English-Français
សង្គមជាតិ
អ្នកជំនាញថែទាំសត្វនៅកម្ពុជាអំពាវនាវដល់ពលរដ្ឋខ្មែរកុំឲ្យពិសាសាច់ឆ្កែ
×![]()
ភ្នំពេញ៖ នៅក្នុងប្រទេសមួយចំនួន គេមិនពិសាសាច់ឆ្កែទេ។ តែនៅក្នុងប្រទេសមួយចំនួន ការពិសាសាច់ឆ្កែក៏ពេញនិយមដែរ ដូចជា នៅក្នុងប្រទេសវៀណាម ឬប្រទេសកម្ពុជាជាដើម។ ពលរដ្ឋវៀតណាម ពិសាសាច់ឆ្កែច្រើនជាងពលរដ្ឋខ្មែរ។ ប្រឈមនឹងបញ្ហានេះ អ្នកស្រី Donabelle Zuzart នាយកគ្រប់គ្រងសេវាកម្ម Pet Grooming Cambodia អំពាវនាវដល់ពលរដ្ឋខ្មែរកុំឲ្យពិសាសាច់ឆ្កែ។ 
សូមអញ្ជើញស្តាប់បទសម្ភាសន៍ជាភាសាអង់គ្លេសរវាងលោក គី សុខលីម អគ្គនាយកសារព័ត៌មានថ្មីៗ និងអ្នកស្រី Donabelle Zuzart នាយកគ្រប់គ្រងសេវាកម្ម Pet Grooming Cambodia ដូចតទៅ៖
«ពិសាសាច់ឆ្កែមិនល្អសម្រាប់សុខភាពទេ។ សត្វឆ្កែ ឬឆ្មា គឺជាមិត្តភក្តិស្មោះត្រង់របស់មនុស្ស»។ នេះ គឺជាការអត្ថាធិប្បាយរបស់អ្នកស្រី Donabelle Zuzart នាយកគ្រប់គ្រងសេវាកម្ម Pet Grooming Cambodia មុននឹងអ្នកស្រីអំពាវនាវកុំឲ្យពលរដ្ឋខ្មែរពិសាសាច់ឆ្កែ។
អ្នកស្រី Donabelle Zuzart បានប្រាប់ថា អ្នកស្រីមិនដែលឃើញគេសម្លាប់សត្វឆ្កែទេ ទាំងនៅក្នុងប្រទេសឥណ្ឌារបស់អ្នកស្រី និងនៅក្នុងប្រទេសកម្ពុជានៅពេលនេះ។ អ្នកស្រីនិយាយរបៀបលេងសើចលាយឡំនឹងភាពហ្មត់ចត់ថា ប្រសិនបើអ្នកស្រីឃើញគេសម្លាប់ឆ្កែផ្ទាល់នឹងភ្នែក អ្នកស្រីនឹងវេចសំពាយអ្នកស្រីត្រឡប់ទៅប្រទេសឥណ្ឌាវិញហើយ។ «ខ្ញុំមិនដែលឃើញទេ ហើយខ្ញុំបួងសួងហើយ បួងសួងទៀត សូមកុំឲ្យឃើញការសម្លាប់សត្វឆ្កែ។ បើឃើញ ខ្ញុំមិនអាចទប់អារម្មណ៍ខ្ញុំបានទេ»។ នេះ គឺជាបញ្ជាក់របស់អ្នកស្រី Donabelle Zuzart។
អ្នកស្រីបានបន្តទៀតថា សត្វឆ្កែ គឺជាមិត្តភក្តិដ៏ស្មោះត្រង់ វាមិនចេះខឹងនឹងម្ចាស់វាទេ។ ម្ចាស់វាស្រែកដាក់យ៉ាងដូចម្តេច ក៏វាមិនខឹងដែរ។ អ្នកស្រី Donabelle Zuzart បានបន្តទៀតថា អ្នកពិសាទាំងឡាយគួរពិសាសាច់មាន់ ទា សាច់ជ្រូក សាច់គោ សាច់ចៀម ជំនួសសាច់ឆ្កែទៅប្រសើរជាង។
អ្នកពិសាសាច់ឆ្កែនៅក្នុងប្រទេសកម្ពុជាសព្វថ្ងៃបានប្រាប់សារព័ត៌មានថ្មីៗថា សាច់ឆ្កែឡើងថ្លៃច្រើនណាស់នាពេលបច្ចុប្បន្ននេះ។ ឆ្កែមួយក្បាលទិញចូលអាចមានតម្លៃរហូតដល់ទៅ៥០ដុល្លារអាមេរិករួចទៅហើយ៕
Tag:
ឆ្កែ
© រក្សាសិទ្ធិដោយ thmeythmey.com
