បទវិភាគ
គួរត្រៀមកាត់បន្ថយចំនុចអវិជ្ជមានថែមទៀត នៅអង្គរសង្ក្រាន្តឆ្នាំក្រោយ
× ភ្នំពេញ៖ មកដល់ឆ្នាំ២០១៦នេះ ពិធីអង្គរសង្ក្រានត្រូវបានសហភាពសហព័ន្ធយុវជនកម្ពុជា រៀបចំចំនួនបួនលើកមកហើយ។ ក្នុងការរៀបចំនេះ គេសង្កេតឃើញថា បានផ្ដល់ផលវិជ្ជមានយ៉ាងច្រើនដល់សង្គមខ្មែរ ប៉ុន្តែ ទន្ទឹមនឹងនោះ គេក៏បានមើលឃើញថា វាមានផលអវិជ្ជានខ្លះដែរ។ តើអ្វីខ្លះទៅ ជាផលទាំងពីរនេះ?
ជាធម្មតា គ្មានទង្វើអ្វីមួយ ឬ ការរៀបចំណាមួយ ដែលបានផ្ដល់ផលវិជ្ជមាន១០០ភាគរយ ដោយគ្មានផលប៉ះពាល់អវិជ្ជមាននោះទេ។ បទពិសោធន៍កន្លងមក ក៏បានបង្ហាញថា ការរៀបចំពិធីបុណ្យធំៗជាលក្ខណៈប្រមូលផ្ដុំ ដូចជា ពិធីបុណ្យអុំទូក អកអំបុក សំពះព្រះខែ និង ពិធីបុណ្យសមុទ្រ ជាដើម តែងតែផ្ដល់ផលទាំងពីរនេះ ដោយចៀសមិនផុត។ ក្នុងករណីខ្លះ មានរហូតដល់ទៅស្លាប់មនុស្សរាប់រយនាក់ក៏មានដែរ ដូចជា ករណីឧបទ្ទវហេតុមនុស្សរត់ជាន់គ្នានៅលើស្ពានពេជ្រកាលពីថ្ងៃទី២២ ខែវិច្ឆិកា ឆ្នាំ២០១០ ជាដើម។
ដោយឡែក ការរៀបចំពិធីអង្គរសង្ក្រានទាំងបួនលើកន្លងមកនេះ គេក៏សង្កេតឃើញមានផលទាំងពីរនេះដែរ។ សូមពិនិត្យមើលការសង្កេតលើផលទាំងពីរនេះដូចខាងក្រោម។
ក)ផលវិជ្ជមាន៖
• ការប្រមូលផ្ដុំល្បែងប្រជាប្រិយខ្មែរ សិល្បៈ ប្រពៃណី និង ទំនៀមទម្លាប់ បង្ហាញរួមគ្នា ជាទ្រង់ទ្រាយធំដែលមិនធ្លាប់មានពីមុនមក ធ្វើឱ្យគេស្គាល់និងចាប់អារម្មណ៍យ៉ាងខ្លាំងពីទេសចរជាតិនិងអន្តរជាតិ។
• ផ្ដល់ឱកាសឱ្យសិល្បករ សិល្បការិនី អ្នកជំនាញ និង អ្នកមានទេពកោសល្យ បានបង្ហាញចំណេះដឹង បទពិសោធន៍ និង ទេពកោសល្យរបស់ខ្លួន។
• រួមចំណែកក្នុងការផ្សព្វផ្សាយ ការអភិរក្ស ការលើកម្ពស់ និង ការអភិវឌ្ឍវប្បធម៌ សិល្បៈខ្មែរ ក៏ដូចជា ការផ្ដល់ការកម្សាន្ត និងភាពសប្បាយរីករាយដល់មហាជនទាំងអ្នកទៅទស្សនាផ្ទាល់ ទាំងអ្នកទស្សនាតាមកញ្ចក់ទូរទស្សន៍ ហើយវាក៏បានរួមចំណែកទាក់ទាញទេសចរជាតិនិងអន្តរជាតិ យ៉ាងសន្ធឹកសន្ធាប់ផងដែរ។
• ផ្ដល់ប្រាក់ចំណូលដល់ប្រជាពរដ្ឋខ្មែរ ជាពិសេស ប្រជាជនក្នុងខេត្តសៀមរាប ដូចជា អាជីវករ សេវាករ និង កសិករ ដែលលក់ទំនិញ លក់សេវា និង លក់កសិផលរបស់ខ្លួន។
• ជំរុញឱ្យមានការអភិវឌ្ឍ ទាំងផ្នែកហេដ្ឋារចនាសម្ព័ន្ធ សន្តិសុខ សណ្ដាប់ធ្នាប់ សេវាកម្ម អាជីវកម្ម ពាណិជ្ជកម្ម និង វិស័យដទៃទៀត។
• ផ្ដល់ឱកាសឱ្យយុវជន មហាជន និង អាជ្ញាធរពាក់ព័ន្ធមកពីថ្នាក់ ឬ ក្រុមខុសៗគ្នា ធ្វើការរួមគ្នានិងសហការគ្នា ដែលធ្វើឱ្យពួកគេទទួលបានបទពិសោធន៍ការងារជាក្រុម ចំណេះដឹងថ្មី ទំនាក់ទំនងល្អ និង សេចក្ដីស្រលាញ់។
ខ)ផលអវិជ្ជមាន៖
• មានការកកស្ទះចរាចរណ៍ និង បាត់បង់សណ្ដាប់ធ្នាប់ នៅតាមផ្លូវនានាក្នុងខេត្តសៀមរាប ផ្លូវចូលទៅកាន់កន្លែងប្រារព្ធពិធី និង ទីតាំងប្រារព្ធរពិធី។
• មានការដើរជាន់សួនស្មៅ ជាន់សួនច្បារ នៅតាមដងផ្លូវ និង ជុំវិញប្រាសាទ។
• មានការបន្ទោរបង់ក្រៅបង្គន់អនាម័យ ជាពិសេស នៅតំបន់ ជិតទីតាំងប្រារព្ធពិធី។
• មានការបំផ្លាញបរិស្ថាន ដូចជា ការចោលសំរាមលើឃឿនប្រាសាទ លើសួនស្មៅ ក្នុងទឹកជុំវិញប្រាសាទ និង តាមដងផ្លូវ ជាដើម។
• ថ្លៃផ្ទះសំណាក់ សណ្ឋាគារ ម្ហូបអាហារ ទំនិញផ្សេងៗ ឡើងខ្ពស់កប់ពពក។
• ខ្វះកន្លែងស្នាក់នៅ និង ម្ហូបអាហារ។
បើពិនិត្យជារួម គេអាចនិយាយបានថា ផលវិជ្ជមានច្រើនជាងផលអវិជ្ជមាន។ ដូចបានលើកឡើងខាងលើរួចហើយថា គ្មានអ្វីមួយដែលល្អឥតខ្ចោះ ឬ អ្វីមួយដែលគ្មានផលប៉ះពាល់អវិជ្ជាមានសោះនោះទេ។ ហេតុនេះ អ្វីដែលសំខាន់នោះ គឺហេតុផលជំរុញ ឬ បំណងរបស់អ្នកធ្វើ ឬ អ្នករៀបចំពិធី។ ប្រសិនបើហេតុផលជំរុញ ឬ បំណងរបស់អ្នកធ្វើល្អហើយ ផលអវិជ្ជមានដែលមានបន្តិចបន្តួចនេះគេមិនគួរប្រកាន់ទោស ឬ ពង្រីកទៅជារឿធំដុំនោះទេ។ ប៉ុន្តែ អ្នករៀបចំក៏ត្រូវតែទទួលស្គាល់ការណ៍ពិត ទទួលយកការរិះគន់ស្ថាបនា ហើយកែលម្អកង្វះចន្លោះរបស់ខ្លួនជាបណ្ដើរៗ ដើម្បីកាត់បន្ថយកំហុសឆ្គងរបស់ខ្លួនឱ្យនៅតិចបំផុតតាមដែលអាចធ្វើទៅបាន។
ដើម្បីដោះស្រាយបញ្ហាដែលនៅសេសសល់ដូចបានបង្ហាញខាងលើនេះ ទីមួយគេគួររៀបចំពីធីប្រហាក់ប្រហែលគ្នានេះ នៅកន្លែងផ្សេងទៀតក្នុងពេលជាមួយគ្នា អាចគ្រប់ខេត្តក្រុង ឬ ខេត្តធំៗមួយចំនួន។ ទីពីរ ត្រូវមានការពន្យល់ ការអប់រំ ការផ្សព្វផ្សាយ និង ការណែនាំទាក់ទងនឹងការធ្វើចរាចរណ៍ ផ្លូវធ្វើចរាចរណ៍ ការរក្សាសណ្ដាប់ធ្នាប់ និង អនាម័យជាក់ស្ដែងក្នុងតំបន់ប្រារព្ធពិធី។ ទីបី ត្រូវរៀបចំនគរបាលចរាចរណ៍ នគរបាលសណ្ដាប់ធ្នាប់និងសន្តិសុខ និង ភ្នាក់ងារសម្របសម្រួលដទៃទៀតនៅតាមសួនច្បារ បង្គន់សាធារណៈ កន្លែងងាយរងគ្រោះ និង កន្លែងចាំបាច់ផ្សេងៗទៀត។ ទីបួន ត្រូវរៀបចំបង្គន់អនាម័យ ធុងសំរាម និង ឡានដឹកសំរាមឱ្យបានគ្រប់គ្រាន់ និង គួររៀបចំផ្លាកសញ្ញា និង ខិត្តបណ្ណផ្សេងៗទាក់ទងនឹងការណែនាំអំពីផ្លូវធ្វើចរាចរណ៍ របៀបធ្វើចរាចរណ៍ ការរក្សាសណ្ដាប់ធ្នាប់ ការរក្សាអនាម័យ ការចោលសំរាម និង ការបន្ទោរបង់នៅកន្លែងតំបន់ប្រារព្ធពិធី។ លើសពីនេះទៀតទាំងគណៈអធិបតី ទាំងអ្នករៀបចំ ពិធីករ និង សិល្បករ គួរឆ្លៀតនិយាយទាក់ទងទៅនឹងការណែនាំអំពីផ្លូវធ្វើចរាចរណ៍ របៀបធ្វើចរាចរណ៍ ការរក្សាសណ្ដាប់ធ្នាប់ ការរក្សាអនាម័យ ការចោលសំរាម និង ការបន្ទោរបង់នៅកន្លែងតំបន់ប្រារព្ធពិធី៕
© រក្សាសិទ្ធិដោយ thmeythmey.com