ថៃ និងវៀតណាម សាទរការបង្ហូរទឹករបស់ចិនក្នុងការឆ្លើយតបនឹងគ្រោះរាំងស្ងួត

សង្គមអន្តរជាតិ

អន្តរជាតិ

ថៃ និងវៀតណាម សាទរការបង្ហូរទឹករបស់ចិនក្នុងការឆ្លើយតបនឹងគ្រោះរាំងស្ងួត

20, Mar 2016 , 9:40 pm

រូបភាព

ដោយ:

បញ្ហាគ្រោះរាំងស្ងួត បាននិងកំពុងតែវាយប្រហារទៅលើប្រទេសតាមដងទន្លេមេគង្គក្នុងតំបន់ជាច្រើន ជាពិសេសនោះ គឺនៅប្រទេសថៃ និងវៀតណាម។ ស្របជាមួយនឹងបញ្ហានេះ ចិនដែលជាប្រភពដ៏ធំនៃទន្លេមេគង្គ បានចេញគោលនយោបាយមួយក្នុងការបង្ហូរទឹកចេញពីទំនប់វារីអគ្គិសនីរបស់ខ្លួនដើម្បីសង្គ្រោះបន្ទាន់ដល់ប្រទេសមេគង្គក្រោមដែលកំពុងរងនូវគ្រោះរាំងស្ងួតផងដែរ។

នាយករដ្ឋមន្ត្រីថៃ លោកប្រាយុទ្ធ ច័ន្ទ អូចា នៅថ្ងៃទី១៨ ខែមីនា បានអះអាងថា លោកពិតជារីករាយ ដែលបានឃើញរដ្ឋាភិបាលចិន បង្ហូរទឹកដើម្បីជួយកាត់បន្ថយគ្រោះរាំងស្ងួតនៅក្នុងប្រទេសថៃ។ លោក បានបញ្ជាក់ផងដែរថាទឹកដែលបង្ហូរនោះ បានទៅដល់ភាគជើងនៃប្រទេសថៃហើយ។

ថៃ បានរងនូវបញ្ហាគ្រោះរាំងស្ងួតយ៉ាងធ្ងន់ធ្ងរនៅក្នុងរយៈពេលពីរទសវត្សរ៍ ដោយទំនប់ ទឹកបានបម្រុងទឹកទុកក្នុងកម្រិតទាបបំផុតតាំងពីឆ្នាំ១៩៩៤ ហើយ ចុងក្រោយនេះ ស្រុកចំនួន១៦ ក្នុងខេត្តចំនួន១២ បានប្រកាសក្នុងតំបន់មហន្តរាយនៃគ្រោះរាំងស្ងួត។ ហើយដោយសារតែបញ្ហានេះផងដែរ អាជ្ញាធរក្រុងបាងកក ក៏បានដាក់បម្រាមទៅកាន់ប្រជាជនក្នុងការកាត់បន្ថយការលេងបាចទឹកដែលជាល្បែង និងពីធីមួយដ៏ពេញនិយមរបស់ថៃនៅក្នុងឱកាសនៃសង្ក្រានឆ្នាំថ្មីផងដែរ។

ជុំវិញបញ្ហាគ្រោះរាំងស្ងួតនេះដែរ អ្នកនាំពាក្យក្រសួងការបរទេសចិន លោក លូ គាំង បានប្រកាសនៅថ្ងៃទី១៥ ខែមីនា កន្លងទៅថា ចិន នឹងបង្ហូរទឹកសម្រាប់ការផ្គត់ផ្គង់ជាបន្ទាន់ពីស្ថានីយ៍វារីអគ្គិសនីក្នុង ខេត្ត Yunnaទៅកាន់ទន្លេមេគង្គក្រោមចាប់ពីថ្ងៃទី១៥ ខែមីនា រហូតដល់ថ្ងៃទី១០ ខែមេសា។ លោក លូ ក៏បានបន្ថែមដែរថា ចិន ពិតជាមានឆន្ទៈក្នុងបង្កើនកិច្ចសហប្រតិបត្តិការពិតប្រាកដជាមួយប្រទេសពាក់ ព័ន្ធដោយយោងតាមយន្តការនៅក្នុងការគ្រប់គ្រងធនធានទឹក និងការឆ្លើយតបគ្រោះមហន្តរាយដើម្បីជាប្រយោជន៍សម្រាប់ប្រជាជននៅក្នុងតំបន់។

តាមរយៈការបង្ហូរទឹកសង្គ្រោះបន្ទាន់នេះ មិនត្រឹមតែជួយកាត់បន្ថយគ្រោះរាំងស្ងួតនៅក្នុងប្រទេសថៃ នោះទេ តែវៀតណាមដែលស្ថិតតាមដងទន្លេមេគង្គក៏ទទួលបានផលប្រយោជន៍ផងដែរ។ អតីតអនុរដ្ឋ មន្ត្រីកសិកម្ម និងអភិវឌ្ឍន៍ជនបទវៀតណាមលោក Pham Hong Giang បានអះអាងថា ការបង្ហូរទឹក របស់ចិន សម្រាប់ទន្លេមេគង្គគឺជាគោលនយោបាយកិច្ចសហប្រតិបត្តិការ។

ជាមួយគ្នានេះ អ្នកជំនាញវៀតណាម ក៏បានបញ្ជាក់ដែរថា តំបន់ជាច្រើននៃវៀតណាមកំពុងតែត្រូវការ ទឹក ហើយនៅពេលដែលទឹកដែលចិនបង្ហូរតាមដងទន្លេមេគង្គមកដល់ប្រទេសវៀតណាមដែរនោះ វានឹងជួយសង្គ្រោះតំបន់ទាំងនោះពីគ្រោះរាំងស្ងួតមួយភាគដែរ។

សូមបញ្ជាក់ផងដែរថា ទន្លេមេគង្គមានប្រភពធំនៅក្នុងប្រទេសចិន ហើយទន្លេនេះ ក៏ហូរកាត់ប្រទេស អាស៊ានប្រាំផងដែរ។ ក្នុងនោះរួមមាន មីយ៉ាន់ម៉ា ឡាវ ថៃ កម្ពុជា និង វៀតណាម៕