អាជ្ញាធរអប្សរារកឃើញទូកបុរាណកប់ក្នុងខ្សាច់នៅខេត្តសៀមរាប

ជាតិ

អាជ្ញាធរអប្សរារកឃើញទូកបុរាណកប់ក្នុងខ្សាច់នៅខេត្តសៀមរាប

09, Apr 2016 , 3:01 pm

រូបភាព

រូបថត៖ ពីហ្វេសប៊ុក CHAN Sothea

ដោយ:

សៀមរាប៖ ទូកបុរាណដែលមានទ្រង់ទ្រាយមិនដូចទូកបច្ចុប្បន្ន ត្រូវបានរកឃើញនៅភូមិបំពេញរាជ្យ ឃុំលាងដៃ ស្រុកអង្គរធំ ខេត្តសៀមរាប។ ទូកបុរាណដែលអាជ្ញាធរអប្សរារកឃើញនេះ ត្រូវបានយកមកតម្កល់នៅទីតាំងអាជ្ញាធរអប្សរា ហើយនឹងបញ្ចូលទៅដាក់នៅកសិណក្នុងទីធ្លានៃប្រាសាទអង្គរវត្ត។ នេះបើតាមអ្នកនាំពាក្យអាជ្ញាធរអប្សរា លោក ឡុង កុសល។

ទូកបុរាណដែលរកឃើញនៅក្នុងការដ្ឋានបូបខ្សាច់មួយកន្លែង ស្ថិតនៅភូមិបំពេញរាជ្យ ឃុំ លាងដៃ ស្រុកអង្គរធំ ខេត្តសៀមរាប គឺមានសភាពចាស់ទ្រុឌទ្រោម និងមានទ្រង់ទ្រាយប្លែក ដែលទូកបច្ចុប្បន្នមិនទាន់មាន។ ទូកនេះ ត្រូវបានធ្វើឡើងដោយដើមឈើមួយដើម។ នេះបើយោងតាម លោក ឡុង កុសល អ្នកនាំពាក្យអាជ្ញាធរអប្សរា។ ថ្លែងប្រាប់សារព័ត៌មានថ្មីៗ នៅរសៀលថ្ងៃសៅរ៍ ទី០៩ ខែមេសានេះ លោក ឡុង កុសល បានឲ្យដឹងទៀតថា អាជ្ញាធរអប្សរាមិនទាន់អាចកំណត់ថា តើទូកបុរាណនេះ ដូនតាខ្មែរធ្វើឡើងតាំងពីសម័យណានោះទេ ហើយក៏មិនដឹងថា ទូកនេះ គឺជាប្រភេទទូកអ្វីដែរ ប៉ុន្តែគ្រាន់តែដឹងថា ទូកដែលកម្ពុជាមានបច្ចុប្បន្ននេះ គឺមិនមានរូបរាងដូចទូកបុរាណនេះឡើយ។

លោក ឡុង កុសល បានបន្ថែមថា អាជ្ញាធរអប្សរានឹងយកទូកបុរាណទៅដាក់នៅក្នុងកសិណនៃទីធ្លាប្រាសាទអង្គរវត្ត។ លោកបញ្ជាក់យ៉ាងដូច្នេះថា៖«ពេលនេះ ទូកនេះ កំពុងរក្សាទុកនៅអាជ្ញាធរអប្សរា ហើយអាជ្ញាធរអប្សរានឹងយកទូកនេះ ទៅដាក់ក្នុងកសិណនៃទីធ្លាប្រាសាទអង្គរវត្ត ពីព្រោះ ទូកនេះមានសភាពចាស់ អាជ្ញាធរអប្សរាមិនទុកលើគោកនោះទេ ខ្លាចអាកាសធាតុមានការប្រែប្រួលអាចធ្វើឲ្យខូចខាត»៕