ពលរដ្ឋចិនជាប់ជាមនុស្សដែលមានការស្វាគមន៍ជនភៀសខ្លួនជាងគេ ខណៈរុស្ស៊ីនៅបាតតារាង

សង្គមអន្តរជាតិ

អន្តរជាតិ

ពលរដ្ឋចិនជាប់ជាមនុស្សដែលមានការស្វាគមន៍ជនភៀសខ្លួនជាងគេ ខណៈរុស្ស៊ីនៅបាតតារាង

21, May 2016 , 11:40 am

រូបភាព

ដោយ: តន ចាន់រិទ្ធារ៉ា

ប្រជាជនចិនត្រូវបានចាត់ទុកជាអ្នកដែលស្វាគមន៍ជនភៀសខ្លួនជាងគេ ក្នុងចំណោមប្រទេសចំនួន២៧ ជុំវិញពិភពលោក។ ចំណាត់ថ្នាក់បន្ទាប់ពីចិន មានអាល្លឺម៉ង់ និងចក្រភពអង់គ្លេស ខណៈដែលរុស្សីជាប់ចំណាត់ចុងក្រោយគេ ជាប្រទេសដែលមិនស្វាគមន៍ជនភៀសខ្លួន។ នេះបើយោងតាមការផ្សាយរបស់កាសែត Bangkok Post។

អង្គការលើកលែងទោសអន្តរជាតិ នៅថ្ងៃទី១៩ ខែឧសភា បានចេញផ្សាយការរកឃើញរបស់ខ្លួន ដែលបង្ហាញថា ប្រជាជនចិន អាល្លឺម៉ង់ និងចក្រភពអង់គ្លេស ជាប់ចំណាត់ជាអ្នកដែលស្វាគមន៍ជនភៀសខ្លួនជាងគេ។ ប្រទេសចំនួនបីទៀត គឺរុស្សី ឥណ្ឌូណេស៊ី និងថៃ ស្ថិតក្នុងលំដាប់ចុងក្រោយនៃបញ្ជី ដែលមាន២៧ប្រទេស។

នៅប្រទេសចិន ដែលជាប់ចំណាត់ថ្នាក់លើគេ ប្រជាជន៤៦ភាគរយនិយាយថា ពួកគេនឹងទទួលជនភៀសខ្លួនមកស្នាក់នៅផ្ទះពួកគេ។ ខណៈរុស្សី ឥណ្ឌូណេស៊ី និងថៃ ជាប្រទេសមិនសូវស្វាគមន៍ជនភៀសខ្លួន ដែលត្រូវបានវាស់វែងដោយសន្ទស្សន៍ស្វាគមន៍ជនភៀសខ្លួន និងគិតលើកម្រិតនៃការទទួលជនភៀសខ្លួន ជាមួយនឹងការស្ទាបស្ទង់លើមនុស្សច្រើនជាង២ម៉ឺន៧ពាន់នាក់។

ចក្រភពអង់គ្លេស ដែលជាប់ចំណាត់ទីពីរ មានប្រជាជន២៩ភាគរយនិយាយថា ពួកគេនឹងស្វាគមន៍ជនភៀសខ្លួន ខណៈដែលប្រជាជនរុស្សី៦១ភាគរយនិយាយថា ពួកគេបដិសេធទទួលជនភៀសខ្លួន។ ជាមួយគ្នានេះ ប្រជាជនអាល្លឺម៉់ងម្នាក់ក្នុងចំណោមដប់នាក់ បញ្ជាក់ថា ពួកគេព្រមទទួលជនភៀសខ្លួន។

ការចាត់ចំណាត់ថ្នាក់នេះ គឺអាស្រ័យលើកម្រិតដែលប្រជាជនប្រទេសនីមួយៗនិយាយថា ពួកគេនឹងស្វាគមន៍ជនភៀសមកនៅផ្ទះពួកគេ ធ្វើជាអ្នកជិតខាងនៅទីក្រុងឬក៏ប្រទេសជាដើម។ មួយវិញទៀត នៅជុំវិញពិភពលោក គេរកឃើញថា មនុស្សម្នាក់ក្នុងចំណោមដប់នាក់ នឹងត្រូវទទួលជនភៀសខ្លួនម្នាក់។

អគ្គលេខាធិការអង្គការលើកលែងទោសអន្តរជាតិលោក Shalil Shetty និយាយថា «ចំនួននេះបានប្រាប់យើងច្បាស់ណាស់។ ប្រជាជនត្រៀមខ្លួនដើម្បីទទួលជនភៀសខ្លួន ប៉ុន្តែការឆ្លើយតបរបស់រដ្ឋាភិបាលមិនស្របនឹងគំនិតប្រជាជនទេ»។

លោក Shetty ប្រាប់ទីភ្នាក់ងារAFP ដែរថា ប្រជានជចិនបានបញ្ជូនសារច្បាស់ៗ ហើយពួកគេនឹងស្វាគមន៍ជនភៀសខ្លួន។ ប៉ុន្តែលោកបញ្ជាក់ដែរថា នេះមិនមែនមាន័យថា ប្រជាជនចិនព្រមទទួលជនភៀសខ្លួនច្រើននោះទេ តែវាអាស្រ័យលើរដ្ឋាភិបាលឯណោះ៕