ពីនេះ ពីនោះ
មិនចង់ឲ្យចំណាយពេលឥតប្រយោជន៍ ម្ចាស់ផ្ទះផ្ញើសារជូនចោរថា ផ្ទះខ្លួនគ្មានអ្វីឡើយ !
×![]()
ម្ចាស់ផ្ទះជួលម្នាក់ដែលរស់នៅម្តុំផ្សារ៧មករា សង្កាត់បឹងកក់២ ខណ្ឌទួលគោក រាជធានីភ្នំពេញ មិនចង់ឲ្យចោរចំណាយពេលឥតប្រយោជន៍នោះឡើយ។ បន្ទាប់មានការកាច់សោ និងគាស់ផ្ទះរហូតដល់ទៅ២ដងនៅខែឧសភានេះ ម្ចាស់ផ្ទះបានសម្រេចបិទសេចក្តីជូនដំណឹងនៅមុខផ្ទះជួលរបស់ខ្លួន ដើម្បីប្រាប់ទៅក្រុមចោរឲ្យបញ្ឈប់ការគាស់ និងកាច់សោផ្ទះរបស់ខ្លួន។
បើទោះបីជាមានកំហុសអក្ខរាវិរុទ្ធមួយចំនួនក្តី ប៉ុន្តែនៅក្នុងសេចក្តីជូនដំណឹងចុះថ្ងៃទី២៣ ខែឧសភា ជាមួយនឹងស្នាមមេដៃ គេអាចយល់បានថា ម្ចាស់ផ្ទះហាក់ដូចជាដឹងពីអារម្មណ៍របស់ចោរ នៅពេលពួកគេបរាជ័យ ក្នុងប្រតិបត្តិការលួចគាស់ និងកាច់សោផ្ទះ។
ម្ចាស់ផ្ទះបានសរសេរថា៖ «ខ្ញុំបាទសូមជម្រាបដល់លោក លោកស្រី ដែលមានមុខរបរជាចោរ ដើរគាស់ផ្ទះទាំងអស់ឲ្យបានជ្រាបថា នៅក្នុងផ្ទះនេះ អត់មានមនុស្សនៅទេ ហើយអត់មានអីវ៉ាន់ ឬសម្ភារអ្វី ដែលមានតម្លៃក្រៅពីសោផ្ទះខាងមុខនេះ ដែលមានតម្លៃប្រហែលតែ៥ដុល្លារ និងសំរាមដែលមិនទាន់យកទៅបោះចោលប៉ុណ្ណោះ»។
សារព័ត៌មានថ្មីៗ បានទាក់ទងតាមលេខទូរសព្ទ ដែលបិទលើមុខទ្វាផ្ទះជួល ហើយម្ចាស់ផ្ទះដែលសុំមិនបញ្ចេញឈ្មោះ បានអះអាងថា ខ្លួនពិតជាមានការធុញទ្រាន់ នឹងការទិញសោខ្លាំងណាស់។ លោកបានសរសេរប្រាប់ចោរថា៖ «សូមលោក លោកស្រី មេត្តាយោគយល់ ព្រោះខ្ញុំបាទអត់មានពេលទៅដួរសោទេ»។
ជាមួយគ្នានេះដែរ ម្ចាស់ផ្ទះបើកភ្លើងខៀវដល់ចោរដើម្បីចរចា ដោយបានសរសេរបញ្ជាក់ថា បើសិនជាចោរត្រូវការថវិកាសម្រាប់ហូបបាយ អាចទាក់ទងទៅកាន់គាត់ផ្ទាល់៕
Tag:
ប្លែក
© រក្សាសិទ្ធិដោយ thmeythmey.com
