គណៈដឹកនាំឥស្លាមប្រាប់ឲ្យតាមសហគមន៍ថ្វាយបង្គំសុំទឹកភ្លៀង

ជាតិ

គណៈដឹកនាំឥស្លាមប្រាប់ឲ្យតាមសហគមន៍ថ្វាយបង្គំសុំទឹកភ្លៀង

29, Apr 2016 , 10:19 pm

រូបភាព

ដោយ: ថ្មីៗ

ភ្នំពេញ៖ គណៈដឹកនាំជាន់ខ្ពស់នៃសាសនាឥស្លាមកម្ពុជា បានប្រកាសប្រាប់ថ្នាក់ដឹកនាំតាមសហគមន៍ខ្មែរឥស្លាមនៅទូទាំងប្រទេស ឲ្យរៀបចំថ្វាយបង្គំសុំទឹកភ្លៀង។ ការថ្វាយបង្គំសុំទឹកភ្លៀង គឺធ្វើឡើងក្នុងក្របខ័ណ្ឌច្បាប់សាសនាឥស្លាម។

ក្នុងលិខិតមួយច្បាប់ចុះថ្ងៃទី២៨ មេសា ប្រាប់ទៅថ្នាក់គ្រប់គ្រងគ្រប់លំដាប់ថ្នាក់ គណៈដឹកនាំជាន់ខ្ពស់នៃសាសនាឥស្លាមកម្ពុជា ដែលមានលោក សុះ កំរី ជាចាងហ្វាង ឲ្យមានការថ្វាយបង្គំសុំទឹកភ្លៀង ជាទ្រុងទ្រាយធំ នៅតាមសហគមន៍ខ្មែរឥស្លាម។ «ការសុំទឹកភ្លៀងពីអល់ឡោះ (ព្រះជាម្ចាស់) តាមការណែនាំរបស់សាសនាឥស្លាម»។ នេះជាកម្មវត្ថុ ក្នុងលិខិតរបស់លោក សុះ កំរី។

បច្ចុប្បន្ន គ្រោះរាំងស្ងួត កំពុងបង្កការលំបាកដល់ជីវិតមនុស្ស សត្វ ទូទាំងប្រទេស ដែលជាហេតុធ្វើឲ្យគណៈដឹកនាំជាន់ខ្ពស់នៃសាសនាឥស្លាមកម្ពុជា ប្រកាសរៀបចំការថ្វាយបង្គំសុំទឹកភ្លៀងនេះ។ គេមិនអាចដឹងពីលទ្ធភាពនៃការថ្វាយបង្គំសុំទឹកភ្លៀងនេះ បាននៅឡើយទេ តែវាជាការណែនាំរបស់សាសនាឥស្លាម ដែលជំនាន់ព្យាការីមហាំម៉ាត់ ធ្លាប់បានអនុវត្តន៍ និងបានលទ្ធផលជាផ្លែផ្កា។

ក្រៅពីប្រកាសឲ្យមានការថ្វាយបង្គំជាទ្រង់ទ្រាយធំហើយនោះ ក្នុងនោះគណៈដឹកនាំជាន់ខ្ពស់នៃសាសនាឥស្លាមកម្ពុជា ក៏បានបង្គាប់ឲ្យរាល់ការសូត្រខុតព្ហះជុំអាត់ (ថ្ងៃសុក្រ) ត្រូវបញ្ចូលខ្លឹមសារ សុំទឹកភ្លៀងឲ្យបានជាប្រចាំផងដែរ និងរាល់សកម្មភាពទាំងឡាយណាដែលទាក់ទងនឹងសាសនាឥស្លាម៕