អន្តរជាតិ
នយោបាយអន្តរជាតិ
បារាំងអាចនឹងបដិសេធកិច្ចព្រមព្រៀងអន្តរអាត្លង់ទិក ប្រសិនបើប៉ះពាល់ដល់កសិកម្មខ្លួន
×
ប្រធានាធិបតីបារាំងលោក ហ្វ្រង់ស្វ័រ ហូឡង់ (Francois Hollande) និយាយថា បារាំងនឹងបដិសេធកិច្ចព្រមព្រៀងអន្តរអាត្លង់ទិក TTIP រវាងអាមេរិក និងអឺរ៉ុប ប្រសិនបើកិច្ចព្រមព្រៀងនេះប៉ះពាល់ដល់វិស័យកសិកម្មរបស់ខ្លួន។ កិច្ចព្រមព្រៀង TTIP ដែលផ្ដួចផ្ដើមដោយអាមេរិក កំពុងស្ថិតក្រោមការចរចា ប៉ុន្តែក៏រងការរិះគន់ខ្លះពីប្រទេសជាសមាជិករបស់អឺរ៉ុប ដោយខ្លាចក្រែងប៉ះពាល់ដល់ពាណិជ្ជកម្មរបស់ខ្លួន។
ប្រធានាធិបតីបារាំង ហ្វ្រង់ស្វ័រ ហូឡង់ នៅថ្ងៃទី១ ខែឧសភា បានបង្ហាញការព្រួយបារម្ភចំពោះកិច្ចព្រមព្រៀងភាពជាដៃគូពាណិជ្ជកម្ម និងវិនិយោគអន្តរអាត្លង់ទិក (TTIP) លើវិស័យកសិកម្មរបស់បារាំង ដោយលោកព្រមានថា បារាំងនឹងមិនចូលរួមក្នុងកិច្ចព្រមព្រៀងនេះទេ។ ជាមួយគ្នានេះ បារាំងក៏ទាមទារឲ្យមានការធានាពីការការពារមួយចំនួនផងដែរ ប្រសិនបើចង់ឲ្យកិច្ចព្រមព្រៀងដ៏ធំនេះជោគជ័យ។
បើតាមការិយាល័យប្រធានាធិបតី លោក ហូឡង់ និយាយថា គោលការណ៍ជាក់លាក់មួយចំនួននឹងត្រូវការពារ ហើយបារាំងនឹងមិនធ្វេសប្រហែសនោះទេព្រោះវាទាក់ទងដល់អនាគតវិស័យកសិកម្មរបស់បារាំង។ លោក ហូឡង់ ក៏បញ្ជាក់ដែរថា លោកកំពុងតែតាមដាន ការលេចចេញជារូបរាងរបស់ TTIP ហើយលោកនឹងនិយាយថា «ទេ» ប្រសិនកិច្ចព្រមព្រៀងនេះផ្ដល់ផលវិបាកដល់កសិកម្មបារាំង។
លើសពីនេះ ប្រធានាធិបតីបារាំង ក៏ចង់ឃើញកិច្ចព្រមព្រៀងពាណិជ្ជកម្មនេះរួមបញ្ចូលគោលការណ៍ពាក់ព័ន្ធនឹងបរិស្ថានផងដែរ។ មួយវិញទៀត លោក ហូឡង់ ក៏សង្ក់តធ្ងន់ពីសារសំខាន់ដែលផលិតផលជាក់លាក់មួយចំនួនទទួលបានការពារ ដូចជាស្រាសាំប៉ាញ និងឈីស ដែលជាផលិតផលកសិកម្មនាំចេញរបស់បារាំងជាដើម។
នេះមិនមែនជាលើកទីមួយទេ ដែលបារាំងបង្ហាញការព្រួយបារម្ភចំពោះកិច្ចព្រមព្រៀងពាណិជ្ជកម្មនេះ លើវិស័យកសិកម្មរបស់ខ្លួននោះ។ នៅថ្ងៃទី២៦ ខែមេសា នាយករដ្ឋមន្ត្រីបារាំងលោក ម៉ានូអែល វ៉ល (Manuel Valls) ក៏បានព្រមានពីបរាជ័យរបស់កិច្ចព្រមព្រៀងនេះដែរ។ លោក វ៉ល និយាយថា កិច្ចព្រមព្រៀងនេះនឹងមិនជោគជ័យទេ ប្រសិនបើស្តង់ដាគុណភាពដែលមានសម្រាប់ប្រជាជនបារាំង មិនត្រូវបានរក្សាទេនោះ។
ទីភ្នាក់ងារព័ត៌មាន AFP ផ្សាយថា ការព្រមានរបស់នាយករដ្ឋមន្ត្រីបារាំង ធ្វើឡើងស្របពេលដែលក្រុមអ្នកចរចាមកពីអឺរ៉ុប និងអាមេរិក កំពុងតែពិភាក្សាក្នុងការចរចាជុំទី១៣លើកិច្ចព្រមព្រៀងនេះ នៅទីក្រុងញូវយ៉ក។ ប្រសិនបើលេចជារូបរាង កិច្ចព្រមព្រៀងពាណិជ្ជកម្មរវាងអឺរ៉ុប និងអាមេរិក នឹងបង្កើតប្លុកពាណិជ្ជកម្មដ៏ធំលើពិភពលោក។ កិច្ចព្រមព្រៀងនេះសំដៅដល់ការលុបបំបាត់របាំងពន្ធគយ និងការត្រួតពិនិត្យផ្សេងៗ លើពាណិជ្ជកម្ម និងវិនិយោគរវាងអឺរ៉ុប និងអាមេរិក។
យ៉ាងណាមិញ ផលប៉ះពាល់ដល់ប្រយោជន៍នៃរដ្ឋជាសមាជិកអឺរ៉ុប កំពុងតែធ្វើឲ្យការចរចានៃកិច្ចព្រមព្រៀងនេះ មានសភាពតានតឹង។ ក្នុងដំណើរទៅអាល្លឺម៉ង់ ប្រធានាធិបតីអាមេរិកលោក បារ៉ាក់ អូបាម៉ា ត្រូវបានស្វាគមន៍ដោយបាតុករជាច្រើនដែលមិនពេញចិត្តនឹងកិច្ចព្រមព្រៀងនេះ ដោយពួកគេខ្លាចថា វានឹងប៉ះពាល់ដល់បរិស្ថាន និងស្តង់ដាការងារនៅក្នុងអឺរ៉ុប៕
Tag:
បារាំង
អឺរ៉ុប
អាមេរិក
TTIP
© រក្សាសិទ្ធិដោយ thmeythmey.com