សង្គមអន្តរជាតិ
អន្តរជាតិ
តាំងពីឆ្នាំ១៩០០ គ្រោះធម្មជាតិសម្លាប់មនុស្ស៨លាននាក់ និងខូចខាតសេដ្ឋកិច្ច៨ទ្រីលានដុល្លារ
× រយៈពេលជាងសតវត្សរ៍មកនេះ គ្រោះធម្មជាតិបានបង្កមហន្តរាយយ៉ាងធ្ងន់ធ្ងរដល់មនុស្សជាតិ។ គ្រោះធម្មជាតិដែលរួមមានទឹកជំនន់ និងខ្យល់ព្យុះជាដើមបានសម្លាប់មនុស្ស៨លាននាក់ និងបង្កផលប៉ះពាល់ផ្នែកសេដ្ឋកិច្ចយ៉ាងធំសម្បើមដល់ទៅ៧ទ្រីលានដុល្លារ។ នេះបើយោងតាមការផ្សាយរបស់កាសែតជប៉ុន The Japan Time។
អ្នកស្រាវជ្រាវនិយាយនៅថ្ងៃទី១៨ ខែមេសាថា គ្រោះថ្នាក់ធម្មជាតិបណ្ដាលឲ្យប៉ះពាល់យ៉ាងខ្លាំងដល់ជីវិត និងសេដ្ឋកិច្ចរបស់មនុស្សលើផែនដី។ ដោយគិតចាប់ពីឆ្នាំ១៩០០មក គ្រោះធម្មជាតិធ្វើឲ្យខូចខាតដល់សេដ្ឋកិច្ចទូទាំងពិភពលោកចំនួនច្រើនជាង៧ទ្រីលានដុល្លារ ខណៈការខូចខាតជិត៦០ភាគរយបង្កដោយគ្រោះទឹកជំនន់ និងព្យុះសង្ឃា។
ជាមួយគ្នានេះ បើតាមរបាយការណ៍ក្នុងកិច្ចប្រជុំសហភាពភូគព្ភសាស្ត្រអឺរ៉ុបនៅទីក្រុងវីយែន ចំនួនមនុស្សស្លាប់គ្រោះធម្មជាតិបានកើនឡងដល់៨លាននាក់ចាប់ពីឆ្នាំ១៩០០ ដល់ឆ្នាំ២០១៥។ គ្រោះធម្មជាតិទាំងនោះមានដូចជារញ្ជួយដី បន្ទុះភ្នំភ្លើង រាំងស្ងួត រលកកម្ដៅ និងភ្លើងឆេះព្រៃ។
ក្នុងកិច្ចប្រជុំនោះដែរ លោក James Daniell ដែលវិស្វករជាតិអូស្ត្រាលីនិយាយថា ការខូចខាតសេដ្ឋកិច្ចចំនួន៣៨.៥ភាគរយ និងច្រើនជាងពាក់កណ្ដាលនៃចំនួនជីវិតដែលបាត់បង់ គឺបណ្ដាលមកពីទឹកជំនន់តែម្ដង។ លោកថា ទឹកជំនន់ជាមូលហេតុសំខាន់នៃការខូចខាតសេដ្ឋកិច្ច និងការបាត់បង់ជីវិត។
យ៉ាងណាក្ដី ចាប់ពីឆ្នាំ១៩៦០មក ខ្យល់ព្យុះក៏ជំនួសកន្លែងទឹកជំនន់ ជាមូលហេតុនៃមហន្តរាយ ដោយបានកម្ទេចអាគារ និងហេដ្ឋារចនាសម្ព័ន្ធជាច្រើន។ ប៉ុន្តែលោក Daniell មិនអាចបញ្ជាក់បានទេថា ការផ្លាស់ប្ដូរនេះបណ្ដាលមកពីបម្រែបម្រួលអាកាសធាតុឬយ៉ាងណានោះទេ។
លើសពីនេះទៅទៀត ការខូចខាតគ្រប់យ៉ាងចំនួន២៦ភាគរយគឺបង្កដោយរញ្ជួយដី ហើយបានសម្លាប់ជីវិតច្រើនជាង២លាននាក់ ខណៈដែលបន្ទុះភ្នំភ្លើងបង្កការខូចខាតតែមួយភាគរយទេ ក្នុងរយៈពេល១១៥ឆ្នាំកន្លងមកនេះ។ បើយោងតាមការស្រាវជ្រាវខាងលើ ក្នុងចំណោមអ្នកស្លាប់ទាំងអស់ មាន៦០ភាគរយរងគ្រោះថ្នាក់ដោយសារការបាក់រលំអាគារ ស្របពេលដែល ២៨ភាគរយផ្សេងទៀត បាត់បង់ជីវិតនៅពេលមានរលកស៊ូណាមិ ឬការបាក់ដី។
ជារួម ការខូចខាតផ្នែកសេដ្ឋកិច្ចប្រចាំឆ្នាំដោយសារតែគ្រោះធម្មជាតិគឺកើតឡើងបន្តបន្ទាប់ ប៉ុន្តែទន្ទឹមនឹងនេះដែរ ចំនួនជីវិតដែលបាត់បង់គឺធ្លាក់ចុះទៅវិញ។ នេះអាចបណ្ដាលមកពីការរីកចម្រើនផ្នែកបច្ចេកវិទ្យា ដែលអាចឲ្យមានការព្រមានទុកមុននៅពេលមានការវាយប្រហារដោយប្រការណាមួយ។ ជាក់ស្ដែងនោះ ប្រទេសជាច្រើនដែលធ្លាប់រងគ្រោះដោយសាររលកស៊ូណាមិ បានបំពាក់ប្រព័ន្ធប្រាប់ដំណឹងមុន នៅពេលដែលមានគំរាមណាមួយពីគ្រោះធម្មជាតិនេះ៕
© រក្សាសិទ្ធិដោយ thmeythmey.com