រដ្ឋលក់សំបុត្រចូលទស្សនាអង្គរបានជាង២៤លានដុល្លារក្នុងរយៈពេល៤ខែ

ជាតិ

រដ្ឋលក់សំបុត្រចូលទស្សនាអង្គរបានជាង២៤លានដុល្លារក្នុងរយៈពេល៤ខែ

01, May 2016 , 9:19 pm

រូបភាព

ដោយ: ថ្មីៗ

នៅក្នុងខែមេសា ឆ្នាំ២០១៦ ស្ថិតិភ្ញៀវទេសចរអន្តរជាតិដែលបានទិញសំបុត្រចូលទស្សនាប្រាសាទអង្គរវត្តមានចំនួន ១៤៦,១៩៦នាក់។ ចំនួននេះថយចុះ ៤.៨០ភាគរយ បើធៀបនឹងខែមេសាឆ្នាំ២០១៥ ។ បើតាមសេចក្តីប្រកាសព័ត៌មាន របស់គ្រឹះស្ថានអង្គរ ដែលជាស្ថាប័នគ្រប់គ្រងការលក់សំបុត្ររបស់រដ្ឋចំណូលដែលដែលបានមកពីការលក់សំបុត្រឲ្យភ្ញៀវទេសចរអន្តរជាតិទាំងនោះសរុបមានចំនួន ៤,១៤៨,៥៦០ដុល្លារ ថយចុះ៣.៧៦ភាគរយ បើធៀបនឹងខែឆ្នាំ២០១៥ ។

បើតាមការសរុបនៃស្ថិតិភ្ញៀវទេសចរបរទេស ដែលបានទិញសំបុត្រមើលប្រាសាទអង្គរវត្តរបស់កម្ពុជាក្នុងរយៈពេល៤ខែ ដើមឆ្នាំ២០១៦នេះវិញ មានសរុបចំនួន៨៤៧,៥៥៤នាក់។ ចំណែកឯចំណូលរយៈពេល៤ខែនេះ មានចំនួន ២៤,៥០០,១៦០ដុល្លារ។

រដ្ឋាភិបាលបានដកសិទ្ធិគ្រប់គ្រងការលក់សំបុត្រចូលទស្សនាអង្គរពីក្រុមហ៊ុនសុខាអូតែល មកគ្រប់គ្រងខ្លួនឯងវិញ ចាប់ពីខែមករា ឆ្នាំ២០១៦នេះ ក្រោយពីមានការចោទប្រកាន់នានាពីមហាជន ជាពិសេសពីគណបក្សប្រឆាំងថា ការប្រមូលចំណូលគ្មានតម្លាភាព។

សូមបញ្ជាក់ថា ក្នុងឆ្នាំ២០១៥ មានទេសចរបរទេសចំនួន ជាង២លាននាក់ បានទិញសំបុត្រចូលទស្សនារមណីយដ្ឋានអង្គរ ចំនួននេះកើនឡើងជិត២ភាគរយ បើធៀបទៅនឹងឆ្នាំ២០១៤ ចំណែកចំណូលពីការលក់សំបុត្រវិញ មានចំនួន ៦០,០៥៣,៧០០ដុល្លារ៕