ជាតិ
×![]()
ដោយ: ម៉ៅ សុផា
ភ្នំពេញ៖ តំណាងរាស្ត្របក្សប្រឆាំង ដែលរងនូវការវាយដំ មិនសុខចិត្តនឹងសាលក្រមរបស់តុលាការរាជធានីភ្នំពេញឡើយ។ សាលាដំបូងរាជធានីភ្នំពេញ បានប្រកាសសាលក្រម ដោយសម្រេចឲ្យជនដៃដល់ទាំង៣រូប ដែលប្រើអំពើហិង្សាតំណាងរាស្ត្រ នៅក្បែរវិមានរដ្ឋសភា កាលពីថ្ងៃទី២៦ ខែតុលាការ ឆ្នាំ២០១៥ ឲ្យជាប់ពន្ធនាគារ៤ឆ្នាំ ដោយក្នុងនោះ ពួកគេអនុវត្តទោសតែ១ឆ្នាំប៉ុណ្ណោះ ហើយព្យួរទោស៣ឆ្នាំ។ 
លោក គង់ សភា តំណាងរាស្ត្របក្សសង្គ្រោះជាតិ ចាត់ទុក សាលក្រមរបស់តុលាការក្រុងភ្នំពេញ ដែលសម្រេចឲ្យពិរុទ្ធជនទាំង៣នាក់ ដែលប្រើអំពើហិង្សា លើរូបលោក និងលោក ញ៉យ ចំរើន តំណាងរាស្ត្រក្នុងបក្សជាមួយគ្នា ថាជាសេចក្តីសម្រេច ដែលលុបលាងទោសកំហុសរបស់បុគ្គលដែលនៅពីក្រោយខ្នង នៃការបង្កឧប្បត្តិហេតុនេះ។ លោកបន្ត សាលក្រមនេះ មានភាពអយុត្តិធម៌ខ្លាំងណាស់ ដែលពួកលោកទាំង២មិនអាចទទួលយកបាននោះទេ។
ថ្លែងប្រាប់សារព៌ត៌មានថ្មីៗ ជនរងគ្រោះជាតំណាងរាស្ត្ររូបនេះ បានលើកឡើងថា ពួកលោកនឹងពិភាក្សាជាមួយក្រុមមេធាវីរបស់ខ្លួន ដើម្បីបន្តដាក់បណ្តឹងទៅសាលាឧទ្ធរណ៍ ប្រឆាំងសាលក្រមរបស់តុលាការជាន់ទាប មុននឹងចូលជាស្ថាពរ។ យ៉ាងណាក៏ដោយ លោក គង់ សភា គ្មានក្តីសង្ឃឹមសោះឡើយ ថាតុលាការជាន់ខ្ពស់ អាចនឹងផ្តល់យុត្តិធម៌ដល់ពួកលោកទាំងពីរ។ លោកបញ្ជាក់បែបនេះថា៖ «ដរាបណាគ្មានការផ្លាស់ប្តូរ ពួកខ្ញុំនៅតែមិនអាចទទួលបានយុត្តិធម៌»។
នៅព្រឹកថ្ងៃទី ២៧ ឧសភានេះ តុលាការក្រុងភ្នំពេញ បានប្រកាសសាលក្រម ដោយចោទពិរុទ្ធជនទាំង៣នាក់ គឺលោក ចាយ សារិទ្ធ លោកម៉ៅ ហឿន និងលោកសុត វណ្ណនី ពីបទ «ប្រើអំពើហិង្សាដោយចេតនាមានស្ថានទម្ងន់ទោស»៕
Tag:
តុលាការ
គង់ សភា
ញ៉យ ចំរើន
© រក្សាសិទ្ធិដោយ thmeythmey.com
