ព្រះបាទជ័យវរ្ម័នទី៧ សង់ប្រាសាទព្រះខ័នកំពង់ស្វាយ ដើម្បីរម្លឹកជ័យជម្នះលើទ័ពចម្ប៉ា ឈ្លានពានក្រុងអង្គរ

ជាតិ

ព្រះបាទជ័យវរ្ម័នទី៧ សង់ប្រាសាទព្រះខ័នកំពង់ស្វាយ ដើម្បីរម្លឹកជ័យជម្នះលើទ័ពចម្ប៉ា ឈ្លានពានក្រុងអង្គរ

20, Apr 2016 , 9:26 am

រូបភាព

ដោយ: ថ្មីៗ

ភ្នំពេញ៖ ប្រាសាទព្រះខ័នកំពង់ស្វាយ (អ្នកស្រុកហៅ ប្រាសាទបាកាន) មានចំងាយប្រមាណ ២៩០គីឡូម៉ែត្រពីរាជធានីភ្នំពេញ។ ប្រធានមូលនិធិកេរដំណែលខ្មែរ និយាយតាមប្រវត្តិសាស្រ្តថា ព្រះបាទជ័យវរ្ម័នទី៧ បានសាងសង់ប្រាសាទព្រះខ័នកំពង់ស្វាយនេះឡើង ក្នុងគោលបំណងរម្លឹកជ័យជម្នះលើទ័ពចម្ប៉ា ឈ្លានពានអាណាចក្រអង្គរ។ បច្ចុប្បន្ន ប្រាសាទនេះ ស្ថិតក្នុងឃុំរណសិរ្ស ស្រុកសង្គមថ្មី ខេត្តព្រះវិហារ។

លោក ចិន្ត ច័ន្ទរតនា ប្រធានមូលនិធិកេរដំណែលខ្មែរ និយាយថា តំបន់ប្រាសាទព្រះខ័ន កំពង់ស្វាយនេះ មានលក្ខណៈ ពិសេសខាងយុទ្ធសាស្ត្រទ័ព កាលពីសម័យព្រះបាទជ័យវរ្ម័ន ទី៧ ព្រោះ ពីមុន តំបន់នេះ មានព្រៃជ្រៅ ហ៊ុមព័ទ្ធដោយបារាយណ៍ ស្ទឹង និងអូរទឹក ប្រភពទឹកធ្លាក់ចុះពីភ្នំដងរែក។ ជាងនេះទៀត លោកថា ប្រាសាទនេះ ស្ថិតនៅជាប់តំបន់រ៉ែដែកដែលអាចស្លធ្វើជាឧបករណ៍សឹក សម្រាប់កងទ័ព កាលសម័យអតីតកាល។

លោកបន្តតាមការស្រាវជ្រាវប្រវត្តិសាស្ត្រ ថា ព្រះបាទជ័យវរ្ម័នទី៧ បានជ្រើសយកភូមិសាស្ត្រ តំបន់ប្រាសាទ ព្រះខ័នកំពង់ស្វាយនេះ ធ្វើជាកន្លែងហ្វឹកហាត់កងទ័ពអស់រយៈពេលជាង ៤ឆ្នាំ គឺចាប់ពីឆ្នាំ ១១៧៧ ដល់ឆ្នាំ១១៨១ មុនពេលព្រះអង្គចេញទ័ពច្បាំងដេញទ័ពចម្ប៉ាចូល ឈ្លានពានទីក្រុងអង្គរ ដោយជ័យជម្នះ។ លោកបន្តទៀតថា ក្រោយពីព្រះអង្គទទួលជ័យជំនះ ព្រះបាទជ័យវរ្ម័នទី៧ បានរៀបចំកសាងប្រាសាទជាច្រើនពាសពេញប្រទេស នាំឲ្យនគរកម្ពុជាខ្លាំងក្លា កាលពីសម័យបុរាណ។ ត្រង់ចំណុចនេះ លោកថា ព្រះអង្គក៏បានសង់ប្រាសាទ និងស្ពានបុរាណ នៅតំបន់ព្រះខ័នកំពង់ស្វាយ ដើម្បីរម្លឹកដល់ជ័យជំនះរបស់ព្រះអង្គ កាលសម័យនោះ តែម្តង។

តែលោកថា គួរសោកស្តាយ! ប្រាសាទដូនតាខ្មែរពីបុរាណកាលនេះ ត្រូវបានបំផ្លាញដោយសារសង្គ្រាមស៊ីវិលក្នុងស្រុក និងឈ្មួញទុច្ចរិតមួយចំនួន បានលួចគាស់យកវត្ថុបុរាណលក់ កន្លងមក នាំប្រាសាទ រូបចម្លាក់ ខូតខាតបាត់បងទ្រង់ទ្រាយ។

គួរបញ្ជាក់ថា ឃុំរណសិរ្សនេះ មានចំងាយជាង ២៨គីឡូម៉ែត្រ ស្ថិតនៅប៉ែកខាងត្បូងឆៀងខាងលិចស្រុកសង្គមថ្មី និងមានព្រំប្រទល់ខាងជើងជាប់ឃុំស្តៅ ខាងត្បូងជាប់នឹងឃុំសាគ្រាម ស្រុកប្រាសាទបល្ល័ង្ហ ខេត្តកំពង់ធំ រីឯខាងលិចជាប់នឹងឃុំ ខ្វាវ ស្រុកជីក្រែង ខេត្តសៀមរាប និងខាងកើតជាប់នឹងឃុំរមទម្យ ស្រុករវៀង ខេត្តព្រះវិហារ៕