អន្តរជាតិ
នយោបាយអន្តរជាតិ
ជប៉ុន ព្រមជួលយន្តហោះល្បាតឲ្យហ្វីលីពីនការពារអធិបតេយ្យ ខណៈចិនកំពុងវាតទីខ្លាំង
×
កម្តៅនៃការប្រឈមមុខគ្នានៅក្នុងតំបន់ជម្លោះសមុទ្រចិនខាងត្បូងដែលជាផ្នែកមួយបណ្តាលមកពីគោល នយោបាយវាតទីឯកតោភាគីរបស់ចិន បានធ្វើឲ្យហ្វីលីពីន ពង្រឹងយុទ្ធសាស្ត្រលើវិស័យការពារជាតិ ដើម្បីទប់ទល់និងប្រឆាំងនឹងចិន។ ហើយចុងក្រោយនេះ ហ្វីលីពីន ក៏ទទួលបានការយល់ព្រមសំណើសុំ ជួលយន្តហោះពីជប៉ុនដើម្បីការពារដែនសមុទ្រផងដែរ។
ជប៉ុន បានយល់ព្រមជួលយន្តហោះស្វ័យការពារប្រភេទ TC-90 ទៅកាន់ហ្វីលីពីនចំនួនប្រាំគ្រឿងដែល នេះគឺជាលើកដំបូងហើយដែលជប៉ុនព្រមជួលសម្ភារយោធាទៅកាន់ប្រទេសខាងក្រៅ។ កិច្ចព្រមព្រៀងនេះ ធ្វើឡើងតាមរយៈកិច្ចសន្ទនាទូរសព្ទរវាងរដ្ឋមន្ត្រីការពារជាតិជប៉ុនលោកឧត្តមសេនីយ៍ Nakatani និង រដ្ឋមន្ត្រីការពារជាតិហ្វីលីពីន Voltaire Gazmin នៅថ្ងៃទី០២ ខែមេសា ម្សិលមិញ។
ដោយសារតែ តាមច្បាប់ ជប៉ុនមិនអាចផ្តល់សម្ភារយោធាទៅកាន់ប្រទេសខាងក្រៅដោយមិនអាចគិតថ្លៃបាន ជប៉ុន និងហ្វីលីពីន បានពិចារណាលើកិច្ចព្រមព្រៀងជួលសម្រាប់យន្តហោះទាំងប្រាំគ្រឿងដើម្បីឲ្យសម្ភារយោធារបស់ជប៉ុនទាំងនោះ អាចបញ្ជូនទៅក្រៅប្រទេសបាន។ នេះបើយោងតាមសារព័ត៌មាន Japan Times ដែលបានដកស្រង់សម្តីរបស់មន្ត្រីរដ្ឋាភិបាលនៃភាគីទាំងពីរ ដែលបានបន្ថែមដែលថា កិច្ចព្រមព្រៀងនេះ ក៏ជួយកាត់បន្ថយនៃការចំណាយរបស់ហ្វីលីពីនផងដែរ។
បើតាមការអះអាងរបស់លោកប្រធានាធិបតីហ្វីលីពីន ប៊ែរនីណូ អាហ្គីណូ កាលពីខែមីនាកន្លងទៅ កិច្ចព្រមព្រៀងនៃការជួលយន្តហោះស្វ័យការពាររបស់ជប៉ុនប្រភេទ TC-90 គឺជាផ្នែកមួយនៃគោលនយោបាយក្នុងការការពារអធិបតេយ្យហ្វីលីពីន និងពិសេសនោះ ដើម្បីជួយសម្រួល និងបន្ថែមសមត្ថភាពនាវាល្បាតរបស់ហ្វីលីពីនដែលកំពុងតែប្រតិបត្តិការការពារសមុទ្រខាងលិចដែលជាផ្នែកមួយនៃសមុទ្រចិនខាងត្បូងនោះ។ យន្តហោះចម្បាំង TC-90 គឺជាប្រភេទយន្តហោះដែលត្រូវបានប្រើប្រាស់ដើម្បីហ្វឹកហ្វឺនកងទ័ពដែលវា មានសមត្ថភាពអាចហោះបានចម្ងាយប្រមាណ ១៩០០ គីឡួម៉ែត ដែលវា មានឥទ្ធិពលខ្លាំងជាងសមត្ថភាពយន្តហោះហ្វីលីពីនពីរដងឯនោះ។
សូមបញ្ជាក់ផងដែរថា បញ្ហាសមុទ្រចិនខាងត្បូង គឺជាជម្លោះដែនអធិបតេយ្យរវាងព្រុយណេ ម៉ាឡេស៊ី ហ្វីលីពីន វៀតណាម និងចិន។ អវត្តមានក្នុងការស្វែងរកដំណោះស្រាយរួមគ្នារវាងភាគីពាក់ព័ន្ធ បាន ធ្វើឲ្យជម្លោះនេះ ឈានទៅដល់ការប្រឈមមុខទាំងផ្នែកការទូត និងការបង្ហាញសាច់ដុំផ្នែកយោធាជាពិសេសនោះ នៅពេលដែលចិន បាននិងបន្តវាតទីក្នុងតំបន់ជម្លោះដោយឯកតោភាគីក្រោមហេតុផលនៃការកើនឡើងនៃតម្រូវការរបស់ ប្រជាជនភ្ជាប់ជាមួយនឹងអំណេះអំណាងប្រវត្តិសាស្ត្រនៃការកាន់កាប់សមុទ្រចិនខាងត្បូងផងដែរនោះ។
ការវិវត្តនៃជម្លោះនេះហើយ ធ្វើឲ្យរដ្ឋាភិបាលហ្វីលីពីន បានបន្តបង្កើនកញ្ចប់ថវិកាជាតិទៅលើវិស័យការពារជាតិ។ អ្វីគួរកត់សម្គាល់នោះរដ្ឋាភិបាលហ្វីលីពីន បានផ្លាស់ប្តូរយុទ្ធសាស្ត្ររបស់ខ្លួនបន្តិចពោលគឺពីការផ្តោតសំខាន់ក្នុងការប្រយុទ្ធប្រឆាំងក្រុមឧទ្ទាមក្នុងស្រុក ទៅជាការពង្រឹងសមត្ថភាពការពារដែនអធិបតេយ្យ ដែលកំពុងតែប្រទាញប្រទង់ជាមួយនឹងចិននោះ។
ថ្មីៗនេះ ហ្វីលីពីន ក៏បានព្រមព្រៀងផ្តល់មូលដ្ឋានទ័ពអាកាសឲ្យអាមេរិកប្រាំកន្លែងនៅក្នុងទឹកដីរបស់ខ្លួនដែលក្បែរនឹងតំបន់ជម្លោះសមុទ្រចិនខាងត្បូងផងដែរ៕
Tag:
ហ្វីលីពីន
សមុទ្រចិនខាងត្បូង
© រក្សាសិទ្ធិដោយ thmeythmey.com