រដូវប្រាំង ផ្លែអំពិលទឹក ជួយបង្កើនប្រាក់ចំណូលពលរដ្ឋនៅសង្កាត់ព្រែកព្នៅ

ជាតិ

រដូវប្រាំង ផ្លែអំពិលទឹក ជួយបង្កើនប្រាក់ចំណូលពលរដ្ឋនៅសង្កាត់ព្រែកព្នៅ

14, Feb 2016 , 8:59 pm

រូបភាព

ដោយ:

ភ្នំពេញ៖ ចាប់ពីរដូវរំហើយ រហូតដល់ជិតចូលឆ្នាំខ្មែរ ផ្លែអំពិលទឹក បានក្លាយជាមុខរបរដ៏ពេញ និយមរបស់ពលរដ្ឋនៅសង្កាត់ព្រែកព្នៅ ក្នុងខណ្ឌព្រែកព្នៅ ដែលបាននាំគ្នាលក់ព្រោងព្រៀត នៅតាមដងផ្លូវ ពីផ្សារព្រែកព្នៅឆ្ពោះទៅកាន់ភ្នំបាសិត។ ចេញដំណើរពីផ្សារព្រែកព្នៅប្រហែល១គីឡូមែត្រ ពលរដ្ឋជាច្រើនគ្រួសារបានប្រកបរបរលក់ផ្លែអំពិលទឹក ដើម្បីចិញ្ចឹមជីវិត។ ក្នុងមួយថ្ងៃ គ្រួសារនីមួយៗ អាចរកចំណូលបានពី៧ម៉ឺនរៀល ដល់១០ម៉ឺនរៀល។

អំពិលទឹក មួយកញ្ច្រែងតម្លៃ១ម៉ឺនរៀល គឺជាតម្លៃថ្លៃគួរសម។ ប៉ុន្តែ អំពិលទឹកទាំងនេះ មិនមែនពួកគាត់ដាំដោយខ្លួនឯងនោះទេ គឺពួកគាត់បានទៅប្រមូលទិញពីពលរដ្ឋដទៃទៀតនៅភូមិក្បែរគ្នា។ អំពិលទឹក មួយដើម មានតម្លៃទៅតាមទំហំ និងផ្លែច្រើន ឬតិច។ ពលរដ្ឋនៅទីនេះ ភាគច្រើន គឺមានស្រុកកំណើតនៅខេត្តព្រៃវែង ដែលបានមករស់នៅអមសងខាងផ្លូវឆ្ពោះទៅកាន់រមណីដ្ឋានភ្នំបាសិត។ ពួកគេ លក់ដូរបន្តិចបន្តួចទៅតាមរដូវកាល។ រដូវមានផ្លែឈូក ពួកគេលក់ផ្លែឈូក និងផ្កាឈូក។ តែបើរដូវប្រាំង ពួកគេ លក់ផ្លែអំពិលទឹក និងផ្កែឈូកតិចតួច ដើម្បីបំពេញតម្រូវការពលរដ្ឋនៅទីនេះ និង ភ្ញៀវទេសចរទៅកំសាន្តនៅភ្នំបាសិត។

សូមអញ្ជើញទស្សនារូបភាពខាងក្រោមនេះ៖