ្នកចាញ់ប្រៀបគេនៅក្នុងជួរសមាជិកឃុំសង្កាត់របស់គណបក្សសមរង្ស៊ី និងហ្វ៊ុនស៊ិនប៉ិច ហើយក៏អាចមានខ្លះជាបុគ្គល ដែលអ្នកភូមិមិនសូវរាប់រក និងអោយតម្លៃដែរ។
សូមកុំភ្លេចថា ពលរដ្ឋបានបែងចែកយ៉ាងច្បាស់អំពីអ្វីទៅជាការបោះឆ្នោតឃុំសង្កាត់ អ្វីទៅជាការបោះឆ្នោតតំណាងរាស្ត្រ ឬរើសនាយករដ្ឋមន្ត្រី។ បោះឆ្នោតឃុំសង្កាត់ ពួកគាត់មើលលើសមត្ថភាពបុគ្គល និងស្ថានភាពគ្រួសាររបស់បុគ្គលដែលឈរឈ្មោះ ដោយមិនខ្វល់ថាមកពីគណបក្សណានោះទេ។ ចុះបើបុគ្គលទាំងនេះ ត្រូវបានគណបក្សសម្បូរធានធានប្រមូលអស់ហើយនោះ។ តើពលរដ្ឋអាចមកគាំទ្រ«តុបាក់ជើង ឬក្អមបែកមាត់របស់លោក កឹម សុខា ដែរឬ? ចម្លើយទោះមានក៏មិនច្រើនដែរ។
ងាកមកមើលការបោះឆ្នោតឃុំសង្កាត់ ឆ្នាំ២០១៧ ខាងមុខនេះវិញ គណបក្សសង្គ្រោះជាតិ មានកិច្ចការចំបាច់មួយដែរ ដែលត្រូវតែដោះស្រាយឲ្យបានមុនការបោះឆ្នោតមកដល់។ បញ្ហានោះ គឺនៅត្រង់ថា តើគួររៀបចំរចនាសម្ព័ន្ធអ្នកឈរឈ្មោះបោះឆ្នោតឃុំសង្កាត់យ៉ាងដូចម្ដេច? ចុះបើចង់កំណែទម្រង់ នោះមិនមានសកម្មជនខ្លះនិយាយថា ពេលតស៊ូត្រូវការ«អញ» ពេលជិតជោគជ័យបោះ«អញ»ទេឬ? នេះជាបញ្ហាមួយ។
មួយទៀត ដាក់បេក្ខជនមានអតីតមកពីគណបក្សសិទ្ធិមនុស្សអោយឈរជាបេក្ខភាពមេឃុំ ចៅង្កាត់ ចុះចំណែកបេក្ខជនមានអតីមកពីគណបក្សសមរង្ស៊ី ដែលខំតស៊ូកាត់ព្យុះភ្លៀងប្រជែងជាមួយគណបក្សប្រជាជនកម្ពុជារាប់ឆ្នាំមកហើយនោះ ពួកគេសុខចិត្តទេ? អាចខ្លះសុខចិត្ត ប៉ុន្តែគ្មាននរណាមានចិត្តជាព្រះទាំងអស់នោះទេ។
ប្រសិនបើគណបក្សសង្គ្រោះជាតិគិតដល់ ហើយមានដំណោះស្រាយលើបញ្ហាខាងលើ នោះ សម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១៧ខាងមុខ គណបក្សមួយនេះរង់ចាំតែទប់ជាមួយគណបក្សប្រជាជនកម្ពុជាប៉ុណ្ណោះ។ ប៉ុន្តែបើសង្គ្រោះជាតិគិតមិនដល់នោះច្បាស់ណាស់ គឺទប់គណបក្សប្រជាជនផង និងថ្នមស្ថានការណ៍ផ្ទៃគ្នាផងមិនខានឡើយ៕
© រក្សាសិទ្ធិដោយ thmeythmey.com