លោក អេង ឆៃអ៊ាង៖ បើចាប់ខ្លួនឯកឧត្តម កឹម សុខា អាចមានអ្នកគាំទ្រមកពីតាមខេត្ត

ជាតិ

នយោបាយជាតិ

លោក អេង ឆៃអ៊ាង៖ បើចាប់ខ្លួនឯកឧត្តម កឹម សុខា អាចមានអ្នកគាំទ្រមកពីតាមខេត្ត

26, May 2016 , 4:51 pm

រូបភាព

ដោយ:

មន្រ្តីជាន់ខ្ពស់គណបក្សសង្គ្រោះជាតិ បានព្រលយសម្តីថា ប្រសិនបើមានការចាប់ខ្លួមឯកឧត្តម កឹម សុខា ពិតមែននោះ អ្នកគាំទ្រគណបក្សសង្គ្រោះជាតិនៅតាមបណ្តាខេត្តអាចនឹងឡើងមកភ្នំពេញ។

លោក អេង ឆៃអ៊ាង ដែលកំពុងឃ្លាំមើលស្ថានការណ៍នៅស្នាក់ការគណបក្សសង្គ្រោះជាតិ បានប្រាប់សារព័ត៌មានថ្មីៗថា ពេលនេះប្រធានស្តីទីគណបក្សសង្គ្រោះជាតិឯកឧត្តម កឹម សុខា កំពុងតែស្ថិតនៅក្នុងទីសុវត្ថិភាពមួយកន្លែងក្នុងប្រទេសកម្ពុជា ដោយលោកបដិសេធមិនប្រាប់ទីកន្លែងណាមួយឲ្យពិតប្រាកដទេ។ មន្រ្តីរូបនេះ បង្ហើបថា ប្រសិនបើសមត្ថកិច្ចចាប់ខ្លួនឯកឧត្តម កឹម សុខា អ្នកគាំទ្រគណបក្សសង្គ្រោះជាតិនៅតាមខេត្តអាចនឹងនាំគ្នាមកភ្នំពេញ។« គណបក្សសង្គ្រោះជាតិ មានអ្នកគាំទ្រកន្លះប្រទេសដែរតើ។ បើមានការចាប់ខ្លួនឯកឧត្តម កឹម សុខា ច្បាស់ជាអាចមានអ្នកគាំទ្រនៅតាមខេត្ត ឡើងមកភ្នំពេញ ដើម្បីសម្តែងការមិនពេញចិត្ត និងផ្តល់កម្លាំងចិត្តដល់ឯកឧត្តម កឹម សុខា»។ នេះជាការបញ្ជាក់របស់លោក អេង ឆៃអ៊ាង។

តែយ៉ាងណាក្តី មន្រ្តីជាន់ខ្ពស់ខាងលើ អះអាងថា គណបក្សសង្គ្រោះជាតិមិនមានគោលការណ៍ណាមួយអំពាវនាវឲ្យអ្នកគាំទ្រឡើងមកភ្នំពេញនោះទេ តែវាជាសិទ្ធិរបស់អ្នកគាំទ្រ។ ហើយលោក ឆៃអ៊ាង ក៏មិនអត្ថាធិប្បាយថា អាចនឹងមានបាតុកម្មកើតឡើងដែរ បើអ្នកគាំទ្រតាមខេត្តឡើងមកភ្នំពេញនោះ ដោយលោកគ្រាន់តែបញ្ជាក់បែបនេះថា៖ « យើងប្រកាន់ជំហរអហិង្សា និងដោះស្រាយបញ្ហាដោយសន្តិវិធី»។

កាលពីវេលាថ្ងៃជិតត្រង់ នៅថ្ងៃទី ២៦ ខែឧសភានេះ សមត្ថកិច្ចប្រដាប់ដោយអាវុធ បានឃាត់រថយន្ត ឯកឧត្តម កឹម សុខា តែនៅក្នុងរថយន្តនោះ មិនមានប្រធានស្តីទីគណបក្សសង្គ្រោះជាតិនោះទេ ពោលគឺមានតែភរិយាឯកឧត្តម កឹម សុខា ប៉ុណ្ណោះ។ លោក អេង ឆៃអ៊ាង បានចាត់ទុកទង្វើរបស់អាជ្ញាធរថា មានបំណងចាប់ឯកឧត្តម កឹម សុខា ដែលរំលោភនឹងច្បាប់រដ្ឋធម្មនុញ្ញ៕