ពីនេះ ពីនោះ
តើគ្រួសារត្រូវទទួលខុសត្រូវអ្វីខ្លះចំពោះសង្គមជាតិ?
× ភ្នំពេញ៖ នៅក្នុងបរិបទសាកលភាវូបនីយកម្ម ប្រកបដោយភាពស្មុគស្មាញ សង្គមទាំងឡាយលើសាកលលោក បាននិងកំពុងប្រឈមមុខនឹងបញ្ហាជាច្រើន ដូចជាអំពើពាលាអាវ៉ាសែ អំពើអបាយមុខ បញ្ហាគ្រឿងញៀន បញ្ហាក្មេងទំនើង បញ្ហាសិក្សាអប់រំ បញ្ហាសុខភាព។ល។ បញ្ហាទាំងនេះជាបន្ទុកដ៏ធ្ងន់របស់សមាជិកសង្គម ក៏ដូចក្រុមគ្រួសារ ទាំងអស់ដែលតម្រូវឱ្យមានកិច្ចសហប្រតិបត្តិការ រួបរួមសាមគ្គីពីគ្រប់មជ្ឈដ្ឋាន ដើម្បីដោះស្រាយ។
គ្រួសារជាអ្នកជ្រើសរើសបង្កើតសមាជិកសង្គម ហើយទទួលរ៉ាប់រងការពារ និង អប់រំសមាជិកថ្មីនេះរហូតដល់អាយុមនុស្សពេញវ័យ ។ ការមានកូន គឺជាសមិទ្ធផលសំខាន់មិនអាចកាត់ថ្លៃបាន និងការទទួលខុសត្រូវ របស់ឪពុកម្តាយទាំងឡាយ ។ ការយកចិត្តទុកដាក់ឧបត្ថម្ភផ្គត់ផ្គង់ ឱ្យបានគ្រប់គ្រាន់ទាំងសុខភាព សីលធម៌ និងបំណិនជីវិត ទៅឲ្យកូនៗនោះគឺជាកាតព្វកិច្ចរបស់ឪពុកម្ដាយទាំងឡាយ ដើម្បីកសាងតម្លៃជាធនធានមនុស្ស ជាពលរដ្ឋល្អ ដែលជាតម្រូវការបស់សង្គមទាំងមូល។
គ្រួសារជាមជ្ឈមណ្ឌលនៃសកម្មភាពខាងឧស្សាហកម្ម ខាងពាណិជ្ជកម្ម ខាងសេរីភាព ទ្រទ្រង់ជីវិតសម្ព័ន្ធភាពនៃសកម្មភាពទៀត ព្រោះគ្រួសារជាអ្នកបន្ដ និងបញ្ជូននូវប្រពៃណីខាងសាសនា នយោបាយ និងជាអ្នកធានាភាពជឿជាក់នៃច្បាប់ទម្លាប់ផ្សេងៗ និងរួមចំណែកបង្កើតបានជាវប្បធម៌ អរិយធម៌ជាតិទាំងមូល។ កម្រិតនៃអរិយធម៌របស់ប្រជាជននីមួយៗ អាចសម្គាល់បាននៅត្រង់ភាពរឹងមាំ នៃគំនិតគ្រួសារ និងស្ថិតនៅលើផ្នត់គំនិតប្រជាជននៃសង្គមនោះ ចេះគោរពយ៉ាងខ្ជាប់ខ្ជួននូវសុជីវធម៌ សីលធម៌ និងគុណធម៌របស់គ្រួសារ ។
ចំពោះសីលធម៌សង្គម មុខងារគ្រួសារក៏កាន់តែជាកត្ដាសំខាន់ថែមទៀត។ សញ្ចេតនាគ្រួសារ ជម្រុញឱ្យមានសេចក្ដីក្លៀវក្លានូវកិច្ចការទាំងឡាយ ពោលគឺម្នាក់ៗចាប់ផ្តើមមានទម្លាប់ប្រតិបត្ដិនូវគុណធម៌ ដំបូងដោយសារសេចក្ដីស្នេហាដ៏ជ្រាលជ្រៅនេះឯង។
គ្រួសារជាអ្នកផ្ដល់នូវការអប់រំដំបូង ដែលគេត្រូវគិតគូរយកចិត្តទុកដាក់មុនគេ។ ព្រោះការអប់រំដំបូងអាចផ្តល់ទម្លាប់ល្អឬអាក្រក់។ ប្រសិនបើការអប់រំបានល្អពីដំបូង នោះការអប់រំបន្ដនឹងទៅជាការងាយស្រួល ប៉ុន្តែបើការអប់រំដំបូងអាក្រក់វិញការអប់រំបន្ដមុខជាពិបាកខ្លាំងណាស់។ ដូច្នេះគ្រួសារគឺជាទីកន្លែងគំរូល្អបំផុត សម្រាប់អប់រំសីលធម៌ ចំណេះដឹងនិងជំនាញ។ ហេតុនេះ ត្រូវយកចិត្តទុកដាក់ឱ្យបានខ្លាំងក្លាបំផុត ចំពោះសុខុមាលភាពក្រុមគ្រួសារ ដោយជួយសម្រួលជីវភាពរស់នៅ និងសន្ដិសុខឱ្យបានល្អ ។
គ្រួសារ ជាមូលដ្ឋាននៃសង្គម និងមនុស្សជាតិទាំងមូល។ គ្រួសារល្អនាំឱ្យសង្គមល្អ គ្រួសារអាក្រក់នាំឱ្យសង្គមអាក្រក់។
ដូច្នេះ ការសម្អាងតែទៅលើតួនាទីអប់រំរបស់សាលានិងសង្គម ដោយភ្លេចគិតពីតួនាទីអប់រំរបស់គ្រួសារ គឺជាកំហុសមួយយ៉ាងធំធេងចំពោះជោគវាសនាអនាគតមនុស្សជាតិ។ ហេតុនេះ «ទាំងអស់គ្នាសម្រាប់អប់រំ និងអប់រំសម្រាប់ទាំងអស់គ្នា» គឺជាទស្សនៈត្រឹមត្រូវបំផុត។
© រក្សាសិទ្ធិដោយ thmeythmey.com