ជាតិ
ហេតុអ្វី លោក គង្គ ប៊ុនឈឿន ប្រាថ្នារូបសំណាកលើទឹកដីកំណើត ?
×
ក្នុងខែមករាដើមឆ្នាំនេះ លោក គង្គ ប៊ុនឈឿន បានយល់ព្រមផ្តល់កិច្ចសម្ភាសន៍តាមទូរសព្ទពីប្រទេសន័រវេ ដល់សារព័ត៌មានថ្មីៗ ដើម្បីអរគុណអភិបាលខេត្តបាត់ដំបង លោក ចាន់ សុផល។ អភិបាលខេត្តបាត់ដំបង បានរៀបចំរម្លឹកដើមដូងទី១០ក្បែរស្ទឹងសង្កែ ដែលជាអត្ថន័យចម្រៀងមួយរបស់ លោក គង្គ ប៊ុនឈឿន។ នោះគឺជាបទសម្ភាសន៍ចុងក្រោយមួយដែលកវីម្ចាស់ស្ទឹងសង្កែបានផ្តល់ដល់សារព័ត៌មាន ខណៈដែលលោកកំពុងរងទុក្ខដោយសារជំងឺមហារីកតម្រង់នោម។
នៅក្នុងបទសម្ភាសន៍ជាមួយ លោក លាង ដឺលុច អគ្គនាយករងនៃសារព័ត៌មានថ្មីៗ លោក គង្គ ប៊ុនឈឿន បានមានប្រសាសន៍ថា នៅពេលអស់ជីវិត
លោកចង់ឲ្យគេប្រតិស្ឋានរូបលោក នៅទីកន្លែងដែលលោកធ្លាប់អង្គុយនិពន្ធបទចម្រៀង ឬនៅកន្លែងណាមួយក៏បាននៅលើទឹកដីកំណើតរបស់លោក។ គោលគំនិតនៃការត្រឡប់មកលើទឹកដីកំណើតវិញនៃវិញ្ញាណឬព្រលឹងរបស់កវីរូបនេះ គឺមិនត្រឹមតែការផ្សារភ្ជាប់ជីវិតលោកនៅក្នុងស្ទឹងសង្កែតែមួយនោះទេ ប៉ុន្តែសម្រាប់លោក វាក៏ជាអនុស្សាវរីយ៍នៃអ្នកនិពន្ធជំនាន់ចាស់សម្រាប់អ្នកនិពន្ធជាន់ក្រោយ ហើយវាក៏អាចក្លាយជាទីកន្លែងទេសចរណ៍ថ្មីនៅក្នុងខេត្តបាត់ដំបងដែរ។
សំឡេងលោក គង្គ ប៊ុនឈឿន
ការចង់បានរូបសំណាកនៅលើទឹកដីកំណើត ក្រោយខ្លួនអស់ជីវិត គឺជាក្តីស្រមៃតាំងពីយូររបស់លោក គង្គ ប៊ុនឈឿន។ នេះបើតាមការរៀបរាប់របស់លោក ប្រាប់សារព័ត៌មានថ្មីៗ។ សម្រាប់កវីរូបនេះដដែល ការនឹករលឹកពីមហាជនចំពោះរូបសំណាករបស់លោក វានឹងធ្វើឲ្យលោកមានអារម្មណ៍មោទនថា លោកពិតជាបានធ្វើអ្វីមួយសម្រាប់ទឹកដីកំណើតរបស់លោក។
គួររម្លឹកថា កវីម្ចាស់ស្ទឹងសង្កែតាំងពីទស្សវត្សរ៍ទី៦០នោះ បានចាកចេញពីប្រទេសកំណើតកម្ពុជាទាំងបង្ខំចិត្តនៅក្នុងឆ្នាំ២០០០ ហើយបានបន្តរស់នៅក្នុងប្រទេសថៃរយៈពេល៥ឆ្នាំ មុននឹងលោកបានទៅដល់ប្រទេសន័រវេ ដែលជាប្រទេសទី៣ នៅក្នុងឆ្នាំ២០០៥។ នៅន័រវេ កវីគង្គ ប៊ុនឈឿន បានបន្តការនិពន្ធ តែងកំណាព្យ ទាំងខ្លួនមានជំងឺ។ រហូតដល់ឆ្នាំ២០១៣ លោក គង្គ ប៊ុនឈឿន បានមានឱកាសមកលេងប្រទេសកំណើតបានម្តង។ គឺនៅពេលដែលត្រឡប់ទៅប្រទេសន័រវេវិញនោះហើយ ដែលលោកបានធ្លាក់ខ្លួនឈឺកាន់តែខ្លាំង។ នេះបើតាមការបញ្ជាក់របស់លោក គង្គ ប៊ុនឈឿន ប្រាប់សារព័ត៌មានថ្មីៗ។
នៅថ្ងៃទី១៧មេសាឆ្នាំ២០១៦ កវីម្ចាស់ស្ទឹងសង្កែបានទទួលមរណភាពដោយជំងឺមហារីកនៅក្នុងប្រទេសន័រវេ៕
Tag:
គង្គ ប៊ុនឈឿន
បាត់ដំបង
© រក្សាសិទ្ធិដោយ thmeythmey.com