ជាតិ
«លើលោកនេះ ខ្ញុំស្រឡាញ់ម៉ាក់ជាងគេ» មាស សុខសោភា ធ្វើឲ្យម្តាយរំជួលចិត្តនៅ PNN
×
សំឡេងជេរ រអ៊ូ ទេសនា របស់ម្តាយបែរជាពិរោះដូចបទចម្រៀង។ នេះជាអត្ថន័យនៃបទ «លើលោកនេះ ខ្ញុំស្រឡាញ់ម៉ាក់ជាងគេ» ដែលតារាចម្រៀង មាស សុខសោភា បកស្រាយនៅចំពោះមុខម្តាយរបស់ខ្លួនក្នុងកម្មវិធី ស៊ីអារម្មណ៍ (Chit Chat Show) របស់ទូរទស្សន៍ PNN។
«រឿងជីវិតនេះ មិនដឹងរៀបរាប់ចាប់ពីពេលណា គ្រាន់តែដឹងថា ពេលអត់លុយចាយ នឹងម៉ាក់មុនគេ […] ម៉ាក់ធ្វើគ្រប់យ៉ាងគឺម៉ាក់ចង់ឲ្យយើងល្អ លើលោកនេះ ខ្ញុំស្រឡាញ់ម៉ាក់ជាងគេ»។ អត្ថន័យរួមនៃបទនេះ គឺតារាចម្រៀង មាស សុខសោភា ចង់បង្ហាញពីអារម្មណ៍ខុសគ្នា កាលពីនៅក្មេង និងពេលធំពេញវ័យ។
កាលពីនៅក្មេង ការជេរ រអ៊ូ ទេសនា របស់ម្តាយ ហាក់ដូចជាធ្វើឲ្យមានការធុញទ្រាន់ អន់ចិត្ត ប៉ុន្តែអ្វីៗទាំងអស់ គឺម្តាយចង់ដឹកនាំឲ្យកូនក្លាយជាមនុស្សល្អ។ ការច្រៀងរៀបរាប់របស់ តារាចម្រៀង មាស សុខសោភា បានធ្វើឲ្យរំជួលចិត្តយ៉ាងខ្លាំង។
មុនពេលទទួលបាច់ផ្កាពីពិធីករ ប៉ែន ចំរុង កញ្ញា មាស សុខសោភា បានលុតជង្គង់សំពះម្តាយ ហើយម្តាយរបស់នាង បានផ្តល់នូវការជូនពរឲ្យកូនស្រីជោគជ័យ អាយុវែង និងសុខសប្បាយគ្រប់ពេល។
តាមពិតទៅ បទ «លើលោកនេះ ស្រឡាញ់ម៉ាក់ជាងគេ» របស់ផលិតកម្មថោន បានចេញជាវីស៊ីឌី ជិត២ឆ្នាំមកហើយ ដោយមានតារាសម្តែង ប៉ែន សុផានី ដើរជាម្តាយ។ បើគិតចាប់តាំងពីខែសីហា ឆ្នាំ២០១៤ បទនេះ មានអ្នកទស្សនាជាងបីសែននាក់នៅលើ Youtube ផ្លូវការរបស់ផលិតកម្មថោន។
បទនេះ ក៏ជាឧទ្ទិសដល់អ្នកម្តាយគ្រប់រូបនាទិវាមាតា (Mother’s Day) ដែលប្រទេសជាច្រើនក្នុងពិភពលោក ប្រារព្ធនៅថ្ងៃអាទិត្យ សប្តាហ៍ទីពីរនៃខែឧសភា ពោលគឺនៅថ្ងៃទី១០ ខែឧសភា ខាងមុខនេះ៕
Tag:
ទិវាមាតា
មាស សុខសោភា
PNN
© រក្សាសិទ្ធិដោយ thmeythmey.com