អន្តរជាតិ
នយោបាយអន្តរជាតិ
កូនស្រីច្បងលោក បារ៉ាក់ អូបាម៉ា Malia រើសយកសាលា Harvard
×
កូនស្រីច្បងរបស់ប្រធានាធិបតីអាមេរិកបារ៉ាក់ អូបាម៉ា Malia Obama នឹងបន្តការសិក្សាថ្នាក់ឧត្តមសិក្សានៅសាកលវិទ្យាល័យ Harvard ក្នុងឆ្នាំសិក្សា ២០១៧ ក្រោយបញ្ចប់ការសិក្សាថ្នាក់វិទ្យាល័យ។ Malia ដើរតាមម្តាយឪពុកនាងព្រោះអ្នកទាំងពីរសុទ្ធតែបានបញ្ចប់ការសិក្សាផ្នែកច្បាប់ពីសាលាដ៏ល្បីនេះ។
ថ្ងៃអាទិត្យ ទី ១ ឧសភា ម្សិលមិញសេតវិមានបានប្រកាសថា កូនស្រីច្បងរបស់ប្រធានាធិបតី បារ៉ាក់ អូបាម៉ា Malia Obama សម្រេចថានឹងសិក្សានៅសាកលវិទ្យាល័យ Harvard សម្រាប់ការឆ្នាំសិក្សា ២០១៧ ក្រោយពេលនាងបញ្ចប់ការសិក្សាថ្នាក់វិទ្យាល័យ។ ដែលវាមានន័យថានាងចាប់ផ្តើមឆ្នាំសិក្សាពេញលេញក្រោយពេលដែលឪពុករបស់នាងចប់អាណត្តិជាប្រធានាធិបតី។
យោងតាមសារព័ត៌មាន Politico Malia នឹងបញ្ចប់ការសិក្សាពីវិទ្យាល័យ Sidwell Friends ស្ថិតក្នុងរដ្ឋធានីវ៉ាស៊ីនតោននៅក្នុងខែមិថុនាខាងមុខនេះ។ តែនាងត្រូវចូលរៀនថ្នាក់ត្រៀមមួយឆ្នាំសិនមុននឹងចាប់ផ្តើមឆ្នាំសិក្សាថ្នាក់ឧត្តម។ ដូច្នេះហើយ Malia ចាប់ផ្តើមការសិក្សាក្នុងឆ្នាំ ២០១៧ ហើយនឹងបញ្ចប់ក្នុងឆ្នាំ ២០២១ ផងដែរ។
លោក បារ៉ាក់ អូបាម៉ា និងភរិយាលោក ស្ត្រីទីមួយ លោកស្រី Michelle Obama ជាញឹកញាប់ពិភាក្សាពីសាលាដែលកូនខ្លួនត្រូវចូលសិក្សា។ ហើយចុងក្រោយ Malia ជ្រើសរើសសាលាដ៏ល្បី Harvard ហើយវាក៏ជាសាលាដែលលោក អូបាម៉ា និងលោកស្រី Michelle ធ្លាប់សិក្សាផ្នែកច្បាប់ដែរ។ តាមពិតទៅ Harvard ត្រូវបានគេចាត់ទុកជាសាកលវិទ្យាល័យចំណាស់ និងមានកិត្តិនាមខ្ពស់បំផុតលើលោក ហើយសាលានេះបានបណ្តុះបណ្តាលអភិជនជាច្រើននាក់ដែលដឹកនាំរដ្ឋាភិបាលអាមេរិក និងគ្រប់គ្រងជំនួញធំៗផងដែរ។
ក្រៅពីជាទីកន្លែងបណ្តុះបណ្តាលប្រធានាធិបតីអូបាម៉ា និងភរិយាលោក សាលា Harvard ក៏ជាកន្លែងដែលធ្លាប់ផ្តល់ការបណ្តុះបណ្តាលដល់ប្រធានាធិបតីអាមេរិកច្រើននាក់ផ្សេងទៀតក្នុងនោះមានដូចជាលោក John Adams, លោក John Quincy Adams, លោក George W. Bush, លោក Rutherford Hayes, លោក John F. Kennedy, លោក Franklin D. Roosevelt និងលោក Theodore Roosevelt។ ហើយបើយោងតាមសៀវភៅ «America’s Royalty» កូនប្រធានាធិបតីអាមេរិកចំនួន ២២ នាក់ហើយបានចូលសិក្សានៅសាលា Harvard ហើយ Malia នឹងក្លាយជាកូនប្រធានាធិបតីអាមេរិកស្ថិតក្នុងលេខរៀងទី ២៣ ៕
Tag:
Malia Obama
បារ៉ាក់ អូបាម៉ា
Harvard
© រក្សាសិទ្ធិដោយ thmeythmey.com