ជាតិ
នយោបាយជាតិ
លោក សុខ ឥសាន (ឆ្វេង) តំណាង CPP និងលោក អ៊ូ វីរៈ អ្នកវិភាគឯករាជ្យ
×![]()
ដោយ: ធឿន បញ្ញាឬទិ្ធ
ព្រះរាជអាជ្ញារង អមសាលាដំបូងរាជធានីភ្នំពេញ លោក សៀង សុខ បានចេញដីការកោះហៅដាច់ដោយឡែកអញ្ជើញ លោក សុខ ឥសាន អ្នកនាំពាក្យគណបក្សប្រជាជនកម្ពុជា បំភ្លឺនៅថ្ងៃទី៦ ខែឧសភា នៅក្នុងនាម ជាដើមបណ្តឹង ដែលបានប្ដឹងលោក អ៊ូ វីរៈ ប្រធានវេទិកា អនាគតកម្ពុជា។ ចំណែកលោក អ៊ូ វីរៈ ត្រូវចូលខ្លួនបំភ្លឺនៅថ្ងៃទី១២ ខែឧសភា ឆ្នាំ២០១៦ ខាងមុខនេះ ចំពោះពាក្យបណ្តឹងរបស់លោក សុខ ឥសាន្ត។ នេះបើតាមលិខិតរបស់ព្រះរាជអាជ្ញារងចុះថ្ងៃទី២៨ មេសា។
កាលពីថ្ងៃទី២៥ ខែមេសា លោក សុខ ឥសាន តំណាងឲ្យគណបក្សប្រជាជនកម្ពុជា បានដាក់ពាក្យប្តឹង លោក អ៊ូ វីរៈ ប្រធានវេទិកាអនាគត ទៅសាលាដំបូងរាជធានីភ្នំពេញ ពីបទបរិហារកេរ្តិ៍ជាសាធារណៈ ដោយបានទាមទារសំណងពីលោក អ៊ូ វីរៈ ចំនួន៤០០លានរៀល។
ថ្លែងប្រាប់សារព័ត៌មានថ្មីៗ លោក អ៊ូ វីរៈ ប្រធានវេទិកាអនាគត និងជាអ្នកវិភាគនយោបាយ បានឲ្យដឹងថា លោកនឹងចូលខ្លួនបំភ្លឺតាមដីការកោះហៅរបស់តុលាការ ដោយលោកបានត្រៀមមេធាវីម្នាក់ការពារក្ដីខ្លួន។ លោក អ៊ូ វីរៈ ក៏មានការមិនទុកចិត្តនិងព្រួយបារម្ភពីប្រព័ន្ធតុលាការដែរ។ «ខ្ញុំធ្លាប់ធ្វើការការពារក្ដីច្រើន ហើយខ្ញុំក៏បានដឹងពីរឿងនេះ ខ្ញុំព្រួយបារម្ភពីប្រព័ន្ធតុលាការដែរ។ តែវាមិនមានអ្វីរារាំងខ្ញុំទេ ខ្ញុំនៅតែធ្វើការតស៊ូមតិ ដោយសារកម្ពុជានៅតែដើរលើផ្លូវចាស់ដដែលៗ។ ហើយអ្វីដែលខ្ញុំព្រួយបារម្ភជាងនេះ គឺព្រួយថាពេលណាមួយខ្ញុំឈប់តស៊ូមតិទេ នោះទើបជាការព្រួយរបស់ខ្ញុំ»។ នេះជាការបញ្ជាក់របស់លោក អ៊ូ វីរៈ។
អ្នកវិភាគរូបនេះ បញ្ជាក់ថា នៅពេលនេះលោក បានត្រៀមមេធាវីខ្មែរម្នាក់ហើយ តែបើរឿងនេះកាន់តែមានដំណើរការវែងឆ្ងាយនោះ លោកនឹងជជែកពិភាក្សាគ្នាជាមួយមេធាវីអន្តរជាតិ ដើម្បីការពារក្ដីឲ្យលោក។
តាមរយៈផ្ដល់កិច្ចសម្ភាសន៍ដល់វិទ្យុអាស៊ីសេរី លោក អ៊ូ វីរៈ បានលើកថា «យុទ្ធសាស្ត្ររបស់គណបក្សកាន់អំណាចនៅពេលនេះ គឺព្យាយាមគាបសង្កត់ លោក កឹម សុខា និង ហិរញ្ញវត្ថុរបស់លោក[…]គឺជាការគាបសង្កត់ខ្លាំងមែនទែន ហើយអាចមានប្រសិទ្ធភាព និងអាចរុញឲ្យបក្សប្រឆាំងទាល់ច្រក ហើយបើទាល់ច្រក នឹងធ្វើឲ្យមាន អស្ថិរភាពនយោបាយ»។ លោក អ៊ូ វីរៈ បន្ថែមថា «ការដែលគណបក្សប្រជាជនកម្ពុជា រវល់គិតគូរបំបាក់គូប្រកួតប្រជែង នយោបាយ តាមរបៀបនេះ នឹងកាន់តែធ្វើឲ្យបាត់បង់ប្រជាប្រិយភាពខ្លាំង ហើយមន្ត្រីនៅក្នុងបក្សនេះមួយចំនួន ក៏មិនពេញចិត្តចំពោះ យន្តការនេះ ដែរ»។
ចំពោះការលើកឡើងបែបនេះ ត្រូវបានគណបក្សប្រជាជនកម្ពុជា តំណាងដោយលោក សុខ ឥសាន ចាត់ទុកថា ជាការបរិហាកេរ្តិ៍ ដែលធ្វើឲ្យប៉ះពាល់ដល់កេរ្តិ៍ឈ្មោះគណបក្សខ្លួន។
តែត្រង់ចំណុចនេះ លោក អ៊ូ វីរៈ យល់ឃើញថា ការសម្ដែងមតិរបស់លោក មិនមានចំណុចណាខុសឆ្គងដូចការចោទប្រកាន់របស់លោក សុខ ឥសាន ឡើយ ។ លោក អ៊ូ វីរៈ បានសម្ដែងការហួសចិត្ត និងសោកស្ដាយចំពោះពាក្យបណ្ដឹងរបស់គណបក្សប្រជាជន ដែលប្ដឹងរូបលោក ដោយគ្រាន់តែបញ្ចេញមតិ ដើម្បីស្ថាបនាការវិវត្តនយោបាយនៅកម្ពុជានេះ។
កាលពីថ្ងៃទី ២៥ មេសា សម្ដេចនាយករដ្ឋមន្ត្រី ហ៊ុន សែន បានប្រកាសថា លោកមិនមានការអត់ឱនឲ្យអ្នកណា ដែលមួលបង្កាច់បង្ខូចកិត្តិយសគណបក្សប្រជាជនទៀតឡើយ។ ប្រធានបក្សកាន់អំណាចរូបនេះ ក៏បានអំពាវនាវឲ្យ សមាជិកសមាជិកា គណបក្សប្រជាជនកម្ពុជា និងថ្នាកដឹកនាំគ្រប់ជាន់ថ្នាក់ទាំងអស់ រៀបចំមេធាវី ដើម្បីត្រៀមប្តឹងទៅកាន់តុលាការ ក្នុងករណីមានការមួលបង្កាច់រំលោភសិទ្ធិដោយបុគ្គលណាមួយ មកលើគណបក្សលោក។
សម្ដេច ហ៊ុន សែន បានបញ្ជាក់ថា លោកគោរពសិទ្ឋិបញ្ចេញមតិ ប៉ុន្តែប្រឆាំងដាច់ខាតចំពោះអ្នកមួលបង្កាច់បង្ខូចកិត្តិយសនិងសេចក្តីថ្លៃថ្នូរចំពោះគណបក្សប្រជាជន ដែលលោកចាំបាច់ត្រូវរក្សានូវសិទ្ឋិរបស់ខ្លួន ដើម្បីការពារកិត្តិយស និងសេចក្ដីថ្លៃថ្នូរក្នុងនាមបក្សដឹកនាំរាជរដ្ឋាភិបាល៕
Tag:
អ៊ូ វីរៈ
សុខ ឥសាន
© រក្សាសិទ្ធិដោយ thmeythmey.com
