ជាតិ
នយោបាយជាតិ
សមាជិកព្រឹទ្ធសភាមួយរូប ស្នើសម្ដេច សាយ ឈុំ ចាត់វិធានការលើកម្លាំងប្រដាប់អាវុធខេត្តបន្ទាយមានជ័យ
×![]()
ដោយ: ថ្មីៗ
សមាជិកព្រឹទ្ធសភាមកពីគណបក្ស សម រង្ស៊ី មួយរូបគឺលោក សោ ចាន់ដេត បានដាក់លិខិតស្នើឲ្យប្រធានព្រឹទ្ធសភា សម្ដេច សាយ ឈុំ ចាត់វិធានការលើកងកម្លាំងប្រដាប់អាវុធខេត្តបន្ទាយមានជ័យមួយក្រុម ដែលបានឃាត់រថយន្តខ្លួន ខណៈពេលដែលកំពុងធ្វើដំណើរ។ 
សមាជិកព្រឹទ្ធសភាភូមិភាគទី៤រូបនេះ បានប្រាប់ប្រធានព្រឹទ្ធសភា ថា កាលពីថ្ងៃទី១០ ឧសភា កន្លងមក នៅពេលដែលលោកបានធ្វើដំណើរនៅខេត្តបន្ទាយមានជ័យនោះ ស្រាប់តែកងកម្លាំងប្រដាប់អាវុធប្រមាណជា៣០នាក់ ដឹកនាំដោយប្រធានចរាចរណ៍ខេត្ត បានមកឃាត់រថយន្តលោក ក្រោមលេសថា រឹតបន្តឹងច្បាប់ចរាចរណ៍ផ្លូវគោកថ្មី ។
លិខិតចុះថ្ងៃទី១៩ ឧសភា នេះបានរៀបរាប់យ៉ាងដូច្នេះថា៖«ការឃាត់ខ្លួនមានរយៈពេល១ម៉ោង ៣០នាទី ទោះបីជាខ្ញុំបានបង្ហាញអភ័យឯកសិទ្ធិព្រឹទ្ធសភាក៏ដោយ ក៏ក្រុមនេះមិនអនុញ្ញាតិឲ្យខ្ញុំបន្តដំណើរទៅមុខឡើយ។ បន្ទាប់មកក្រុមនេះបានដកហូតយកប័ណ្ណអភ័យឯកសិទ្ធិពីខ្ញុំទៅថតចម្លង ហើយបង្ខំឲ្យខ្ញុំដកស្លាករថយន្តព្រឹទ្ធសភាចេញ ទើបអនុញ្ញាតតឲ្យខ្ញុំបន្តដំណើរទៅមុខទៀត»។
លោក សោ ចាន់ដេត ចាត់ទុកទង្វើររបស់ប្រធានការិយាល័យចរាចរណ៍ខេត្ត បន្ទាយមានជ័យនេះ ជាការរំលោភសិទ្ធិមនុស្ស និងរំលោភអភ័យឯកសិទ្ធិព្រឹទ្ធសភាយ៉ាងធ្ងន់ធ្ងរ ដោយលោកស្នើឲ្យសម្ដេច សាយ ឈុំ ចាត់វិធានការលើកម្លាំងប្រដាប់អាវុធទាំងនេះ ដើម្បីបញ្ចៀសកុំឲ្យមានរូបភាពបែបនេះកើតឡើង ដែលជាការរំលោភរដ្ឋធម្មនុញ្ញនេះ៕
© រក្សាសិទ្ធិដោយ thmeythmey.com
